"پرەزيدەنت حالىققا كەزەكتى جولداۋىندا الەۋمەتتىك سالادا بىرقاتار تاپسىرما بەردى. ونىڭ ىشىندە كوپشىلىكتىڭ قىزىعۋشىلىعىن تانىتىپ وتىرعانى زەينەتاقى جيناعىنىڭ ءبىر بولىگىن ماقساتتى پايدالانۋ مۇمكىندىگىنە بايلانىستى. سوندىقتان وسى باعىتتا تۇسىنىكتەمە بەرگىم كەلەدى. بىرىنشىدەن, مەملەكەت باسشىسى تاراپىنان تۇجىرىمدامالىق شەشىم قابىلداندى. زەينەتاقى جيناقتارىنىڭ ءبىر بولىگىن كەلەسى جاعدايلاردا پايدالانۋ مۇمكىندىگى بەرىلەدى, ياعني تۇرعىن ءۇي جاعدايىن جاقسارتۋعا, ەمدەلۋگە جانە قارجى كومپانيالارىنا باسقارۋ ءۇشىن اۋدارۋعا بەرىلەدى», - دەدى ب. نۇرىمبەتوۆ.
بۇدان سوڭ, مينيستر كىمدەر قانداي جاعدايدا جيناقتارىنىڭ ءبىر بولىگىن پايدالانا الاتىنىن ايتتى.
"بىرىنشىدەن, جۇمىس ىستەگەن ءارى جۇمىس ىستەپ جۇرگەن ءبىزدىڭ ازاماتتار, ياعني بىرىڭعاي زەينەتاقى قورىندا جارنالارى بار ازاماتتاردىڭ جينالعان سوماسى "جەتكىلىكتى شەگىنەن" اسىپ جاتقان جاعدايدا الا الادى. ماقسات ونىڭ ءبارىن تاراتىپ بەرۋ ەمەس, ونىڭ قاجەتتى ءبىر بولىگى قالۋى ءتيىس. ودان اسقان اقشانى ازاماتتار ءوز ەركىمەن جوعارى ماقساتتارعا پايدالانۋعا مۇمكىنگىدىگى بار. مۇنداي ازاماتتاردىڭ سانى 530 مىڭ ادامعا جەتىپ وتىر. ەكىنشىسى - زەينەت جاسىنا جەتكەن ادامدار. ەگەر دە ولاردا جيناقتاۋشى قورىندا قاراجاتتارى بار بولسا, ول كىسىلەر سول قاراجاتتىڭ 50 پايىزىنا دەيىن الادى. بۇنداي ادامداردىڭ سانى 178 مىڭنان اسادى. ۇشىنشىدەن, زەينەتاقى اننۋيتەتىن رەسىمدەگەن جانە ءالى دە جيناقتارى بار ازاماتتار الا الادى. مۇنداي ەلىمىزدە 13,3 مىڭ ادام بار. وسىلايشا, زەينەتاقى جيناقتارىنىڭ ءبىر بولىگىن ماقساتتى پايدالانۋ مۇمكىندىگىن 721 مىڭنان استام قازاقستاندىق پايدالانا الادى", - دەدى ول.
