اشىق الاڭقايداعى جاتتىعۋ زالى اتشاپتىرىم اۋماقتى الىپ جاتىر. قاۋىپتى ىندەتتىڭ تارالماۋى ءۇشىن ءتيىستى شارالار بارىنشا قولعا الىنعان. مۇندا كاسىبي سپورتشىلارمەن قاتار اۋەسقوي ازاماتتار دا جاتتىعۋ جاساي الادى. بەس ءجۇز ادامعا لايىقتالعان ماۋسىمدىق كەشەن دەمەۋشىلەردىڭ كومەگىمەن سالىنىپ وتىر. دەسە دە پاندەميا جاعدايىنا بايلانىستى كەلۋشىلەر شاعىن توپتارعا بولىنگەن. جاتتىعۋ الاڭىنىڭ جۇمىسىمەن تانىسۋعا كەلگەن قالا اكىمى تاياۋ كۇندەرى اتالعان اۋداندا ءدال وسىنداي ءۇش ورتالىق ىسكە قوسىلاتىنىن مالىمدەدى.
– باستى مىندەت – وسكەلەڭ ۇرپاقتى سپورتپەن, شىعارماشىلىقپەن جاپپاي قامتۋ, ءوزىن-ءوزى تاربيەلەۋ مەن دامىتۋ داعدىلارىن قالىپتاستىرۋ. قىركۇيەك ايىندا تاعى ءۇش جاتتىعۋ ورتالىعى قۇلاگەر, كوكمايسا جانە كوكجيەك شاعىن اۋداندارىندا اشىلاتىن بولادى. سونىمەن قاتار اۋداننىڭ بەس شاعىن ۋچاسكەسىندە بالالارعا ارنالعان JetisyFootball تەگىن وقىتۋ باعدارلاماسى جۇمىسىن باستايدى. ول قيىن جاعدايدا قالعان جانۇيالاردان شىققان 300 بالانى قامتىماق. ال جاتتىقتىرۋشىلار قالالىق جۇمىسپەن قامتۋ ورتالىعى ارقىلى تارتىلدى, – دەيدى الماتى قالاسىنىڭ اكىمى باقىتجان ساعىنتاەۆ.
جاۋاپتى ماماندار جەتىسۋ اۋدانىنىڭ اينابۇلاق-2, قۇلاگەر جانە كەمەل شاعىن اۋداندارىندا دەنەشىنىقتىرۋ-ساۋىقتىرۋ كەشەندەرىنىڭ قۇرىلىسىنا قۇجاتتاما ازىرلەنىپ جاتقانىن ايتتى. نىسانداردى بوس جەرلەرگە سالۋ جوسپارلانۋدا.
الماتى
