مەملەكەتتىك حاتشى ءوز سوزىندە "ۇلت جانە اباي" تاقىرىبىنا توقتالىپ, "ۇلتىمىز بەن جۇرتىمىزدىڭ جاڭا بولمىسىن قالىپتاستىرۋ ءۇشىن بىزگە ابايدان اسقان اقىلشى جوق. وسىناۋ مارتەبەلى مىندەت جولىندا ۇلى اقىن مۇراسىنا سۇيەنىپ ارەكەت جاساساق, بەرەكەت تاباتىنىمىز انىق. ءبىز ىزدەگەن بارلىق ساۋالدىڭ جاۋابى حاكىم ابايدىڭ ولمەس ولەڭىندە, ساليقالى سوزىندە تۇر. اباي اڭساعان قوعام – ويى وزىق, ساناسى سەرگەك "تولىق ادامنىڭ" تولىققاندى قوعامى. ءبىز اقىن مۇراسىنا جانە زيالىلار الەۋەتىنە سۇيەنىپ, وسىنداي قوعام ورناتۋىمىز كەرەك.
ول قوعامنىڭ ۇلتتىق يدەياسى ءبىلىم مەن ىلىمگە جەتەلەيتىن تاۋەلسىز ەلدىڭ اعارتۋشىلىق ۇستانىمى بولۋعا ءتيىس. ۇلت بولمىسىن جاڭعىرتۋ بارىسىندا ابايدى تولعاندىرعان جاعىمسىز قاسيەتتەردەن ارىلۋىمىز كەرەك», دەپ اتاپ ءوتتى.
