ايماقتار • 10 قىركۇيەك، 2020

الماتىلىق كىشكەنتاي لەيلا قۇجاتىن الۋعا كەلدى

8 رەت كورسەتىلدى

كىشكەنتاي لەيلا بۇگىن اتا-اناسىمەن بىرگە "ازاماتتارعا ارنالعان ۇكىمەت" مەملەكەتتىك كورپوراتسياسى الماتى قالاسى مەدەۋ اۋداندىق حقو-عا ءبىرىنشى رەت كەلدى، دەپ حابارلايدى Egemen.kz.

اتا-اناسى قىزىنا تولقۇجات جاساتىپ، شەتەلگە ساياحاتقا شىقپاق. حقو-داعى اعا-اپالارى وعان قۇرمەت كورسەتىپ، سىيلىقتار ۇسىندى. ءومىرىنىڭ العاشقى قادامدارى وسىنداي قۋانىش پەن شاتتىقتان باستالىپ جاتقان كىشكەنتاي ارۋ، الداعى ءومىرىنىڭ بارلىق ءساتىن وسىلاي ەلەستەتەدى. سەبەبى، اينالاسى سونداي جارقىن ساتتەر سىيلاپ وتىر.

"ازاماتتارعا ارنالعان ۇكىمەت" مەملەكەتتىك كورپوراتسياسى الماتى قالاسى فيليالىنىڭ ماماندارى بالالاردىڭ عانا ەمەس، قىزمەت الۋعا كەلگەن ءاربىر جانعا جىلۋلىق سىيلاپ، كوڭىلدەرىن تابۋعا تىرىسادى. قازىرگىدەي كۇدىگى مەن ءۇمىتى قاتار تۇرعان الماعايىپ كەزەڭدە قامكوڭىلدەرگە، ءبىر ساتتىك بولسا دا قۋانىش سىيلاپ، كۇدىگىن سەيىلتۋگە قىزمەت ەتۋدە.

قالاداعى كەز كەلگەن حقو-لارعا بارا قالساڭىز، قىزمەت الىپ، جاڭا قۇجاتقا يە بولىپ جاتقان ازاماتتارعا قۇرمەت كورسەتىپ، ءتىپتى سىيلىق جاساپ جاتقان حقو ماماندارىن كەزدەستىرەسىز.    

جەتىسۋ اۋدانىنىڭ تۇرعىنى، ءۇشىنشى توپتاعى مۇگەدەكتىگى بار قايرات ابىلەۆ تە ءوزىنىڭ تۋعان كۇنى ەكەنىن حقو-عا كەلىپ، قىزمەت الىپ وتىرعاندا ءبىلدى. قايراتتىڭ قۇجاتىن راسىمدەپ جاتقان وپەراتور، ارىپتەستەرىمەن بىرگە ورىندارىنان تۇرىپ، قول سوعىپ قۇرمەت كورسەتتى.

"مەن ۇنەمى وسى قاجەتتىلىگى بار جاندارعا ارنالعان تەرەزەدەن قىزمەت الامىن. ماماندار كىشىپەيىل، ىزەتتى، قۇرمەتتەرىن ايامايدى. بۇگىنگى قۇرمەتتەرى تىپتەن ەرەكشە بولدى"، - دەيدى تاڭدانىسىن جاسىرماي.   

"جولى بولعىش جانداردى جاقسى كورەم. ءوزىمدى دە سولاردىڭ قاتارىنانمىن دەپ ەسەپتەيمىن"، - دەيدى دينارا ەسىمدى بويجەتكەن. بۇگىن كامەلەت جاسىنا تولعان جەكە كۋالىگىن الۋعا كەلگەن ەكەن.  "مۇنداي قۇرمەتتى كۇتپەگەن ەدىم. قۋانىپ تۇرمىن. مۇنى الداعى ومىرىمە اق جول دەپ جورىدىم. تۇركسىب اۋداندىق حقو ماماندارىنا العىسىم شەكسىز"، - دەيدى ول.

"مىنا كورىنىس سىرتتان قاراعان ادامعا دا قۋانىش سىيلايدى ەكەن. ورتالىق قىزمەتكەرلەرى قولدارىنا شار، شاعىن سىيلىقتارىن الىپ، العاشقى رەت قۇجات، ياعني پاسپورت، جەكە كۋالىك سىندى قۇجات تۇرلەرىن الىپ جاتقان ازاماتتارعا سىيلاپ جاتىر. كەرەمەت ەمەس پە!؟ قىزمەت الۋشىلار دا، ولارعا قۇرمەت كورسەتۋشى ماماندار دا ءماز! ءدال قازىرگى ۋاقىتتا مۇنداي قارىم-قاتىناس كەرەك-اق"، - دەيدى بوستاندىق اۋداندىق فرونت-وفيستەن قىزمەت الۋعا كەلگەن ايدانا كارىموۆا.

"ازاماتتارعا ارنالعان ۇكىمەتتىڭ بارلىق فرونت-وفيس قىزمەتكەرلەرى قىزمەت الۋعا كەلگەن ازاماتتارعا ەرەكشە كوزقاراسپەن قىزمەت كورسەتۋدە. ولارعا ءبىر ساتتىك بولسا دا قۋانىش سىيلاپ، كوڭىلدەرىن كوتەرۋگە تىرىسۋدامىز. مۇنى حقو-نىڭ جاڭا ءداستۇرى دەسەك تە بولادى. ماقساتىمىز – ءاربىر جانعا جىلۋ سىيلاۋ. ادامداردىڭ ءبارى كوڭىلدى جۇرسە، ءومىرىمىز دە نۇرلانىپ، بار قيىندىق ۇمىتىلماي ما؟!"، – دەيدى "ازاماتتارعا ارنالعان ۇكىمەت" مەملەكەتتىك كورپوراتسياسى الماتى قالاسى فيليالىنىڭ ديرەكتورى دانيار قىرىقباەۆ.

 

الماتى

سوڭعى جاڭالىقتار

مەرەكە قارساڭىندا ماراپاتتالدى

ايماقتار • بۇگىن، 13:58

6 مامىرعا ارنالعان ۆاليۋتا باعامى

ەكونوميكا • بۇگىن، 11:16

«چەلسي» فينالعا شىقتى

سپورت • بۇگىن، 10:48

ۇقساس جاڭالىقتار