قوعام • 31 تامىز، 2020

باۋىرجان بايبەك "Nur Otan" پرايمەريزىنە تىركەۋدىڭ قورىتىندىسىن جاريالادى

"Nur Otan" پارتياسىنىڭ پرايمەريزىنە ۇمىتكەرلەردى تىركەۋ مەرزىمى اياقتالىپ، قورىتىندىسى جاريالاندى. بۇل تۋرالى "Nur Otan" پارتياسى توراعاسىنىڭ ءبىرىنشى ورىنباسارى باۋىرجان بايبەك Facebook جەلىسىندەگى پاراقشاسىندا جازدى، - دەپ حابارلايدى Egemen.kz.

Marzhan Tileubekova

"ەلباسى، پارتيا ليدەرى ن.ءا. نازارباەۆتىڭ تاپسىرماسى بويىنشا پارتياىشىلىك سايلاۋ تۇڭعىش رەت رەسپۋبليكالىق اۋقىمدا ءوتىپ جاتىر. ول – پارتيانى "قايتا جانداندىرۋ" مەن جاڭعىرتۋدىڭ قورىتىندى كەزەڭى بولىپ وتىر.
⠀
سونىمەن، 17 – 28 تامىز ارالىعىندا 10 990 ادام تىركەلدى. ولاردىڭ 36،9% - ايەلدەر، 29،6% – 35 جاسقا دەيىنگى جاستار. باستاۋىش پارتيا ۇيىمدارىنان 3090 ازامات ۇسىنىلسا، ال ءوزىن-ءوزى ۇسىنۋشىلار – 7900 ادام. قاتىسۋشىلاردىڭ ورتاشا جاسى – 43 جاس.
⠀
ءبىر ورىنعا ۇمىتكەرلەردىڭ ەڭ كوبى نۇر-سۇلتان قالاسىندا – 18. الماتى مەن شىمكەنتتە – 9-دان، جامبىل جانە تۇركىستان وبلىستارىندا – 6 ۇمىتكەردەن كەلەدى. شىعىس قازاقستان وبلىسىندا ايەلدەر جانە تۇركىستان وبلىسىندا جاستار ەرەكشە بەلسەندىلىك تانىتىپ وتىر.
⠀
7 قىركۇيەكتەن باستاپ پرايمەريزدىڭ كەلەسى كەزەڭى – ۇگىت باستالادى. 14 – 30 قىركۇيەك ارالىعىندا ونلاين رەجيمدە جاريا پىكىرسايىستار وتەدى.
⠀
ەلىمىزدىڭ پرەزيدەنتى ق.ك. توقاەۆتىڭ "حالىق ۇنىنە قۇلاق اساتىن مەملەكەت" تۇجىرىمداماسىنىڭ اياسىندا قىركۇيەكتىڭ باسىندا ءبىزدىڭ وڭىرلىك 216 سايلاۋالدى باعدارلامامىزدىڭ جوبالارى جاريالانادى. ولار حالىقپەن بىرگە تالقىلانعاننان كەيىن جەتىلدىرىلەتىن بولادى.
⠀
وسى ورايدى پايدالانا وتىرىپ، ءوز-وزىنە جانە پارتيامىزعا سەنىم ارتىپ، پرايمەريزگە ءوز كانديداتۋراسىن ۇسىنعان ءاربىر جانعا العىس ايتقىم كەلەدى. ءبىز ولاردىڭ ادال، اشىق جانە بارشا قاتىسۋشىلارعا بەرىلگەن تەڭ مۇمكىندىكتەرمەن باق سىناۋلارىنا بار جاعدايدى جاسايمىز.
⠀
پارتياىشىلىك ىرىكتەۋدىڭ جەڭىمپازدارى ءماجىلىس پەن بارلىق دەڭگەيدەگى ماسليحاتتارعا ارنالعان پارتيالىق تىزىمدەرىمىزگە ەنگىزىلەتىن بولادى. بۇل – 5،5 مىڭنان استام ادام. ال ىرىكتەۋدەن وتپەگەن، بىراق ەلەۋلى قولداۋعا يە بولعان ازاماتتار پارتيانىڭ جاڭا كادرلىق رەزەرۆىنە ەنەدى.
⠀
پارتيا ليدەرى نۇرسۇلتان نازارباەۆ ايتقانداي، "ەلىمىزدەگى ماسەلەلەردى بىرلەسىپ شەشۋ ءۇشىن اشىق ديالوگتى قامتاماسىز ەتۋ ماڭىزدى. پرايمەريز قاتىسۋشىلارى جەرگىلىكتى جەرلەردە وزەكتى ماسەلەلەردى اشىق كوتەرىپ، كەمشىلىكتەردى انىقتاپ، ناقتى شەشىمدەر ۇسىنۋى ءتيىس".
⠀
اشىق تا ءادىل كۇرەستە مىقتىلار توپ جارىپ شىقسىن! ەلىمىزدى ءبارىمىز بىرگە وركەندەتەمىز!" - دەپ جازدى باۋىرجان بايبەك.