ساربازدىڭ سۇيەگى قازاقستان اسكەري-اۋە كۇشتەرىنىڭ اسكەري بورتىمەن جەتكىزىلدى. تۋىستارىنا جەتكىزىلگەننەن كەيىن, بارلىق اسكەري ءراسىمدى ساقتاي وتىرىپ, ساربازدىڭ سۇيەگى جەر قوينىنا تاپسىرىلدى.
وتكەن جىلى «ەسكە الۋ ۆاحتاسى» اكتسياسى اياسىندا رەسەي فەدەراتسياسى, تۆەر وبلىسى, زۋبتسوۆسك اۋدانىنىڭ ماڭىندا جۇرگىزىلگەن ىزدەستىرۋ وپەراتسياسى بارىسىندا 1941-1945 جىلدارداعى ەكىنشى دۇنيەجۇزىلىك سوعىس كەزىندە قازا تاپقان اسكەري قىزمەتشىنىڭ سۇيەگى تابىلدى. ساربازدىڭ مويىنتۇمارىن ساراپتاۋدان وتكىزۋ كەزىندە ونىڭ جەكە دەرەكتەرى انىقتالدى. قازا بولعان سارباز قىزىلوردا وبلىسى ارال اۋدانىنان قىزىل اسكەر قاتارىنا شاقىرىلعان كەلىس جيەنباەۆ ەكەندىگى بەلگىلى بولدى.
قازاقستاندىق ساربازدىڭ سۇيەگىن تۋىستارىنا تاپسىرۋ جانە قايتا جەرلەۋ بويىنشا ودان ءارى دايىندىق جۇمىستارى رەسەي فەدەراتسياسىنداعى قازاقستان رەسپۋبليكاسى ەلشىلىگى جانىنداعى اسكەري اتتاشە اپپاراتى جانە قورعانىس مينيسترلىگىنىڭ قۇرىلىمدىق بولىمشەلەرىمەن بىرلەسە جۇزەگە اسىرىلدى. ساربازدىڭ تۋىستارىن ىزدەستىرۋ كەزىندە ماسكەۋ قالالىق ىزدەۋ ورتالىعىنىڭ كورسەتكەن كومەگى زور.
«انام ءاردايىم اكەسىنىڭ سۇيەگى تابىلىپ, تۋعان جەرىندە جەرلەنگەنىن ارماندايتىن. وكىنىشكە قاراي, ءبىر جىل بۇرىن وسى كۇندى كورمەستەن دۇنيەدەن وزدى. ال بۇگىن مارقۇم انامنىڭ ارمانى ورىندالدى. ءبىز بۇل ءۇشىن وتە قۋانىشتىمىز جانە ريزامىز», دەپ قايتىس بولعان ساربازدىڭ نەمەرەسى مۇحتار قازبەكوۆ اسكەري قىزمەتشىلەر مەن ىزدەستىرۋ توبىنا العىسىن ءبىلدىردى.
