جارقىراپ تۇرعان كوشەلەر ەڭ الدىمەن كەرەك دۇنيەنى وڭاي تابۋعا, ۇلكەن-كىشىنىڭ اداسپاي جۇرۋىنە قولايلى بولسا, ەكىنشى جاقتان سۋىق قولدى ادامداردىڭ, بۇزاقى جانداردىڭ ەركىن بوسۋىنا جول بەرمەيدى. جارىقتا كورىنىپ قالاتىن بولاتىندىقتان وندايلار ەركىن ويقاستاي المايدى. سوندىقتان جارقىراعان جارىق ءتارتىپتىڭ ساقتالۋىنا, ادامداردىڭ قاۋىپسىزدىگىن ساقتاۋعا مۇمكىندىك بەرەدى.
سوڭعى كەزدەرى پەتروپاۆل كوشەلەرىنىڭ دە تۇندە جارىق بولۋى قولعا الىنىپ, قالا اكىمى بولات جۇمابەكوۆ بۇل ءىستى قاتتى قاداعالاپ وتىر. قازىر كوپتەگەن كوشەنىڭ كۇيىپ كەتكەن شامدارى اۋىستىرىلىپ, جاڭالارى قويىلىپ جاتىر. قالا اكىمدىگىنىڭ "تۇرعىن-ءۇي كوممۋنالدىق, جولاۋشىلار كولىگى جانە اۆتوموبيل جولدارى" ءبولىمى "ەۋروپالىق قايتا قۇرۋ جانە دامۋ" بانكىنەن وسى شارالارعا نەسيە الىپ وتىر. الىنعان جانە جەرگىلىكتى بيۋدجەتتەن بولىنگەن قاراجات قالانىڭ جارتى تۇرعىندارى (120 مىڭ ادام) تۇراتىن بولىگىن تولىقتاي جارىقتاندىرماق. بيىل ەڭ ۇلكەن دەپ سانالاتىن 16 كوشەگە جاڭادان شامدار ءىلىنۋ كوزدەلگەن. ونىڭ 11-ءنىڭ قاراجاتى جەرگىلىكتى بيۋدجەتتەن بولسا, 5-ەۋى "قايتا قۇرۋ جانە دامۋ" بانكىنەن الىنعان نەسيەنىڭ ەسەبىنەن قارجىلاندىرىلادى.
سونىڭ ىشىندە, قازىردىڭ وزىندە اۋەزوۆ كوشەسى تولىعىمەن قايتادان جارىقتاندىرىلدى. بارلىق باعاندارداعى كۇيگەن شامدار اۋىستىرىلدى. اۋەزوۆ كوشەسى قالانىڭ ۇلكەندەرىنىڭ ءبىرى ەدى, ەندى ول تۇندە دە جارقىراپ تۇراتىن بولدى. ال قازىر كەنشىنباەۆ, استانا, بوكەتوۆ, ءۋاليحانوۆ كوشەلەرىندە بۇل جۇمىستار جالعاسىن تاۋىپ جاتىر. بارلىعى 6 مىڭداي جاڭا شام ءىلىنۋ جوسپارلانعان.
جارىقتا تۇرىپ, جارىقتا ءومىر سۇرگەنگە نە جەتسىن؟ مۇنداي جاڭالىقتار قىزىلجار تۇرعىندارىن قۋانتا تۇسۋدە.
