بۇل كۇندە ەلىمىزدە كوشى-قونعا بايلانىستى مەملەكەتتىك قىزمەتتەر ء«بىر تەرەزە» قاعيداتى بويىنشا بەكىتىلگەن ستاندارتقا ساي ۇسىنىلىپ وتىر. «ازاماتتارعا ارنالعان ۇكىمەت» مك» كەاق الماتى قالاسى بويىنشا فيليالىنىڭ حالىققا قىزمەت كورسەتۋ جونىندەگى كوشى-قون ءبولىمى شەتەلدىكتەرگە ءۇشىنشى جىل قىزمەت كورسەتۋدە. ەگەر بۇرىن رەزيدەنت ەمەس تۇلعا 6 ءتۇرلى ۇيىمعا (سالىق, پوليتسيا, اۋرۋحانا, ساقتاندىرۋ كومپانيالارى, فوتو سالوندار جانە بانكتەر) بارىپ, ءار جەردە كەزەككە تۇرۋعا ءماجبۇر بولسا, قازىر بۇل قىزمەتتەر ءبىر جەردە جانە ء«بىر تەرەزە» قاعيداتى بويىنشا, كەدەرگىسىز قىزمەت كورسەتۋ ستاندارتتارىنا ساي كورسەتىلەدى.
بۇل جەردە مەديتسينالىق تەكسەرىس پەن داكتيلوسكوپيادان ءوتىپ, ساقتاندىرۋ ءپوليسىن راسىمدەۋگە جانە جەكە سايكەستەندىرۋ ءنومىرىن الۋعا بولادى. بۇعان دەيىن شەتەلدىكتەر قازاقستاندا جۇمىس ىستەۋگە رۇقسات الۋ ءۇشىن بەس كۇن جۇرسە, ەندى رۇقساتتى ءبىر ساعاتتىڭ ىشىندە راسىمدەي الادى.
مىسالى, ازەربايجاندىق نايم ابباس الماتىعا جۇمىس ىستەۋ ماقساتىندا 10 ناۋرىزدا كەلگەن. بۇگىن ول الماتى ميگراتسيالىق حقو-عا تىركەلۋ مەرزىمىن ۇزارتۋعا كەلدى. ء«بىر تەرەزە» ادىسىمەن ءبىر ورتالىقتان جۇمىسىنىڭ جىلدام بىتكەنىنە ريزا بولىپ, العىسىن ءبىلدىردى. قىزمەت كورسەتۋشىلەر دە سىپايى, مادەنيەتتى دەيدى ول.
«ازاماتتارعا ارنالعان ۇكىمەتتىڭ الماتى قالاسىنداعى حالىققا قىزمەت كورسەتۋ جونىندەگى كوشى-قون ءبولىمى «ەڭبەك ميگرانتتارىنا رۇقساتتار بەرۋ جانە ۇزارتۋ», «شەتەلدىكتەرگە جسن قالىپتاستىرۋ», «قازاقستانعا ۋاقىتشا كەلەتىن شەتەلدىكتەر مەن ازاماتتىعى جوق ادامداردى تىركەۋ» مەملەكەتتىك قىزمەت تۇرلەرىن ۇسىنادى. كۇنىنە ورتاشا 1000-نان 1200-گە دەيىن قىزمەت الۋشىلار كەلەدى. كارانتين كەزىندە شەكارانىڭ جابىق تۇرۋى سەبەپتى, شەتەلدىكتەر ونشالىقتى كوپ ەمەس. جالپى, قازاقستاندىق ميگراتسيالىق حقو ۇلگىسىن تمد ەلدەرىنىڭ مەملەكەتتىك ورگاندارى ۇلگى رەتىندە الىپ ءجۇر. وتكەن جىلدارى ءبىزدىڭ تاجىريبەنى ۇيرەنۋگە بىرنەشە ورتالىق ازيا ەلدەرىنىڭ وكىلدەرى كەلىپ كەتتى», – دەيدى «ازاماتتارعا ارنالعان ۇكىمەت» مك» كەاق الماتى قالاسى بويىنشا فيليالىنىڭ ديرەكتورى دانيار قىرىقباەۆ.
ميگراتسيالىق حقو اشىلعالى بەرى شەتەلدىكتەرگە 216934 قىزمەت ۇسىنىلعان. ناقتىراق ايتقاندا, 2018 جىلى – 11970, 2019 جىلى – 156 679, بيىلعى جىل باسىنان بەرى 48285 قىزمەت كورسەتىلىپتى.
ەڭبەك ەتۋگە رۇقسات ەتۋ بويىنشا 2019 جىلدىڭ 7 ايىندا 41992 قىزمەت كورسەتىلسە, وسى جىلى بۇل سان 29347-ءنى قۇراعان. ۋاقىتشا تىركەلگەندەر وتكەن جىلى 57897 بولسا, بيىل 22415, جسن قالىپتاستىرۋ بويىنشا 8756 الىنىپ, بيىل ول وسى ۋاقىت ارالىعىندا 2589-گە دەيىن تومەندەگەن.
ەستەرىڭىزگە سالا كەتسەك, «ازاماتتارعا ارنالعان ۇكىمەت» مك» كەاق الماتى قالاسى بويىنشا فيليالىنىڭ حالىققا قىزمەت كورسەتۋ جونىندەگى كوشى-قون ءبولىمى ءوز قىزمەتىن 2018 جىلدىڭ 28 تامىزىنان باستادى. اۋەلى الماتى قالاسى, «نۇركەنت» شاعىن اۋدانىندا اشىلعان بولاتىن, وسى جىلدىڭ 13 شىلدەسىنەن باستاپ «شۇعىلا» شاعىن اۋدانىنداعى «ناۋرىزباي اۋدانى اكىمى اپپاراتى» كمم عيماراتىنا كوشكەن.
الماتى
