ناتيجەلى جۇمىسپەن قامتۋدىڭ "ەڭبەك" مەملەكەتتىك باعدارلاماسى اياسىندا جىلدىق 4 جانە 6% سىياقى مولشەرلەمەسىمەن شاعىن كاسىپكەرلىكتى قولداۋ ءۇشىن جەڭىلدەتىلگەن شاعىن نەسيەلەۋ باستالدى. نەگىزگى قارىز بويىنشا جەڭىلدىك كەزەڭى 12 ايعا دەيىن, سىياقى ءۇشىن – 6 ايعا دەيىن بەرىلەدى. نەسيەنىڭ ماكسيمالدى سوماسى – 5 جىلعا دەيىنگى مەرزىمگە 20 ميلليون تەڭگەگە دەيىن. ەگەر ءوتىنىش بەرۋشى كوپ بالالى نەمەسە از قامتىلعان وتباسى بولسا, وندا سىياقىنىڭ جىلدىق مولشەرى 4%-دى قۇرايدى.
تولىق اقپارات پەن تالاپ ەتىلەتىن قۇجاتتار ءتىزىمىن 8-800-080-035-05 بايلانىس ورتالىعىنا نەمەسە 8-701-555-71-24 ءنومىرى ارقىلى الۋعا بولادى. مەكەن-جايى: نۇر-سۇلتان قالاسى, تۇران داڭعىلى, 19/1, 3 قابات, 306 كەڭسە.
سونداي-اق بۇگىندە اۋىل شارۋاشىلىعىن قارجىلاي قولداۋ قورى ءوزىنىڭ نەسيەلىك ونىمدەرى ارقىلى اۋىل تۇرعىندارى مەن اۋىلشارۋاشىلىق تاۋار وندىرۋشىلەرىنىڭ ءارتۇرلى ماقساتتى باعىتتارداعى جوبالارىن قارجىلاندىرادى. قوردىڭ باستى ماقساتى – اگروونەركاسىپ كەشەنىن دامىتۋ. اتاپ ايتقاندا, بۇل مال شارۋاشىلىعى, ەگىن شارۋاشىلىعى, اۋىل كاسىپكەرلىگىن دامىتۋ, اۋىلشارۋاشىلىق ونىمدەرىن قايتا وڭدەۋ جانە ساقتاۋ بويىنشا جوبالار.
ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ مەملەكەتتىك باعدارلاماسى اياسىنداعى نەسيەلەر جىلدىق 6% مولشەرلەمەمەن ءار ءتۇرلى ماقساتتا قاراستىرىلادى. سونىمەن قاتار ەگەر الەۋەتتى تۇتىنۋشى كوپ بالالى نەمەسە از قامتىلعان وتباسى بولسا, ولار ءۇشىن سىياقى مولشەرى جىلىنا 4%-دى قۇرايدى.
"نەسيەلىك ونىمگە بايلانىستى جەڭىلدىك كەزەڭىنىڭ مەرزىمى, مولشەرى جانە ۇزاقتىعى ءارتۇرلى بولاتىنىن ەسكەرۋ قاجەت. مىسالى, مال شارۋاشىلىعىن دامىتۋ شەڭبەرىندە ءسىز 12 ميلليون تەڭگەگە دەيىن قارجىلاندىرۋعا ءوتىنىش بەرە الاسىز, مۇندا نەسيەنىڭ ەڭ ۇزاق مەرزىمى – 6,5 جىل. وسى سالادا نەگىزگى قارىزعا 26 ايعا دەيىن, سىياقى ءۇشىن – 9 ايعا دەيىن ەڭ جوعارعى جەڭىلدىك بەرىلەدى. ەگىن شارۋاشىلىعىن دامىتۋعا باعىتتالعان نەسيەگە كەلەتىن بولساق, نەسيەنىڭ ماكسيمالدى سوماسى 6 ميلليون تەڭگەگە دەيىن جانە 3 جىلعا دەيىنگى مەرزىمگە بەرىلەدى. جەڭىلدىك مەرزىمى – نەگىزگى قارىزعا جانە سىياقىعا 12 ايعا دەيىن", دەلىنگەن حابارلامادا.
كاسىپكەرلىكتى دامىتۋ باعىتىندا نەسيەنىڭ ماكسيمالدى سوماسى 5 جىل مەرزىمگە 10 ميلليون تەڭگەگە دەيىن. نەگىزگى بورىش بويىنشا ەڭ جوعارعى جەڭىلدىك مەرزىمى 12 ايعا دەيىن, سىياقى ءۇشىن – 6 ايعا دەيىن قاراستىرىلعان.
اۋىلشارۋاشىلىق ونىمدەرىن قايتا وڭدەۋ جانە ساقتاۋ ءۇشىن نەسيەنىڭ ماكسيمالدى سوماسى 6,5 جىل مەرزىمگە 15 ميلليون تەڭگەگە دەيىن. نەگىزگى قارىز بويىنشا ەڭ جوعارعى جەڭىلدىك مەرزىمى 24 ايعا دەيىن, سىياقى ءۇشىن – 12 ايعا دەيىن قاراستىرىلعان.
2019 جىلدان باستاپ قور الەۋەتتى كليەنتتەرگە نەسيەنى الدىن-الا ماقۇلداۋ مەحانيزمىن ەنگىزدى. وسىنىڭ ارقاسىندا بيزنەس وكىلدەرى باستاپقى كەزەڭدە نەسيەلىك تاريحى مەن مەملەكەت الدىنداعى قارىزدارىن ۇيدەن شىقپاي-اق تەكسەرۋگە مۇمكىندىك الادى. تەكسەرۋدەن كەيىن الەۋەتتى كليەنت قۇجاتتاردى جيناۋعا كىرىسە الادى (online.kazagro.kz).
الدىمەن نەسيە العىسى كەلەتىندەر جۇمىسپەن قامتۋ ورتالىعىندا جۇمىسسىز نەمەسە ءوزىن-ءوزى جۇمىسپەن قامتىعان رەتىندە تىركەلۋى كەرەك. ودان كەيىن جۇمىسپەن قامتۋ ورتالىعى كليەنتتى كاسىپكەرلىك نەگىزدەرىنە سەرتيفيكات بويىنشا وقۋعا "اتامەكەن" ۇلتتىق كاسىپكەرلەر پالاتاسىنا جىبەرەدى. وقۋ مەرزىمى – 30 كۇن. وقىتۋدى اياقتاعاننان كەيىن كليەنت "بيزنەس باستاۋ" سەرتيفيكاتىن الادى. سودان كەيىن ءوتىنىش بەرۋشى بۇرىن بەرىلگەن ءتىزىم بويىنشا قۇجاتتاردى جيناۋعا كىرىسەدى. قۇجاتتار تولىق جينالعاننان كەيىن, كليەنت قارىزعا قۇجاتتار تاپسىرۋ ءۇشىن قور فيليالىنا جۇگىنە الادى. نەسيەلىك ءوتىنىمدى قاراۋدىڭ ماكسيمالدى مەرزىمى – 14 كۇنتىزبەلىك كۇن.
