جاقىندا پارتيانىڭ ورتالىق اپپاراتىنىڭ ەرىكتىلەرى مەن بەلسەندىلەرى جۇرگىزگەن اۋىلدىق ايماقتارداعى مەديتسينالىق قىزمەتتەردىڭ ساپاسىنا جۇرگىزىلگەن مونيتورينگتىڭ قورىتىندىسىن شىعاردى. تالداۋ اۋىل تۇرعىندارىنىڭ كوپتەگەن ماسەلەلەرىن كورسەتتى. سونىڭ ىشىندە مەديتسينالىق پەرسونالدىڭ, فەلدشەرلىك پۋنكتتەردىڭ, ءدارىحانالاردىڭ, جەدەل جاردەم ماشينالارىنىڭ جەتىسپەۋشىلىگى بايقالدى. اۋىل دارىگەرلەرى كوروناۆيرۋستىق ينفەكتسيانى ەمدەۋدە اقپاراتتىڭ جوقتىعىنا شاعىمداندى. وسى مونيتورينگتەن كەيىن «اۋىل» پارتياسى اۋىلدىق فەلدشەرلەرگە ارنالعان ونلاين-وقىتۋ كۋرستارىن ۇيىمداستىرۋعا شەشىم قابىلدا-
دى.
ونلاين-كۋرستاردىڭ العاشقى ەفيرىن نۇر-سۇلتان قالاسىنىڭ دارىگەرلەرى, جوعارى ساناتتى نەۆرولوگ-ەپيلەپتولوگ دارىگەر, «استانا مەديتسينا ۋنيۆەرسيتەتى» كەاق, پسيحياتريا جانە ناركولوگيا كۋرسى بار نەۆرولوگيا كافەدراسىنىڭ دوتسەنتى التىناي مۇقاشقىزى مەن جوعارى ساناتتى نەۆرولوگ دارىگەر گۇلنازيا سادۋاقاسقىزى وتكىزدى. سپيكەرلەر وسى جازدا پروۆيزورلىق ورتالىقتاردا جۇمىس ىستەپ, ىندەت جۇقتىرعان ناۋقاستاردى ەمدەۋدە مول تاجىريبە جيناعان.
بەينەكونفەرەنتسياعا ەلىمىزدىڭ بارلىق ايماقتارىنىڭ اۋىلدىق ەلدى مەكەندەر دارىگەرلەرى قوسىلدى. سپيكەرلەر Covid-19 سيمپتومدارىن سۋىق ءتيۋدىڭ بەلگىلەرىنەن قالاي اجىراتۋعا بولاتىنى تۋرالى پراكتيكالىق كەڭەستەر بەردى. ەمدەۋ حاتتامالارى تۋرالى ايتىپ, ىندەتتەن كەيىنگى كەزەڭدە پاتسيەنتتەردى وڭالتۋعا توقتالدى. ولاردىڭ ايتۋىنشا, ەمدەۋدىڭ تولىق كۋرسىنان كەيىن پاتسيەنتتەردى 3-6 اي باقىلاۋدا ۇستاۋ كەرەك.
«بۇل پاتسيەنتتەردىڭ كوپشىلىگىندە اسقىنۋلاردىڭ بولۋىنا بايلانىستى. كوۆيدتىڭ جۇرەككە اسەرى كۇشتى. سوندىقتان قازىر ءبىز ينسۋلت پەن ينفاركتپەن اۋىراتىنداردى كوپتەپ كەزدەستىرەمىز», دەدى گ.سادۋاقاسقىزى.
«استانا مەديتسينا ۋنيۆەرسيتەتى» كەاق, پسيحياتريا جانە ناركولوگيا كۋرسى بار نەۆرولوگيا كافەدراسىنىڭ دوتسەنتى التىناي مۇقاشقىزى اتالعان ىندەتپەن ەكىنشى رەت اۋىرعان جاعدايلار بارىن العا تارتتى.
«COVID-19-بەن اۋىرعان پاتسيەنتتە انتيدەنەلەر پايدا بولعان سوڭ قايتالاپ اۋىرمايدى دەپ قاتەلەسۋگە بولمايدى. قازىردىڭ وزىندە ناۋقاستار ەكىنشى رەت اۋىرعان جاعدايلار بار. جاڭا تۋعان نەمەرەلەرىنەن جۇقتىرعان ەگدە جاستاعى ناۋقاستاردى كەزدەستىرەمىز, ولاردا اۋرۋ سيمپتومسىز وتەدى», دەپ ەسكەرتتى ا.ەلۋباەۆا ارىپتەستەرىنە.
بەينەكونفەرەنتسيا سوڭىندا سپيكەرلەر دارىگەرلەردى پاتسيەنتتەرىن سپورتپەن شۇعىلدانۋعا ىنتالاندىرۋعا, تىنىس الۋ جاتتىعۋلارىن جاساۋعا, جاقسى كوڭىل كۇيدە ءجۇرۋدى ۇمىتپاۋعا جانە دۇرىس تاماقتانۋعا كوپ كوڭىل بولۋگە شاقىردى.
