اگروونەركاسىپ كەشەنىندەگى جالپى ءونىمنىڭ جارتىسىنان كوبىن قوسالقى ءۇي شارۋاشىلىقتارى بەرەتىنى بارشاعا ءمالىم. الايدا سوڭعى جيىرما جىل ىشىندە اۋىل شارۋاشىلىعىنا قوماقتى قاراجات بولىنگەنىمەن اۋىل تۇرعىندارىنىڭ جاعدايى ءالى دە مۇشكىل. وسىعان وراي بيىل كوكتەمدە پرەزيدەنتتىڭ باستاماسىمەن «ەگىستەن سورەگە دەيىن» قاناتقاقتى باعدارلاماسى ىسكە قوسىلعان ەدى. بىراق ەلىمىزدىڭ وڭتۇستىگىندەگى ءۇش ايماققا بەرىلگەن ميللياردتار ماقساتسىز جۇمسالعان سياقتى. سەبەبى قاناتقاقتى جوبا ارقىلى قايتا وڭدەۋ مەكەمەلەرىنىڭ توڭىرەگىندە شيكىزات جيناۋعا تارتىلعانداردىڭ اراسىندا ءۇي شارۋاشىلىقتارى ساۋساقپەن سانارلىق. باسىم كوپشىلىگى, ادەتتەگىدەي شارۋا قوجالىقتارى بولىپ شىقتى. ءونىم بار, وزگەرىس جوق...
وسى جولى وڭىردەگى باسشىلاردىڭ تىڭ باستامانى ەسكى قالىپقا كەلتىرە سالعانىن پرەزيدەنتىمىز جاقسى اڭعارعان سياقتى. ءوز جولداۋىندا كووپەراتسيا تاقىرىبىن تىلگە تيەك ەتكەنى دە سودان دەپ ويلايمىن. ياعني الداعى ۋاقىتتا اۋىل تۇرعىندارىنىڭ الەۋمەتتىك جاعدايىن كوتەرۋگە باعىتتالعان كووپەراتيۆتەردى قۇرۋ مەن دامىتۋ ماسەلەلەرى ەندى جوعارى دەڭگەيدە قاداعالاناتىن بولادى دەگەن ءسوز.
بىلتىر كووپەراتيۆ قۇرۋ بويىنشا ۇسىنىسىمىز اۋىل شارۋاشىلىعى مينيسترلىگىنىڭ قولداۋىن تاپپاعاننان كەيىن «سامۇرىق-قازىنا» ءال-اۋقات قورىنا جۇگىنگەن ەدىك. اۋىلى سالامىزدان اۋلاق جاتسا دا ونداعىلار ءبىزدى بىردەن تۇسىنە كەتتى. قۇزىرەتى مول مينيسترلىكتىڭ «انە-مىنە» دەگەنىنەن سامۇرىقشىلار دا جالىققان بولار, ايتەۋىر وتە جەڭىل تارتىپپەن سۇراعان قاراجاتتى لەزدە تاۋىپ بەرىپ, تەك قانا ءۇي شارۋاشىلىعىنان قۇرالعان, مودەلى قاجەتتىلىككە ساي جاڭا كووپەراتيۆ ۇيىمداستىرۋعا مۇرىندىق بولدى.
ءبىر جىل ىشىندە اقمولا وبلىسى اقكول اۋدانىندا ءبىز قۇرعان «ازات ەت» كووپەراتيۆى ءوز تيىمدىلىگىن دالەلدەپ شىقتى. ونداعى اۋىل تۇرعىندارى كىرىس كولەمىن 35-40 پايىزعا دەيىن ۇلعايتتى. كووپەراتيۆىمىزدىڭ تۇتىنۋشىلارى اۋىل ىشىندە مال ماشاقاتىنان اجىراپ, بوس ۋاقىتتارىن قوسىمشا كىرىس كوزىن اشۋعا باعىتتادى. اۋىل تۇرعىندارىنىڭ الەۋمەتتىك جاعدايىن جاقسارتۋ دەگەن وسى ەمەس پە؟
ازات, قارابۇلاق جانە اقكولدىڭ باسقا دا ەلدى مەكەندەرىنىڭ تۇرعىندارى قىسقى مەرزىمگە قاجەت جەم-ءشوپتى, دالا كەزىپ ىزدەمەيدى. قولدا بار مالىن تەحنولوگياعا ساي بورداقىلاپ, سول كووپەراتيۆ ارقىلى جاقسى باعاعا وتكىزىپ ءجۇر. الداعى ۋاقىتتا ولارعا قوسىمشا ۇرعاشى مال الىپ بەرىپ, ءسۇتتى باعىتتاعى سيىرلارىن دا, ودان ارى قوي مەن جىلقىلارىن باعىپ-قاعىپ بەرۋدى جوسپارلاپ وتىرمىز. وكىنىشتىسى, اۋىل شارۋاشىلىعى مينيسترلىگى تاراپىنان قولداۋ جوق. ۇكىمەت وتىرىسىندا «سامۇرىق-قازىنا» باسشىسى احمەتجان ەسىموۆ وسى جوبا تۋرالى ايتقان ەدى. الايدا قىزىعۋشىلىق تانىتىپ, ايرانداي ۇيىپ وتىرعان اۋىلىمىزعا ات باسىن تىرەگەن بىردە-ءبىر شەنەۋنىك جوق. اقىرى سۋبسيديا بويىنشا دا, سالىق بويىنشا دا تۋىنداعان ماسەلەلەرىمىز وڭ شەشىمىن تاپپادى.
شىنىن ايتسام, ءبىز پايدالانعان مودەلدىڭ نەگىزىندە كووپەراتيۆ قۇرۋعا ءبىر «قازاگرو»-نىڭ شاماسى جەتەر ەدى. «قازاگروقارجى» اكتسيونەرلىك قوعامى ءار اۋىلدىڭ ماڭىنان جەر الىپ, وندا زاماناۋي تەحنولوگياعا ساي جاڭا وبەكتىلەر سالىپ, حالىقتىڭ قولىنداعى مالدى بىرىكتىرىپ, نارىقتىق نەگىزدە كووپەراتيۆ قۇرىپ, سول نىساندى ليزينگ نەگىزىندە ۇزاق مەرزىمگە بەرسە دە بولاتىن ەدى. اتتەڭ, باتىل شەشىم قابىلدايتىن جىگەرلى ازاماتتار جوق. سوندىقتان پرەزيدەنتتىڭ «قازاگرونى» «بايتەرەككە» قوسۋدى ۇسىنۋى وتە ورىندى.
پروبلەمانىڭ تۇپقازىعى كووپەراتيۆتەردى قۇرۋ بويىنشا كوزقاراستىڭ ءارتۇرلى بولۋىندا. مىسالى, مينيسترلىك تەك فەرمەرلەردىڭ ءوزارا بىرىگۋىن قاراستىرۋدا. وبلىس اكىمدىكتەرى بولسا, باياعىدان قالىپتاسىپ قويعان ەكونوميكالىق قاتىناستاردى قاعاز جۇزىندە ارلەپ, كووپەراتيۆ قۇردىق دەپ شاتاسىپ ءجۇر. ال جاڭا اسسوتسياتسيالار تۇتىنۋشىلارىنا جىلىنا ءبىر رەت قانا قىزمەت كورسەتىپ, اۋىز تولتىرىپ ولاردى كووپەراتيۆ دەپ اتايدى. قىسقاسى, كووپەراتيۆتەردىڭ ءۇي شارۋاشىلىقتارىنا جىل ون ەكى اي قىزمەت كورسەتۋ كەرەك ەكەندىگىن ءتۇسىنىپ جۇرگەندەر كەمدە-كەم.
وسى ماسەلەگە نازار اۋدارعان پرەزيدەنت توقاەۆقا العىسىم شەكسىز. سەڭ قوزعالدى...
اناس احات ۇلى,
«كووپەراتيۆ قۇرۋ ارقىلى اۋىل تۇرعىندارىنىڭ الەۋمەتتىك جاعدايىن جاقسارتۋ» جوباسىنىڭ جەتەكشىسى
