تاۋەلسىزدىك – ەلىمىزدىڭ ەڭ باستى قۇندىلىقتارىنىڭ بىرەگەيى. سوندىقتان تاۋەلسىزدىگىمىزدى كۇننەن-كۇنگە نىعايتۋ, ۇلتتىق مۇددەنى كۇندەلىكتى قورعاۋ, انا ءتىلىمىزدى تيەسىلى تۇعىرىنا قوندىرۋ, جەتىلگەن ۇلتتىق وي-سانانى قالىپتاستىرۋ – ازاماتتارىمىزدىڭ اسىل پارىزى. وسى ماقساتتاعى كەزەك كۇتتىرمەس ءىس-شارالاردىڭ باستىسى – وتانىمىزدا شىنايى ءپاتريوتيزمدى قالىپتاستىرۋ جانە ونى جەتىلدىرۋ. اتالعان ماقساتتاردى جۇزەگە اسىرۋدىڭ نەگىزگى دە ءتۇيىندى قاعيداتتارى قازاقستان رەسپۋبليكاسىنىڭ كونستيتۋتسياسىندا تولىق قامتىلعان. تەك ولارعا ءجىتى ءمان بەرىپ, باسشىلىققا الىپ, تالاپتارىن ورىنداۋ كەرەك.
قازاقستان رەسپۋبليكاسىنىڭ كونستيتۋتسياسى تاۋەلسىز ەلىمىزدىڭ قۇقىقتىق اكتىلەرىنىڭ ىشىندە ەڭ جوعارعى ساناتتاعى نەگىزگى زاڭى بولىپ تابىلادى جانە رەسپۋبليكا اۋماعىندا ونىڭ پارمەندى كۇشى تىكەلەي قولدانىلادى. قوعامداعى قۇقىقتىق ءتارتىپ پەن زاڭدىلىقتىڭ ورنىعۋى – ەلىمىزدىڭ ازاماتتارى مەن مەملەكەتتىك ورگاندارىنىڭ اتا زاڭىمىزدىڭ نورمالارىن, تالاپتارىن قالتقىسىز ورىنداۋى – ەلىمىزدىڭ ودان ءارى باياندى دا ورلەپ جەتىلۋىنىڭ باستى شارتى. قازاقستان قوعامىنىڭ دامۋ پروتسەسى نەگىزى زاڭنىڭ قۋاتتى جاسامپازدىق الەۋەتىنەن باستاۋ الىپ جۇزەگە اسادى. بىراق ايتا كەتەر جايت, اتا زاڭ نورمالارىنىڭ قاعيداتتارى مەن تالاپتارى ءالى دە بولسا تولىعىمەن جۇزەگە اسىرىلمايدى. ويتكەنى قوعام مۇشەلەرىنىڭ بىرقاتارى ولاردى ءالى ءجىتى زەردەلەپ, تەرەڭ ۇعىنىپ, باسشىلىققا الماعان. وعان دالەل رەتىندە ءومىر مىسالدارى ءبىرشاما كەزىگەتىنى ايان.
تاۋەلسىزدىك, پاتريوتيزم مەن قۇقىقتىق ۇستانىم ەگەمەن قازاقستاننىڭ دامۋى مەن نىعايۋىنىڭ ماڭىزدى نەگىزدەرى. سوندىقتان قوعامىمىزدىڭ ءار مۇشەسىنىڭ بويىندا پاتريوتيزم سەزىمدەرىن قالىپتاستىرىپ, ونىڭ دەڭگەيىن كوتەرۋ قازىرگى جاعدايدا وتە وزەكتى ماسەلە بولىپ كەلەدى. ەلىمىزدىڭ يدەولوگياسىنىڭ باستى تۇتقاسى – تاۋەلسىز دامۋ جولىنان تايماي العا باسۋ بولىپ سانالادى. سوندىقتان نەگىزگى زاڭنىڭ قاعيداتتارىنىڭ ماڭىزىن ناسيحاتتاۋ ازاماتتاردىڭ وتانشىلدىق, پاتريوتيزم ۇستانىمدارىن قالىپتاستىرۋدا وتە ماڭىزدى. اتا زاڭىمىزدىڭ قۇقىقتىق نورمالارىن تەرەڭ ءبىلۋ, جەتە ءتۇسىنۋ قوعام مۇشەلەرىنىڭ وتانعا دەگەن سۇيىسپەنشىلىكتەرىن, ونى قورعاۋعا باعىتتالعان ازاماتتىق بورىشتارىن ارتتىرادى.
بىزگە پاتريوتيزم ۇعىمىنىڭ ءمانىن ايقىنداۋ ماڭىزدى. پاتريوتيزم – گرەكتىڭ «patris» سوزىنەن شىققان تۇسىنىك. اۋەلگى ماعىناسى «وتان, تۋعان جەر», قازىرگىسى – وتانعا دەگەن سۇيىسپەنشىلىك, تۋاعان جەرگە, حالقىڭا دەگەن ادالدىق. شىنايى پاتريوت ءاردايىم ەلگە شىنايى سۇيىسپەنشىلىك تانىتىپ, ونىڭ وتكەنىن, بۇگىنگىسىن, كەلەشەگىن زور ماقتانىش تۇتىپ, جان-جاقتى كوركەيىپ, گۇلدەنىپ دامۋىنا قاجىماس ادال ەڭبەگىن ارنايدى. پاتريوتتىق تالپىنىستىڭ باستى ماقساتى – ەلدىڭ تىنىشتىعىن, حالىقتىڭ ىنتىماعىن نىعايتۋ, قوعامدىق تاتۋلىق پەن ساياسي تۇراقتىلىقتى ورنىقتىرۋ, ۇلتتىق مۇددەنى قورعاۋ.
پاتريوتتىق ءىس-ارەكەتتەردىڭ قولدانىستاعى زاڭداردا قامتىلعان ەلەۋلى سيپاتتارىن اتاپ وتسەك, اتا زاڭىمىزدىڭ 36-بابىندا: «1. قازاقستان رەسپۋبليكاسىن قورعاۋ – ونىڭ ءاربىر ازاماتىنىڭ قاسيەتتى پارىزى جانە مىندەتى. 2. رەسپۋبليكا ازاماتتارى زاڭدا بەلگىلەنگەن ءتارتىپ پەن تۇرلەر بويىنشا اسكەري قىزمەت اتقارادى», دەلىنگەن. سوندىقتان وتاندى قورعاۋ قازاقستان ازاماتتارىنىڭ بىردەن-ءبىر قاسيەتتى بورىشى بولىپ سانالادى.
قازاقستاننىڭ نەگىزگى زاڭىنىڭ 37-بابىندا «قازاقستان رەسپۋبليكاسىنىڭ ازاماتتارى تاريحي جانە مادەني مۇرالاردىڭ ساقتالۋىنا قامقورلىق جاساۋعا, تاريح پەن مادەنيەت ەسكەرتكىشتەرىن قورعاۋعا مىندەتتى», دەپ اتاپ كورسەتىلگەن. وسىعان وراي قازاقستاندىقتار ءۇشىن تاريحي ەسكەرتكىشتەردى قورعاپ, ساقتاۋ جانە بولاشاق ۇرپاققا امانات ەتىپ قالدىرۋ ازاماتتىق پارىز بولىپ سانالادى.
اتا زاڭنىڭ 38-بابىندا «قازاقستان رەسپۋبليكاسىنىڭ ازاماتتارى تابيعاتتى ساقتاۋعا جانە تابيعات بايلىقتارىنا ۇقىپتى قاراۋعا مىندەتتى», دەلىنگەن. تابيعاتتى قورعاپ, ايالاپ, ونى كەلەشەك ۇرپاققا قالدىرۋ – وتانسۇيگىش پاتريوت جاننىڭ تاعى ءبىر قىرى.
نەگىزگى زاڭىمىزدىڭ 34-بابىندا ازاماتتاردىڭ بىردەن-ءبىر پاتريوتتىق ءىس-ارەكەتتەرىنىڭ جاعىمدى سيپاتى رەتىندە, ورىنداۋعا مىندەت مىناداي ماڭىزدى تالاپتار قامتىلعان: «1. اركىم قازاقستان رەسپۋبليكاسىنىڭ كونستيتۋتسياسىن جانە زاڭدارىن ساقتاۋعا, باسقا ادامداردىڭ قۇقىقتارىن, بوستاندىقتارىن, ابىرويى مەن قادىر-قاسيەتىن قۇرمەتتەۋگە مىندەتتى. 2. اركىم رەسپۋبليكانىڭ مەملەكەتتىك رامىزدەرىن قۇرمەتتەۋگە مىندەتتى».
قازاقستان رەسپۋبليكاسىنىڭ مەملەكەتتiك رامىزدەرى رەتىندە تانىلاتىن تۋى, ەلتاڭباسى جانە گيمنi كونستيتۋتسيالىق زاڭمەن ايقىندالعان. قازاقستان رەسپۋبليكاسىنىڭ مەملەكەتتىك رامىزدەرىن قۇرمەتتەۋگە ۇرپاقتى تياناقتى تۇردە تاربيەلەۋ, سونداي-اق ولاردىڭ ءمانى مەن ماڭىزىن تەرەڭ ءتۇسىندىرۋ وتانسۇيگىشتىكتى, قازاقستاندىق ءپاتريوتيزمدى قالىپتاستىراتىنى ءسوزسىز.
ناقىپبەك سادۋاقاستەگى,
زاڭگەر-پۋبليتسيست
