شارانى مادەنيەت جانە سپورت مينيسترلىگى ءتىل ساياساتى كوميتەتى توراعاسىنىڭ ورىنباسارى ادىلبەك قابا قۇتتىقتاۋ سوزىمەن اشتى. ول قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ "قازاق ءتىلىنىڭ مەملەكەتتىك ءتىل رەتىندەگى ءرولى كۇشەيىپ, ۇلتارالىق قاتىناس تىلىنە اينالاتىن كەزەڭى كەلەدى دەپ ەسەپتەيمىن" دەگەن ءسوزىن ەسكە سالا كەلىپ, قازاقستان حالقى تىلدەرى كۇنى مەرەكەسىنە وراي كورسەتىلەتىن جوبانىڭ ەلىمىزدىڭ مادەني ومىرىندە ەلەۋلى وقيعا بولاتىنىنا توقتالىپ: "حالقىمىزدىڭ بويىنداعى اسىل قاسيەتتەردىڭ التىن ۇياسى – انا ءتىلىمىز. بۇگىنگى شارا – قازاق تىلىنە دەگەن قامقورلىقتىڭ بەلگىسى. "جالعىزدىڭ ءۇنى, جاياۋدىڭ شاڭى شىقپايدى" دەپ جاتامىز, كەرىسىنشە, ءتىل مايدانىندا ايماقتارداعى ءتىل باسقارمالارى, ءتىل پاتريوتتارى, ءتىلى ءۇشىن شىرىلداپ جۇرگەن جەكە تۇلعالار ۇلكەن ءرول اتقارادى. كورەرمەنگە جول تارتىپ بارا جاتقان بۇل جوبانىڭ باسى-قاسىندا بولعان بارشا ارىپتەستەرىمە العىس ايتامىن", دەدى.
استانا تەلەارناسىنان كورسەتىلەتىن "1 مينۋت" جوباسىنىڭ ماقساتى – كەيبىر سوزدەردىڭ دۇرىس ايتىلىپ, دۇرىس جازىلۋىنا كوڭىل اۋدارتۋ, جالپى قازاق تىلىندە ساۋاتتى جازۋعا, سويلەۋگە ماشىقتاندىرۋ, ءتىل مارتەبەسىن كوتەرۋ ەكەن.
جوبا جەتەكشىسى بەلگىلى جۋرناليست نارتاي ارالباي ۇلىنىڭ ايتۋىنا قاراعاندا جۇمىس توبى, دۇنيە جۇزىندەگى وسى مازمۇنداس باعدارلامالاردىڭ ءبىرازىن شولىپ شىعىپ, اقىرى برەين-رينگ ويىنى ءتاسىلىن تاڭداپتى. اتاۋ قويار كەزدە پوەتيكالىق اتاۋلاردان سانالى تۇردە باس تارتىپ, ەل ىشىندە "1 مينۋتتان كەيىن كەلەمىن" دەگەن سەكىلدى ءجيى قايتالانىپ ايتىلىپ جۇرگەن سوزگە توقتام جاساعان.
