س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ عالىمدارى Led system media كومپانياسىنىڭ ءوندىرىس الاڭىندا كوكونىستەر مەن جەمىستەردى كۇن ساۋلەسىنسىز ءوسىرۋ تەحنولوگياسىن جاساۋدا. وسىمدىكتەر كۇن ساۋلەسىن نانوفوسفورمەن تولتىرىلعان ارنايى جارىقديودتى شامدارمەن الماستىرادى.
"وسى جوبا بويىنشا ديپلومدىق جۇمىس جازدىق. قازىر ول بويىنشا ماگيسترلىك ديسسەرتاتسيا جازىلۋدا. كوشە شامدارىن شىعاراتىن Led system media كومپانياسى ءوزىنىڭ سيپاتتامالارى بويىنشا كۇن ساۋلەسىنە جاقىن شامداردى سىناقتان وتكىزەدى. ءبىز قازىر كومپانيا جىلىجايىندا وسىمدىكتەر ءۇشىن كۇن ساۋلەسىن وسى شامدارمەن تولىقتاي الماستىرۋ جولىن ىزدەۋدەمىز. ءبىز قازىردىڭ وزىندە ناتيجەگە جاقىنداپ قالدىق", دەيدى اۋىلشارۋاشىلىق عىلىمدارىنىڭ كانديداتى, قازاق اگروتەحنيكالىق ۋنيۆەرسيتەتىنىڭ اگرونوميا فاكۋلتەتى اۋىل جانە وسىمدىك شارۋاشىلىعى كافەدراسىنىڭ اعا وقىتۋشىسى ارىسگۇل تۇرلىبەكوۆا.
ونىڭ ايتۋىنشا, بۇل ءادىس وسىمدىكتەردى كۇن ساۋلەسى تۇسپەيتىن بولمەلەردە وسىرۋگە مۇمكىندىك بەرەدى. سولتۇستىك ايماقتاردا كۇن ساۋلەسىنىڭ تاپشىلىعى اسىرەسە قىستا ايقىن سەزىلەدى. ساۋلە شاشۋ سپەكترى جوعارى بولعاندىقتان, شامدار جەمىستەردىڭ ءوسۋى مەن جەتىلۋىن تەزدەتەدى. ولار ەنەرگيا ۇنەمدەۋ ءۇشىن دە بارىنشا ءتيىمدى.
سونىمەن قاتار ەلوردا جىلىجايلارىندا داقىلداردى توپىراقسىز ءوسىرۋ تەحنولوگياسى زەرتتەلۋدە.
"ولار گيدروپونيكانى پايدالانادى, ياعني كوكونىستەر مەن جەمىستەر تامشىلاتىپ سۋارۋ ادىسىمەن ارنايى سۋبستراتتا وسىرىلەدى. ول ارقىلى وسىمدىكتەر دارۋمەندەرمەن بايىتىلادى. بۇل ءادىستىڭ ارتىقشىلىقتارىنا ارامشوپتەردىڭ بولماۋى جانە وسىمدىك اۋرۋلارىنىڭ تومەن پايىزى جاتادى. مۇنداي جىلىجايلاردا ميكروكليمات رەتتەلەدى. بۇل كوكونىس داقىلدارىن ءوسىرۋدىڭ وتە جوعارى تەحنولوگيالىق تاسىلدەرى", دەپ ءتۇسىندىردى ارىسگۇل تۇرلىبەكوۆا.
ونىڭ ايتۋىنشا, وسىلايشا الىنعان جەمىستەردىڭ ساپاسى جەردەگى جىلىجايلاردا وسىرىلگەندەردەن كەم تۇسپەيدى. الىنعان ونىمدەر حيميالىق قۇرامىنا تەكسەرىلەدى جانە بارلىق قاجەتتى ستاندارتتارعا سايكەس كەلەدى.
قاتۋ جوبالارىنا اگرونوميا فاكۋلتەتى اۋىل جانە وسىمدىك شارۋاشىلىعى كافەدراسىنىڭ ستۋدەنتتەرى دە قاتىسادى. ولار ءۇشىن جىلىجايلاردا كوكونىس پەن جەمىس ءوسىرۋ بويىنشا پراكتيكالىق ساباقتار وتكىزىلەدى. ستۋدەنتتەر جاڭا تەحنولوگيالارمەن تانىسادى. ولار ءۇشىن مۇندا ساباقتار ءۇش جىل بويى وتكىزىلەدى.
