جۋرناليستەرمەن ونلاين كەزدەسۋ بارىسىندا «الماتى» تەلەارناسىنىڭ باس ديرەكتورى نۇرجان مۇحامەدجانوۆا: «جەڭىستىڭ 75 جىلدىعىنا ارنالىپ تۇسىرىلگەن «الماتى جۇرەگىمدە» تەلەحيكاياسى سۇراپىل سوعىس كەزەڭىندەگى زيالى قاۋىمنىڭ ومىرىنەن سىر شەرتەتىن, شىنايى وقيعاعا نەگىزدەلگەن فيلم. ەل باسىنا قيىن-قىستاۋ كۇن تۋعان كەزەڭدە سوعىس ايماقتارىنان ەۆاكۋاتسيالانعان ازاماتتارعا پانا بولىپ, ينتەلليگەنتسيا وكىلدەرىنىڭ باسىن قوسقان الماتى دامىلسىز جۇمىس ىستەگەن ءوندىرىس ورىندارىنىڭ ارقاسىندا مايدان دالاسىنا دەم بەرىپ وتىردى», دەپ اتاپ ءوتتى.
الماتى تاريحىنا قاتىستى وسىنداي سيۋجەتتەردى ارقاۋ ەتكەن فيلم 12 سەرياعا نەگىزدەلگەن.ءتۇسىرۋ يدەياسى «الماتى» تەلەارناسىنا تيەسىلى دەسەك, ءفيلمنىڭ باس پروديۋسەرى – ءاليا ۋۆالجانوۆا, ستسەناريىن جازعان – لەيلا اقىنجان, قويۋشى-رەجيسسەرى – ەلدار قاپاروۆ, قويۋشى-وپەراتورى – سامات ءشارىپوۆ. باستى رولدەردە روزا مۇقاتاەۆا, الديار بايراكيموۆ, دانيل پوپوۆ جانە گۇلميرا دايراباەۆا وينايدى.
فيلم جەلىسى بويىنشا 1942 جىلى قىس ايىندا رەسەيدىڭ تانىمال جازۋشىسى پ.كورچەۆسكي قىزى اللامەن بىرگە ەلىمىزدىڭ استاناسىنا قونىس اۋدارادى. اللا كورچەۆسكايا – دارىندى ءارى جاس وپەرا ءانشىسى. زۇلمات سوعىس باستالاردان بۇرىن اناسىنان ايىرىلعان اللا ءۇشىن الداعى ءومىر وڭايعا سوقپايدى. جانارىنا جاس تولا, جانى مۇڭعا تولى قىزىنىڭ جابىرقاۋلى كۇيى اكەگە دە وڭاي سوقپاعانى بەلگىلى. ەۆاكۋاتسيالانعان مادەنيەت قايراتكەرلەرىنىڭ باسىم بولىگى «لاۋرەاتنيكتە» ءومىر سۇرسە, پ.كورچەۆسكيدى قازاقتىڭ تانىمال جازۋشىسى ءى.قاسىموۆ ءوز ۇيىنە شاقىرادى. وسى كەزەڭدەردە ءى.قاسىموۆتىڭ ۇلى ءامىر اللاعا عاشىق بولادى. ءامىر – سىمباتتى ءارى دارىندى مۋزىكانت. ول بويجەتكەندى كەڭەس وداعىنىڭ ايگىلى ءارتىسىنىڭ قاتىسۋىمەن وتەتىن «باقشاساراي فونتانى» بالەتىنە شاقىرادى. سودان بەرى وپەرا تەاترى اللانىڭ ءومىرىنىڭ ءبىر بولشەگىنە اينالادى.
«الماتى جۇرەگىمدە» تەلەحيكاياسىندا كەيىپكەرلەر سوعىستىڭ اۋىرتپالىعىنا قاراماستان, جارقىن بولاشاقتان كۇدەر ۇزبەي, كەدەرگىلەرگە مويىمايدى. اكتريسا روزا مۇقاتاەۆا باس كەيىپكەردى سومداۋدىڭ وتە قيىنعا تۇسكەنىن ايتىپ, «اللانىڭ قيىن تاعدىرى مەنى جىلاتتى دا, جابىرقاتتى», – دەيدى. دەگەنمەن دە تاعدىر تارتۋى وڭاي بولماعان اللا بار قيىندىقتى ەڭسەرىپ, ءوز ماحابباتى ءۇشىن كۇرەسە ءبىلدى.
فيلمگە ءتۇسۋ بارىسىنداعى اسەرلەرىمەن بولىسكەن دانيل پوپوۆ, ايبەك سەرىكحانوۆ ماحاباتتى ارقاۋ ەتكەن تەلەحيكايادا سوعىستىڭ اۋىر اۋراسىنا ەنۋ, سول كەزەڭنىڭ كەيىپكەرىنە اينالۋدىڭ وڭاي بولماعانىن ايتادى. ال وقيعا جەلىسىن كورەرمەن جۇرەگىنە جەتكىزە ءبىلۋ اكتەر ءۇشىن ەڭ باستى شەبەرلىك. فيلم قانشالىقتى اۋىر كەزەڭدەگى ادامدار ءومىرىن سۋرەتتەگەنىمەن, ماحابباتقا ادال بولا بىلگەن ەكى جاستىڭ تابىسۋىمەن اياقتالادى. ەلىمىزدىڭ مادەني ورتالىعى وڭتۇستىك استانانىڭ ءىى دۇنيەجۇزىلىك سوعىس جىلدارىنداعى رولىنە دەگەن ىقىلاستان تۋعان فيلم 14 قىركۇيەكتەن باستاپ كورەرمەنگە جول تارتادى. «الماتى» تەلەارناسى جىل سوڭىنا دەيىن مۇنىمەن قوسا ءۇش تەلەحيكايا مەن بىرقاتار تىڭ جوبالاردى ۇسىنعالى وتىر.
الماتى
