وسىلايشا, 6 اي ىشىندە ءمامس-كە 260 ملرد تەڭگەدەن استام سومادا جارنالار مەن اۋدارىمدار ءتۇستى. سونىمەن قاتار, ولاردىڭ باسىم بولىگى - 146,6 ملرد تەڭگە - بۇل حالىقتىڭ 15 جەڭىلدىكتى ساناتىنا جاتاتىن 11 ملن-عا جۋىق ازاماتتار ءۇشىن جارنانى مەملەكەت تولەدى.
«قور 2020 جىلدىڭ 6 ايىنىڭ قورىتىندىسى بويىنشا ءمامس پاكەتى شەڭبەرىندە كورسەتىلگەن مەديتسينالىق قىزمەتتەر ءۇشىن 156,7 ملرد تەڭگەدەن استام قاراجات تولەندى. تولەم حالىققا كورسەتىلگەن مەديتسينالىق قىزمەتتەردىڭ ساپاسى مەن كولەمىنە مونيتورينگ جۇرگىزىلگەننەن كەيىن عانا جۇزەگە اسىرىلادى. كلينيكالىق حاتتامالاردى جانە ەمدەۋگە قاجەتتى تالاپتاردى ساقتاي وتىرىپ, فاكتى بويىنشا كورسەتىلگەن جانە قۇجاتپەن راستالعان قىزمەتتەر عانا تولەنەدى» - دەپ اتاپ ءوتتى.
قوردىڭ ءباسپاسوز قىزمەتىندە تۇسىندىرگەندەي, ءمامس ءۇشىن جارنالار مەن اۋدارىمدار الەۋمەتتىك مەديتسينالىق ساقتاندىرۋ قورىنىڭ وزىنە ەمەس, ۇلتتىق بانكتەگى ارنايى شوتقا تۇسەدى. ول جەردەن قاراجات ءمامس پاكەتى بويىنشا كورسەتىلگەن مەديتسينالىق قىزمەتتەرگە اقى تولەۋگە مەديتسينالىق ۇيىمدار – قوردىڭ جەتكىزۋشىلەرىنە جىبەرىلەدى.
قوردا ناقتىلاعانداي, جارتى جىلدىقتاعى شىعىنداردىڭ باسىم بولىگى ستاتسيونارلىق مەديتسينالىق كومەك تولەمى - 50 ملرد تەڭگەدەن استام. 6 اي ىشىندە جوسپارلى تۇردە ەلىمىزدىڭ ستاتسيونارلارىندا 630 مىڭنان استام ادام ەمدەلدى.
كورسەتىلگەن كونسۋلتاتسيالىق-دياگنوستيكالىق كومەك ءۇشىن شامامەن 42 ملرد تەڭگە تولەندى. اتاپ ايتقاندا, دياگنوستيكالىق قىزمەتتەر اراسىندا كت جانە مرت قىزمەتتەرى ازاماتتار ءۇشىن وزەكتى. جارتى جىل ىشىندە پاتسيەنتتەرگە 1,1 ملرد تەڭگەدەن استام سوماعا 96 مىڭنان استام كت قىزمەتى جانە 1,6 ملرد تەڭگەدەن استام سوماعا 101 مىڭنان استام مرت قىزمەتى كورسەتىلدى.
سونىمەن قاتار, قاڭتار مەن ماۋسىم ارالىعىندا 3 ملن-نان استام ستوماتولوگيا, 2 ملن-عا جۋىق رەنتگەن جانە 1,6 ملن-نان استام ۋدز-دياگنوستيكا قىزمەتتەرى كورسەتىلدى, ولاردىڭ جالپى قۇنى 15 ملرد تەڭگەدەن اسادى. ولاردىڭ بارلىعى ءمامس پاكەتىندە مەديتسينالىق ساقتاندىرۋ قاراجاتى ەسەبىنەن كورسەتىلدى, پاتسيەنتتەرگە مەديتسينالىق كومەك ءۇشىن قور اقى تولەدى.
ەستەرىڭىزگە سالا كەتەيىك, ءبىرىنشى جارتىجىلدىقتا بارلىق قازاقستاندىقتار ءمامس جۇيەسىندە شارتتى تۇردە ساقتاندىرىلعان جانە مەديتسينالىق قىزمەتتەردى كەپىلدى كومەك اياسىندا, سونداي-اق ءمامس اياسىندا پايدالانا الاتىن.
قازىر قۇنى 11 ملرد تەڭگەدەن اساتىن 50 مىڭنان استام قازاقستاندىق مەديتسينالىق وڭالتۋدان ءوتتى. جارتى جىلدا تاعى 3,8 مىڭنان استام ازامات 11 ملرد تەڭگەدەن استام سوماعا جوعارى تەحنولوگيالىق مەديتسينالىق قىزمەت الدى.
ەستەرىڭىزگە سالا كەتەيىك, ەكىنشى توقساندا كارانتين اياسىندا جوسپارلى تۇردە مەديتسينالىق كومەك كورسەتۋگە شەكتەۋ قويىلدى. 1 تامىزدان باستاپ ەلىمىزدىڭ كلينيكالارىندا جوسپارلى مەديتسينالىق كومەك قايتا باستالدى, سوندىقتان ەكىنشى جارتىجىلدىقتا ءمامس جۇيەسىندە كورسەتىلگەن مەديتسينالىق قىزمەتتەر بويىنشا كورسەتكىشتەردىڭ ءوسۋى كۇتىلۋدە.
