بۇگىن نۇر-سۇلتان قالاسىنىڭ جيىن پۋنكتىندە كۇزگى اسكەرگە شاقىرۋ ناۋقانى باستالدى.
وسى كۇزدە نۇر-سۇلتان قالاسىنىڭ 800-دەن استام شاقىرۋ جاسىنداعى ازاماتتارى قارۋلى كۇشتەردىڭ, ۇلتتىق قاۋىپسىزدىك كوميتەتىنىڭ شەكارا قىزمەتى جانە ۇلتتىق ۇلان اسكەري بولىمدەرى قاتارىنا وتان الدىنداعى بورىشىن وتەۋگە اتتانادى.
"كۇزگى اسكەرگە شاقىرۋ ناۋقانى قىركۇيەك ايىنان باستاپ جەلتوقسان ايىنىڭ اياعىنا دەيىن جۇرگىزىلەدى. جاس ساربازداردىڭ العاشقى لەگىن كەلەسى اپتادان باستاپ اسكەري بولىمدەرگە جىبەرەمىز. قارۋلى كۇشتەرىمىز وزىق تەحنولوگيا جانە زاماناۋي تەحنيكامەن كەڭىنەن جابدىقتالۋدا. سول سەبەپتى اسكەر قاتارىن جاس ساربازدارمەن تولىقتىرۋدى ساپالى جۇرگىزۋگە اسا كوڭىل بولۋدەمىز", – دەدى نۇر-سۇلتان قالاسى قورعانىس ىستەرى جونىندەگى دەپارتامەنتىنىڭ شتاب باستىعى, پولكوۆنيك ايدىن ساعىنبەكوۆ.
ونىڭ ايتۋىنشا, اسكەرگە شاقىرۋ كەزىندە سانيتارلىق-گيگيەنالىق تالاپتارعا ەرەكشە نازار اۋدارىلۋدا.
"شاقىرىلۋشىلاردىڭ دارىگەرلىك كوميسسيا ءوتۋى جانە اسكەري كوماندالاردى جاساقتاۋ كەزىندە پاندەميانىڭ الدىن الۋ شارالارىنىڭ بارلىعى قاتاڭ قولدانىلىپ, الەۋمەتتىك قاشىقتىق ساقتالاتىن بولادى. ساقتانۋ شارالارى كوكتەمگى اسكەرگە شاقىرۋ ناۋقانى كەزىندە دە ىسكە اسىرىلعان, تاجىريبەمىز بار", – دەدى ايدىن ساعىنبەكوۆ.
اسكەرگە شاقىرۋ دارىگەرلىك كوميسسياسىنىڭ ساراپتاماسىنان 18 بەن 27 جاس ارالىعىنداعى جالپى سانى 9 مىڭ ەر ازاماتتى وتكىزۋ جوسپارلانىپ وتىر.
