كوللاجدى جاساعان قونىسباي شەجىمباي, EQ
ماسەلەن, وبلىستىق ءماسليحاتتىڭ دەپۋتاتى ءادىل جۇبانوۆتىڭ دەمەۋشىلىگىمەن جەرگىلىكتى اتقارۋشى ورگاندارعا 2 ملن 300 مىڭ تەڭگەنىڭ 10 تەپلوۆيزورى الىندى. سونداي-اق يساتاي, ماحامبەت اۋداندارىنداعى از قامتىلعان, كوپبالالى 90 وتباسىنا ازىق-ت ۇلىك سەبەتىن الىپ بەردى. ال اتىراۋ قالالىق ءماسليحاتىنىڭ دەپۋتاتى الىبەك سەمعاليەۆ جەكە يەلىگىندەگى 62 ورىندىق «پەكين» قوناقۇيىن مەديتسينا قىزمەتكەرلەرىنە ۇسىندى. ءسويتىپ, وندا دارىگەرلەر مەن ورتا بۋىنداعى قىزمەتكەرلەر جۇمىستان كەيىنگى دەمالىسىن وتكىزدى.
كارانتيندىك شەكتەۋلەر از قامتىلعان, كوپبالالى وتباسىلار ءۇشىن وڭايعا سوقپادى. وسىعان بايلانىستى وبلىستىق ءماسليحاتتىڭ دەپۋتاتتارى گۇلنار سادۋاحاسوۆا, سابىرجان سۇلتانوۆ, ايبەك عابدۋللين, سەرىك يدرانوۆ بىرنەشە وتباسىنا ازىق-ت ۇلىك سەبەتىن الىپ بەرىپ, يگىلىكتى ىسكە ءوز ۇلەستەرىن قوستى. تاعى ءبىر دەپۋتات م.بازارباي جەرگىلىكتى كاسىپكەرلەردى ۇيىمداستىرىپ, دەمەۋشىلەر ەسەبىنەن قۇلسارى قالاسىندا كۇندەلىكتى دەزينفەكتسيالىق جۇمىستار جۇرگىزۋدى قولعا الدى. ال ە.ساپاروۆ وڭىرلىك تۇراقتاندىرۋ قورىنا الەۋمەتتىك ماڭىزدى ازىق-ت ۇلىك ونىمدەرىن جەتكىزۋگە دەمەۋشىلىك جاسادى. ءسويتىپ, ول 400 تونناعا جۋىق جوعارى سۇرىپتى بيداي ۇنىن جەتكىزىپ بەردى.
قاۋىپتى ىندەت ورشىگەن ساتتە اۋرۋحانالاردا جاساندى تىنىستاندىرۋ اپپاراتتارى جەتىسپەيتىنى بايقالدى. وسىنداي قيىن ساتتە وبلىستىق ءماسليحاتتىڭ ءبىر توپ دەپۋتاتى قالتاسىنان قارجى شىعارىپ, تۇركيادان اتالعان اپپاراتتىڭ بىرنەشەۋىن الدىرۋعا باستاما كوتەردى. وبلىستىق ءماسليحات دەپۋتاتتارىنىڭ بۇل ۇسىنىسىنا ءماجىلىس دەپۋتاتى باقتىقوجا ىزمۇحامبەتوۆ پەن سەنات دەپۋتاتى عۇمار دۇيسەمباەۆ قولداۋ ءبىلدىردى. وسىلايشا, دەپۋتاتتاردىڭ دەمەۋىمەن 15 دانا جاساندى تىنىستاندىرۋ اپپاراتى ساتىپ الىنىپ, اۋداندىق اۋرۋحانالارعا شۇعىل تۇردە جەتكىزىلدى. تۇرعىندار تەڭىزگە قۇيعان تامشىداي بولسا دا, دەپۋتاتتاردىڭ حالىقتىڭ دەرتتەن ايىعۋىنا ۇلەس قوسقانىنا قۋانىشتى.
قاۋىپتى ىندەت دەندەگەن كەزدە ازىق-ت ۇلىك پەن ءدارى-دارمەك باعالارىنىڭ ءجونسىز ءوسۋى تۇرعىنداردىڭ رەنىشىن تۋعىزعانى داۋسىز. وسىعان وراي وبلىستىق, قالالىق, اۋداندىق ءماسليحات دەپۋتاتتارىنان قۇرىلعان پارتيالىق باقىلاۋ كوميسسياسى ازىق-ت ۇلىك ونىمدەرى مەن ءدارى-دارمەكتىڭ باعاسىنا قاتاڭ باقىلاۋ جۇرگىزىپ كەلەدى. سونداي-اق «جۇمىسپەن قامتۋ-2020» جول كارتاسىنىڭ وبلىس كولەمىندە جۇزەگە اسۋىن, وسى باعدارلاما اياسىندا جەرگىلىكتى تۇرعىنداردىڭ جۇمىسقا ورنالاسۋىن باقىلاۋعا الىپ وتىر. وڭىردە ىسكە اسىرىلاتىن ينفراقۇرىلىمدىق جوبالارداعى ۆاكانتتىق جۇمىس ورىندارى جۇمىسسىزدارعا ۇسىنىلىپ, جۇمىسپەن قامتۋ شارالارى قولعا الىندى.
قاۋىپتى ىندەتتى جەڭۋدىڭ باستى شارتى – كارانتيندىك رەجىمدى قاتاڭ ۇستانۋ. مۇنىڭ دۇرىستىعىن الەمدىك تاجىريبە انىق كورسەتىپ وتىر. الايدا حالىقتىڭ ءالى دە وتباسىلىق جيىنداردان باس تارتپايتىنى بايقالادى. سول سەبەپتەن, اتقارۋشى ورگاندارمەن بىرلەسە حالىقتىق باقىلاۋ جۇرگىزۋدىڭ تيىمدىلىگى زور. دەگەنمەن ءار ازاماتتىڭ سانالىلىعى, جوعارى جاۋاپكەرشىلىگى, ءتىپتى ساۋاتى مەن مادەنيەت دەڭگەيى شەشۋشى ءرول اتقاراتىنى ءسوزسىز.
سونىمەن بىرگە ەمدەۋ شارالارىن ۇيىمداستىرۋدا كەمشىلىكتەر بايقالىپ وتىر. وبلىستىق ماسليحاتقا تۇسكەن حاتتاردى سارالاساق, جەرگىلىكتى جەردە ارنايى ستاتسيونارلار اشۋ, مەديتسينا ماماندارىمەن, ناۋقاستاردى ءدارى-دارمەك, جاساندى تىنىستاندىرۋ, رەنتگەن قۇرىلعىلارىمەن قامتۋداعى كەمشىلىكتەر ايتىلعان. بۇل – بارلىق اۋدانعا ءتان ماسەلە. ويتكەنى وڭىردە ماۋسىمنىڭ سوڭىندا قاۋىپتى ىندەت كۇرت ءوسىپ, مەديتسينا سالاسىنىڭ دايىندىعى جەتكىلىكسىز ەكەنىن كورسەتتى. مۇنىڭ ءبىر سەبەبىن وتاندىق مەديتسينادا ىندەتكە قارسى جۇمىس تاجىريبەسى بولماۋىمەن بايلانىستىرعان ءجون شىعار. وسىعان وراي بۇدان بۇرىن اسا قاۋىپتى جۇقپالى جانە كارانتيندىك اۋرۋلارعا قارسى اتقارىلعان جۇمىستار تاجىريبەسىن قايتا جانداندىرۋ قاجەت.
جاقىنىمىزعا جاناشىر بولۋ ءۇشىن ىندەتتىڭ كەڭ تارالۋ سەبەبىن جان-جاقتى زەردەلەپ, كەمشىلىكتەن قورىتىندى شىعارۋ, دەنساۋلىق ساقتاۋ سالاسىن ەپيدەمياعا تىڭعىلىقتى دايىنداۋ – باستى مىندەتىمىز.
ومىرزاق زينۋللين,
اتىراۋ وبلىستىق ءماسليحاتىنىڭ حاتشىسى
