رەسمي اقپاراتقا سۇيەنسەك, جەكسەنبى كۇنى گەرمانيا استاناسىندا كوروناۆيرۋسقا قاتىستى تىيىمدارعا قارسى ەكەنىن بىلدىرمەككە 38 مىڭ ازامات الاڭعا شىققان. نارازىلاردىڭ ءبىرى ء«بىز مىنا جەرگە ساقتىقتىڭ ماڭىزدى ەكەنىن ايتۋعا شىقتىق. الايدا كوروناۆيرۋس قاسىرەت بولسا دا, ءبىزدىڭ بوستاندىعىمىز شەكتەلمەۋى كەرەك», دەدى.
ۇكىمەت بىرنەشە اي بۇرىن جەڭىلدەتىلگەن كارانتين سالدارىنان قايتا ورشىگەن ۆيرۋستى توقتاتۋ ماقساتىندا قاتاڭ كارانتين جاريالاعان بولاتىن. بۇل ەۋروپالىقتاردىڭ نارازىلىعىن تۋدىردى. لوندوندا مىڭعا جۋىق حالىق كوشەگە شىعىپ «مەديتسينالىق تيرانياعا» نۇكتە قويۋدى تالاپ ەتتى.
300-گە جاقىن پاريج تۇرعىنى دا ۇكىمەتتىڭ جاڭا ەرەجەلەرىنە قارسىلىعىن ءبىلدىرىپ, قوعامدىق ورىنداردا مەديتسينالىق ماسكا تاعۋ تالابىن جويۋدى تالاپ ەتتى. «مەديتسينالىق شەكتەۋلەردەن شارشاعانىمىزدى ايتۋعا جينالدىق. ءبىز قالا تۇرعىنى رەتىندە ۇكىمەتكە بوستاندىعىمىزدىڭ شەكتەلگەنىن جەتكىزگىمىز كەلەدى», دەيدى جينالعاندار. «وتىرىكتى توقتاتىڭدار!» دەگەن پلاكاتتارمەن شىققان پاريجدىكتەردى قۇقىق قورعاۋ ورگاندارىنىڭ قىزمەتكەرلەرى قورشاپ, ماسكا تاقپاعانى ءۇشىن 135 ەۋرو كولەمىندە ايىپپۇل سالدى. شۆەيتسارياداعى تسيۋريح قالاسىندا دا مىڭعا جۋىق ادام نارازىلىق ءبىلدىردى.
ميتينگتەردىڭ نەگىزگى سەبەبى گەرمانيا كانتسلەرى انگەلا مەركەل كوروناۆيرۋسقا قارسى كۇرەستىڭ قاتاڭ شارالارىن جاريالاۋىمەن بايلانىستى. كانتسلەر مۇنداي شارا قولدانۋعا ەلدەگى ناۋقاستار سانىنىڭ كۇرت ءوسۋى ماجبۇرلەدى دەيدى. وسىعان وراي, جۇما كۇنى جاڭا ەرەجە قابىلداندى. ەندى كوشەدە مەديتسينالىق ماسكا تاقپاعان ازامات 50 ەۋرو كولەمىندە ايىپپۇل تولەۋى ءتيىس.
