سۋرەتتى تۇسىرگەن ەرلان ومار, «EQ»
«جۇمىسپەن قامتۋ-2020» جول كارتاسى شەڭبەرىندە تورايعىر, سابىندىكول جانە جاسىباي كولدەرىندەگى جاعاجايلاردى اباتتاندىرۋ, سونداي-اق س.تورايعىروۆ كەسەنەسى مەن قوڭىر اۋليە ۇڭگىرىنە باراتىن اۆتوجولداردىڭ ورتاشا جوندەلۋىن قامتيتىن 6 ينۆەستيتسيالىق جوبانى ىسكە اسىرۋ كوزدەلگەن. سونداي-اق باعدارلاما اياسىندا كۋرورتتىق ايماق اۋماعىندا 10 سانيتارلىق-گيگيەنالىق توراپ ورناتۋ قاراستىرىلعان, ونىڭ 9-ى ورناتىلدى. كۋرورتتىق ايماقتى ۇزدىكسىز ەنەرگيامەن قامتاماسىز ەتۋ ماقساتىندا رەسپۋبليكالىق بيۋدجەتتەن بەرىلەتىن ترانسفەرتتەر ەسەبىنەن تورايعىر كەنتىنىڭ قوسالقى ستانتسياسىنان جاسىباي كولىندەگى نىساندارعا دەيىن جوعارى ءۆولتتى ەلەكتر جەلىسىنىڭ قۇرىلىسى جۇرگىزىلۋدە.
«بيىلعى كۋرورتتىق ايماق اۋماعىندا دەمالۋ جانە جازعى تۋريستىك ماۋسىمنىڭ اياقتالۋىنا بايلانىستى شەكتەۋلەرگە قاراماستان, وسى جوبالاردى ىسكە اسىرۋ بولاشاقتا دەمالىس جاعدايلارىن نەعۇرلىم جوعارى دەڭگەيگە شىعارۋعا, سونداي-اق كۋرورتتىق ايماقتىڭ ينۆەستيتسيالىق الەۋەتىن ارتتىرۋعا مۇمكىندىك بەرەدى», دەدى «Kazakh Tourism» ۇك» اق باسقارما توراعاسى ە. ەركىنباەۆ.
ايتا كەتەيىك, 2019 جىلى باياناۋىل كۋرورتتىق ايماعىنا 130,7 مىڭ تۋريست كەلىپ, 2018 جىلعا قاراعاندا 7%-عا ارتتى. تۋريستىك قىزمەتتى دامىتۋدىڭ مەملەكەتتىك باعدارلاماسىنا سايكەس 2025 جىلى تۋريستەر سانى 450 مىڭ ادامعا جەتەدى.
