كەزدەسۋدى اشقان مەملەكەتتىك حاتشى مەملەكەت باسشىسىنىڭ بيىلعى جولداۋى - بۇل پاندەميا مەن جاھاندىق ەكونوميكالىق داعدارىس جاعدايىنداعى قازاقستاننىڭ جاڭا الەۋمەتتىك-ەكونوميكالىق دامۋ باعىتى ەكەنىن اتاپ ءوتتى. الداعى بارلىق وزگەرىستەر مەملەكەتتىڭ جۇمىس ىستەۋ تيىمدىلىگىن ارتتىرۋعا, وزەكتى الەۋمەتتىك-ەكونوميكالىق پروبلەمالاردى شەشۋگە باعىتتالعان.
قىرىمبەك كوشەرباەۆ قازىرگىدەي كۇردەلى كەزەڭدە زيالى قاۋىم داعدارىستىق جاعدايلاردىڭ الدىن الۋدا, حالىقتىڭ جاڭا بىرەگەيلىگىن قالىپتاستىرۋدا وزىندىك ءرول اتقارۋى ءتيىس ەكەنىن اتاپ ءوتتى. بۇل رەتتە, جاڭا كەزەڭنىڭ سىن-قاتەرلەرىن ەسكەرە وتىرىپ, ءبىرىنشى كەزەكتە, ۇلى ابايدىڭ باعا جەتپەس مۇراسىن قايتا زەردەلەۋ, زيالى قاۋىمنىڭ ۇلتتىڭ جاڭا رۋحاني قاسيەتتەرىن قالىپتاستىرۋداعى ميسسياسىن تەرەڭ ءتۇسىنۋ قاجەت.
تۇڭعىش پرەزيدەنت - ەلباسى نۇرسۇلتان نازارباەۆ ۇسىنعان "رۋحاني جاڭعىرۋ" باعدارلاماسىن ىسكە اسىرۋدا ونىڭ مازمۇنىن بايىتىپ, سەرپىن بەرۋ كەرەك. مىسالى, حالىق داستۇرلەرى مەن ادەت-عۇرىپتارىن ساقتاۋ جانە قورعاۋ ماسەلەلەرىن قۇقىقتىق رەتتەۋ بويىنشا عالىمدار مەن قوعام قايراتكەرلەرىنەن تۇراتىن جۇمىس توبىن قۇرۋ قاجەت.
داعدارىس داۋىرىندە جانە الداعى بولاشاقتا ۇلتتىڭ دامۋىنىڭ نەگىزى ەڭ الدىمەن وتباسى مەن وتباسىلىق تاربيە بولۋى كەرەك. ورتا مەكتەپتەردە وتباسىلىق قۇندىلىقتارعا باعدارلانعان ارنايى پاندەردى ەنگىزۋدى قاراستىرۋدىڭ, جاستاردى وتباسىلىق تاربيەلەۋدىڭ جالپىۇلتتىق ادىستەمەسىن ازىرلەۋدىڭ ۋاقىتى كەلدى.
"ەل پرەزيدەنتى جولداۋدا بەلگىلەگەن كەلەلى مىندەتتەر مەن باسىم باعىتتاردى بارشاڭىز تىڭدادىڭىزدار. سونىڭ ىشىندە, بۇگىن ءبىز سىزدەرمەن "ۇلتتىڭ جاڭا بولمىسى" باعىتى بويىنشا جان-جاقتى وي قوزعاپ, پىكىر الماسۋدى ۇسىنامىز.
قاسىم-جومارت كەمەل ۇلى جولداۋدا "قازىرگى مىندەت – حالقىمىزدىڭ جاڭا بولمىسىن قالىپتاستىرۋ, تۇتاس ۇلت ساپاسىن ارتتىرۋ ەكەنىن اتاپ ءوتىپ, ۇلتىمىز جاڭا ساپاعا كوشۋى ءۇشىن ءبىزدىڭ كۇندەلىكتى ومىرلىك ۇستانىمدارىمىز دا وزگەرۋى كەرەكتىگىن, قازاق قوعامىندا جاڭا قاعيداتتار جانە جاڭا باعدارلار سالتانات قۇرۋعا ءتيىس ەكەنىن ايتتى. ولار "رۋحاني جاڭعىرۋ" باعدارلاماسىنا جاڭا تىنىس, جاڭا وزگەرىستەر اكەلۋى كەرەك دەپ ويلايمىز.
مەملەكەت باسشىسى جيىرما ءبىرىنشى عاسىردىڭ ۇرپاعى تەرەڭ ءبىلىمدى بولعانىن, جاس بۋىندى ەرىنبەي ەڭبەك ەتۋگە بەيىمدەۋ قاجەتتىگىن, كەز-كەلگەن ءىستى كاسىبي داعدى ارقىلى جۇزەگە اسىرۋدى, سونداي-اق تەمىردەي ءتارتىپ جانە جوعارى جاۋاپكەرشىلىك بارشامىزدىڭ بويىمىزدا بولۋى كەرەكتىگىن العا مىندەت ەتىپ قويدى. سونىمەن قاتار ادىلدىكتەن اينىماۋدى, ادىلدىك – قوعام دامۋىنىڭ ماڭىزدى شارتى, اسىرەسە, ەل-جۇرتتىڭ تاعدىرىن شەشۋ ءۇشىن اسا قاجەت قاسيەت ەكەنىنە توقتالىپ, "بىزگە كەرەگى – ادالدىق, ۇقىپتىلىق, تياناقتىلىق. ءبارىمىز ناعىز قازاقتى ءدال وسىنداي كەيىپتە كورگىمىز كەلەدى. ءبىز سوندا عانا باسەكەگە قابىلەتتى مەملەكەت, زياتكەر ۇلت قالىپتاستىرا الامىز", دەپ اتاپ ءوتتى ق.كوشەرباەۆ.
