مەديتسينا • 03 قىركۇيەك، 2020

الماتىدا حالىقتى ءمامس جۇيەسىمەن قامتۋ جۇمىستارى كۇشەيتىلۋدە

ەرجان باباقۇماروۆ حالىقتى ءمامس جۇيەسىمەن قامتۋ جۇمىستارىن كۇشەيتۋدى تاپسىردى. بۇل تۋرالى الماتى قالاسى اكىمدىگىنىڭ ءباسپاسوز قىزمەتى Facebook-تەگى رەسمي پاراقشاسىندا جازدى، دەپ حابارلايدى Egemen.kz

ايىم ءداۋىت

الماتى قالاسى اكىمىنىڭ ورىنباسارى ەرجان باباقۇماروۆ "الەۋمەتتىك مەديتسينالىق ساقتاندىرۋ قورى" كەاق باسقارماسى توراعاسىنىڭ ورىنباسارى ءلاززات اقتاەۆامەن مەگاپوليس حالقىن ءمامس جۇيەسىمەن قامتۋدىڭ ماڭىزدى ماسەلەلەرى بويىنشا وڭىرلىك شتابتىڭ ونلاين-وتىرىسىن وتكىزدى.

وتىرىسقا ءمامس الماتى فيليالىنىڭ باسشىلىعى، قالالىق قوعامدىق دەنساۋلىق ساقتاۋ، الەۋمەتتىك ءال-اۋقات، كاسىپكەرلىك جانە ينۆەستيتسيالار باسقارمالارى، وڭىرلىك كاسىپكەرلەر پالاتاسى، سونىمەن بىرگە، مەملەكەتتىك جانە جەكەمەنشىك مەديتسينالىق مەكەمەلەردىڭ باس دارىگەرلەرى قاتىستى.

باستى ماقسات — مەگاپوليس حالقىن الەۋمەتتىك مەديتسينالىق ساقتاندىرۋ جۇيەسىمەن قامتۋدى كەڭەيتۋ بويىنشا شارالاردى كۇشەيتۋ، ول ءوز كەزەگىندە حالىقتىڭ مەديتسينالىق قىزمەت تۇرلەرىنە جۇمسايتىن قارجىسىن تومەندەتۋگە مۇمكىندىك بەرەدى. ەرجان باباقۇماروۆ جۇمىس بەرۋشىلەر مەن ءىرى، ورتا جانە شاعىن بيزنەس سۋبەكتىلەرىنىڭ، سونىمەن بىرگە، جوعارى وقۋ ورىندارىنىڭ جانە ورتا ءبىلىم بەرۋ ورىندارىنىڭ، سونىمەن بىرگە، حالىقتىڭ جەڭىلدىك جاسالاتىن ساناتىنىڭ مالىمەتتەرىن اكتۋاليزاتسيالاۋ قاجەتتىگىنە نازار اۋداردى.

ءوز كەزەگىندە ءلاززات اقتاەۆا مەديتسينالىق ۇيىمداردىڭ كەپىلدەندىرىلگەن تەگىن كومەك، ولارعا قول جەتىمدىلىك، سونىڭ ىشىندە ساقتاندىرۋ ستاتۋسىنا قاراماستان جەدەل قىزمەت كورسەتۋدى قوسا العاندا ناۋقاستار اراسىندا ءتۇسىندىرۋ جۇمىستارىن كۇشەيتۋ جۇمىستارى ماسەلەسىن كوتەردى.

الماتى قالاسى بويىنشا "الەۋمەتتىك مەديتسينالىق ساقتاندىرۋ قورى" كەاق فيليالىنىڭ ديرەكتورى ت.ابىلداەۆ اعىمداعى جىلى بيۋدجەت 1،6 ەسە وسكەنىن جانە 197،6 ملرد تگ قۇراعانىن ايتتى. ونىڭ ىشىندە COVID-19 كوروناۆيرۋسىمەن كۇرەس اياسىندا ەپيدەمياعا قارسى شارالارعا 12،5 ملرد تگ ءبولىندى. ناۋرىزدان شىلدەگە دەيىنگى ارالىقتا 27 265 مەديتسينالىق قىزمەتكەرگە جالپى سوماسى 8،9 ملرد تگ بولاتىن ۇستەمەاقى تولەندى.

بۇگىندە الماتى قالاسىندا 154 مەديتسينالىق ۇيىم ءمامس جۇيەسى اياسىندا قىزمەت كورسەتۋدە، ونىڭ ىشىندە 62 پايىزى مەملەكەتتىك مەنشىك فورماسىندا بولسا، 38 پايىزى جەكەمەنشىك يەلىكتە. كورسەتىلەتىن مەديتسينالىق قىزمەت ساپاسىنا تۇراقتى تۇردە مونيتورينگ جۇرگىزىلەدى. 2020 جىلدىڭ I جارتى جىلىندا كورسەتىلگەن قىزمەتتەردىڭ ساپاسى مەن كولەمى بويىنشا 4 مىڭنان استام اقاۋلار انىقتالعان، مەديتسينالىق ۇيىمدارعا سالىنعان ايىپپۇلدار 200 ملن تەڭگەدەن استى. وتكەن جىلدىڭ I جارتى جىلدىعىمەن سالىستىرعاندا اقاۋلاردىڭ (2019 جىلدىڭ I جارتى جىلىنداعى ايىپپۇلدار سوماسى 250 ملن تەڭگەدەن اسقان) تومەندەگەنى بايقالعان.

وتىرىس بارىسىندا مەديتسينالىق ۇيىمداردىڭ باس دارىگەرلەرىنىڭ ءمامس اياسىندا حالىققا مەديتسينالىق كومەك كورسەتۋ تۋرالى باياندامالارى تىڭدالدى.

وڭىرلىك شتابتىڭ توراعاسى، الماتى قالاسى اكىمىنىڭ ورىنباسارى ەرجان باباقۇماروۆ حالىقتى ءمامس اياسىندا حالىقتى قامتۋدىڭ كەڭەيتۋ قالا تۇرعىندارىنىڭ ساپالى مەديتسينالىق قىزمەت الۋ قۇقىعىمەن قامتاماسىز ەتۋگە قاجەت ەكەنىن اتاپ ءوتتى جانە باسقارمالار جانە مەديتسينالىق ۇيىمداردىڭ باسشىلارىنا اتالعان سۇراقتى ەرەكشە باقىلاۋعا الۋدى تاپسىردى. مىندەتتى الەۋمەتتىك مەديتسينالىق ساقتاندىرۋ جۇيەسى حالىققا مەديتسينالىق قىزمەت تۇرلەرىنىڭ كەڭەيتىلگەن پاكەتىن، سونىڭ ىشىندە قىمبات تۇراتىن پروتسەدۋرالار مەن وپەراتسيالاردى كەپىلدەندىرىلگەن تەگىن مەديتسينالىق كومەك كولەمىمەن شەكتەلمەي كورسەتۋگە مۇمكىندىك بەرەدى.

انىقتاما ءۇشىن: مىندەتتى الەۋمەتتىك ساقتاندىرۋ سۇراقتارى بويىنشا 1406 ءنومىرى بويىنشا بىرىڭعاي بايلانىس-ورتالىعىنان كەڭەس الۋعا بولادى.