"ەلوردانىڭ جاسىل بەلدەۋى - قالانىڭ تىنىس الۋ ورگانى ىسپەتتەس. ورمان ءوسىرۋ ەلباسىنىڭ باستاماسىمەن مەملەكەتتىك كوميسسيانىڭ 1996 جىلعى قاڭتارداعى قاۋلىسىن شەشىلگەن بولاتىن. وسى ۋاقىت ارالىعىندا جاسىل بەلدەۋ ايتارلىقتاي كەڭەيدى. جىل سايىن مىڭداعان تال-تەرەك وتىرعىزىلادى. جاسىل بەلدەۋ قالانىڭ ەكولوگياسى مەن كليماتتىق جاعدايىن جاقسارتۋعا سەپتىگىن تيگىزىپ كەلەدى. بيىل 330 مىڭعا جۋىق جاپىراقتى, قىلقان جاپىراقتى كوشەت جانە قوسىمشا تاعى 3 مىڭنان استام كوشەت وتىرعىزامىز. جالپى, اۋماقتا 10,2 ملن استام تال مەن 1,8 ملن قاراقات, ىرعاي, دەرەن, ت.ب. ءوسىپ كەلەدى.
كوكتەمدە جاسىل بەلدەۋدىڭ سوقپاق جول جەلىسىن قايتا قۇرۋعا كىرىستىك. اۋماقتا بەلسەندى ۋاقىت وتكىزۋگە ارنالعان سكەيتبوردينگ الاڭى, روليكپەن سىرعانايتىن شاعىن الاڭداردى (قىستا كونكي تەبۋگە دە بولادى) سالۋ جۇمىستارى جۇرگىزىلىپ جاتىر. جاياۋ سەرۋەندەۋگە جانە كروسس-كانتري ساباقتارىنا ارنالعان جولدار سالىنادى. سونداي-اق, بالالارعا ارنالعان ويىن الاڭدارىن, فۋتبول جانە تەننيس الاڭدارىن جاسايمىز.
جاسىل بەلدەۋدى بۇگىندە قويان, قارساق, تۇلكى, قىرعاۋىل جانە ت.ب. جانۋارلار مەن قۇستار مەكەندەيدى. جاسىل بەلدەۋدەگى قۇستاردىڭ سانىن ارتتىرۋ بويىنشا دا جۇمىسار جۇرگىزىلىپ جاتىر.
قازىرگى جاسىل بەلدەۋدىڭ جانىندا ورنالاسقان يپپودرومدا يپپوتەراپيامەن اينالىسۋعا ارنالعان ات-سپورتى كەشەنىنىڭ قۇرىلىسىن اياقتايمىز. ەرەكشە قاجەتتىلىكتەرى بار بالالاردى وڭالتۋمەن ارنايى وقىتىلعان ادامدار اينالىسادى. يپپودروم بازاسى ۇلتتىق جانە كلاسسيكالىق سپورت تۇرلەرىن وتكىزۋ جانە ولارعا دايىندىق, تۋريستىك مارشرۋت باعىتتارى بويىنشا دامىتىلادى. يپپودرومنان ۇركەر (يلينكا) ەلدى-مەكەنىنە دەيىن ۆەلوجول توسەلدى. قازىر ۆەلوسيپەد, شاڭعىلاردى جالعا الۋ ءۇشىن بازا سالامىز. بۇل جۇمىس جىل سوڭىنا دەيىن اياقتالادى.
ەلوردانىڭ بارلىق اۋداندارىندا كوگالداندىرۋعا نازار اۋدارىپ كەلەمىز. بيىل 30 مىڭ ءتۇپ اعاش وتىرعىزامىز. اۋلالاردى, ساياباقتاردى, تىنىمباقتار مەن بۋلۆارلاردى اباتتاندىرۋ كەزىندە كوشەتتەر وتىرعىزامىز. ارينە ولارعا كۇتىم جاساۋ ماڭىزدى. وتىرعىزىلعان تال-تەرەكتەر مەن گۇلدەردى كۇتىپ-باپتاۋ ءۇشىن كوكتەمنەن باستاپ سۋارۋ جۇيەسىن 20%-تەن 90%-كە دەيىن قالپىنا كەلتىردىك.
پرەزيدەنت حالىققا جولداۋىندا ەكولوگيالىق تۋريزم مادەنيەتىن بەلسەندى دامىتۋ ماڭىزدى مىندەت ەكەنىن اتاپ ءوتتى. ول ءۇشىن ەلوردادا قالا تۇرعىندارى مەن قوناقتارىنا ارنالعان ەكوپاركتەر قۇرۋ بويىنشا جۇمىستار جۇرگىزىلىپ كەلەدى", - دەپ جازدى التاي كولگىنوۆ.
