نەسيە الۋشى ازاماتتارعا اۋداندىق اۋىل شارۋاشىلىعى ءبولىمى, كاسىپكەرلىك ءبولىمى, «اتامەكەن» ۇلتتىق كاسىپكەرلىك پالاتاسى ورداباسى اۋداندىق فيليالى مەن كاسىپكەرلەرگە قىزمەت كورسەتۋ ورتالىعىنىڭ ماماندارى نەسيە الۋ بويىنشا كەڭەس بەرىپ, قولداۋ جۇمىستارىن جۇرگىزەدى.
سونداي-اق ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017 – 2021 جىلدارعا ارنالعان «ەڭبەك» مەملەكەتتىك باعدارلاماسىنا سايكەس جاڭا بيزنەس-يدەيالاردى ىسكە اسىرۋعا ارنالعان مەملەكەتتىك گرانتتار بەرۋ تەتىگى دە كوزدەلگەن. مەملەكەتتىك گرانت الۋعا «باستاۋ بيزنەس» جوباسى بويىنشا كاسىپكەرلىك نەگىزدەرىنە وقىتۋ كۋرسىنان وتكەن نەمەسە باعدارلامانىڭ ءبىرىنشى باعىتى شەڭبەرىندە قىسقا مەرزىمدى وقۋدى اياقتاعان جۇمىسسىز ادامدار ءوتىنىم بەرە الادى.
ورداباسى اۋدانىندا بىلتىرعى جىلى 20 گەكتار جىلىجاي ىسكە قوسىلعان بولسا, بيىلعى جىلدىڭ 7 ايىندا بۇل كورسەتكىش تاعى 10,2 گەكتارعا ۇلعايدى. قازىرگى تاڭدا اۋدانداعى جىلىجايلار كولەمى 77,07 گەكتاردى قۇرادى. ونىڭ ىشىندە, 21 گەكتارى – وندىرىستىك, قالعان 56,07 گەكتارى فەرمەرلىك جىلىجايلار. ءونىم كولەمى 3 340 توننانى قۇرادى. بۇل ونىمدەر تەك اۋدان تۇرعىندارىنا عانا ەمەس, قازاقستاننىڭ باسقا قالالارىنا دا جەتكىزىلۋدە. جەرگىلىكتى ديقاندار رەسەيگە دە 249 توننا كوكونىستى ەكسپورتتاعان.
