«اقتاۋ – بوزجىرا – قارىنجارىق – بۋلىويىق ۇڭگىرى» باعىتى بويىنشا تۋريستىك ساپارعا شىققان توپتان ءجاسوسپىرىم بالاسىمەن بىرگە ءبولىنىپ, باسقا جولعا ءتۇسىپ اداسىپ كەتكەن ولگانى ىزدەۋ وزگەلەرگە ەكى كۇندىك جۇمىس بولدى.
– 4 كولىك بولىپ 29 تامىزدا تۋريستىك ساپارعا شىعىپ, ارادا ءبىر تاۋلىك وتكەندە ءۇستىرت قورىعىنا جەتتىك. سول جەرگە تۇنەپ, ەرتەڭىندە تۋريستەر سوڭعى نۇكتە – بۇلويىق ۇڭگىرىنە قاراي اتتانعان ەدىك. كەتىپ بارا جاتقاندا ولگا بىزگە باسقا جولمەن باراتىنىن ەسكەرتتى. ويتكەنى ول بۇعان دەيىن دە الگى ۇڭگىرگە بىرنەشە رەت بارعان. كولىكتە جانارماي جەتكىلىكتى ەدى. ءبىز ۇڭگىردە كەزدەسەمىز دەپ كەلىستىك. بىراق دىتتەگەن جەرگە جەتكەندە ولگانى تاپپادىق. ول ءبارىمىز جولعا اتتانعان نۇكتەگە قايتىپ كەتكەن بولار دەگەن ويمەن كەلگەن ىزىمىزبەن كەرى قايتتىق. بىراق ونى ەش جەردەن تاپپادىق. شەكاراشىلار مەن قورىقشىلار ەشقانداي كولىك كوزدەرىنە تۇسپەگەنىن ايتتى. ءبىز ءوز بەتىمىزشە ىزدەۋگە كىرىسىپ كەتتىك. جولاي «لەگيون تۋر» بىرلەستىگىنىڭ ادامدارىن كەزدەستىردىك, ولار ءوز شارۋاسىن ىسىرىپ قويىپ, بىزگە كومەككە كەلدى. جارتى تاۋلىك ىزدەپ, تاپپاعان سوڭ جاڭاوزەنگە بارىپ, ايەل مەن بالا جوعالعانىن حابارلادىق. سوسىن جوعالعانداردى ىزدەۋگە قۇتقارۋشىلار جەدەل قوسىلدى, دەيدى قۇربىسى يرينا مۋراۆەۆا.
ىزدەۋ جۇمىستارىنىڭ ناتيجەسىندە ولگا مەن بالاسى تابىلدى. ولاردىڭ كولىگى بەيمالىم سەبەپپەن ورتەنىپ كەتكەن ەكەن.
– ەكەۋىنىڭ اس-سۋى از ەدى, ونىڭ ۇستىنە قۇلا تۇزدە قورىقتىڭ جىرتقىش جانۋارلارى بار, ولارعا شىنىمەن ۇلكەن قاۋىپ ءتونىپ تۇرعان بولاتىن. ەگەر قۇتقارۋشىلار جەدەل قيمىلداماعاندا ايەل مەن بالانىڭ جاعدايى نە بولار ەدى, كىم ءبىلسىن. ءبىز ولگا مەن بالاسىن قۇتقارۋعا اتسالىسقان بارشا جانعا شىنايى ريزاشىلىعىمىزدى بىلدىرەمىز, – دەيدى يرينا مۋراۆەۆا.
تۋريستىك ساپاردا ساقتىق باسىم بولۋ شارت, جاپان دالادا جولدى بىلەمىن دەۋ – سول دالانىڭ پەرزەنتتەرىنە عانا جاراسادى.
ماڭعىستاۋ وبلىسى
