وسىنداي اتپەن ەلوردادا تۇڭعىش رەت مۇمكىندىگى شەكتەۋلى جانداردىڭ رەسپۋبليكالىق كونكۋرسى ءوتتى
مۇمكىندىگى شەكتەۋلى جاندار اراسىندا وتكەن رەسپۋبليكالىق بايقاۋ ءتۇرلى نوميناتسيالار بويىنشا ءوربىدى. ايماقتىق ىرىكتەۋ كەزەڭدەرىمەن العاندا ءتورت ايعا جۋىق ۋاقىتتا كىل مىقتىنى انىقتاعان بۇل سىننىڭ نۇكتەسى استانادا قويىلدى. ءۇش كۇنگە سوزىلعان دۋماندى دودانىڭ جەڭىمپازدارى ەلورداداعى تاۋەلسىزدىك سارايىندا وتكەن گالا-كونتسەرتتە ماراپاتتالدى. اتالمىش شاراعا ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا كەلىپ, بايقاۋدا باعىن سىناعان بارشا جۇرتقا دەگەن العىسىن جەتكىزدى.
وسىنداي اتپەن ەلوردادا تۇڭعىش رەت مۇمكىندىگى شەكتەۋلى جانداردىڭ رەسپۋبليكالىق كونكۋرسى ءوتتى
مۇمكىندىگى شەكتەۋلى جاندار اراسىندا وتكەن رەسپۋبليكالىق بايقاۋ ءتۇرلى نوميناتسيالار بويىنشا ءوربىدى. ايماقتىق ىرىكتەۋ كەزەڭدەرىمەن العاندا ءتورت ايعا جۋىق ۋاقىتتا كىل مىقتىنى انىقتاعان بۇل سىننىڭ نۇكتەسى استانادا قويىلدى. ءۇش كۇنگە سوزىلعان دۋماندى دودانىڭ جەڭىمپازدارى ەلورداداعى تاۋەلسىزدىك سارايىندا وتكەن گالا-كونتسەرتتە ماراپاتتالدى. اتالمىش شاراعا ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا كەلىپ, بايقاۋدا باعىن سىناعان بارشا جۇرتقا دەگەن العىسىن جەتكىزدى.
بايقاۋدا بارىن سالىپ, قازىلار القاسىنىڭ وڭ باعاسىن العان جەڭىمپازدارعا كەلسەك, ولار – ون نوميناتسيا بويىنشا ۇزدىك دەپ تانىلعاندار. جەڭىمپازدار ءتۇرلى جاستار ارالىعىندا بولدى. «كاسىبىنىڭ ۇزدىگى» سايىسىندا باقىت بالعىمبەكوۆا (اقمولا وبلىسى), گۇلمەيرام سراجوۆا (اقتوبە وبلىسى) ۇزدىك دەپ تانىلسا, «ۇزدىك بي» نوميناتسياسىندا ساندۋعاش اقانوۆا مەن ەرلان نۇرماعامبەتوۆ (پاۆلودار وبلىسى), «يۋنوست» بي توبى (قوستاناي) جانە جانات جالعاس (اقتوبە وبلىسى) وزدەرىنە تەڭ كەلەر ءبيشى جوق ەكەندىكتەرىن دالەلدەدى. ال «اقىلدىلار» سىنىندا دينا سادۋاقاسوۆا (پاۆلودار وبلىسى), دامير سامارحانوۆ (شىعىس قازاقستان وبلىسى) وزدەرىن ەرەكشە قىرلارىنان تانىتسا, مەيرامگۇل عاليەۆا (باتىس قازاقستان وبلىسى) «ۇزدىك ستۋدەنت» اتاندى.
«ۇزدىك تۋىندى» فوتو كونكۋرسىندا الىبەك تولەگەنوۆ (شىعىس قازاقستان وبلىسى), نازىم بەكجۇنىسوۆا (الماتى وبلىسى), ەرلان سمەتوۆتىڭ (جامبىل وبلىسى) باعى جانسا, «التىن قالام» يەلەرى بولىپ, ولجاس بايدولدا ۇلى (الماتى وبلىسى), قۋانىش اۋعانباەۆ (جامبىل وبلىسى), نۇرمۇحاممەد ابىلقاسىم (قىزىلوردا وبلىسى) تانىلدى.
«ەڭ ۇلگىلى وتباسى» سىنى دا جيىلعان جۇرتتى قىزىقتىرماي قويمادى. مۇندا بىرىنەن ءبىرى وتكەن وتباسىلار ءوز شەبەرلىكتەرى مەن ۇلگىلى قاسيەتتەرىن كورسەتىپ باقتى. ناتيجەسىندە پاۆلودار وبلىسىنان كەلگەن كراسنوششەكو وتباسىنىڭ باعى جانىپ, ءبىرىنشى ورىندى يەلەندى.
«ۇزدىك الەۋمەتتىك جوبا» قورىتىندىسىندا ايگەرىم داۋلەتباەۆا (جامبىل وبلىسى) مەن ءاسيا احتانوۆا (الماتى قالاسى) دارا شىقسا, نۇرحان كوبەەۆ (اتىراۋ وبلىسى), اسەل قۇلجانوۆا (پاۆلودار وبلىسى) جانە مارات الياسقاروۆ (شىعىس قازاقستان وبلىسى) «ۇزدىك ورىنداۋشىلار» قاتارىنان كورىندى. ولاردىڭ كونتسەرتتە شىرقاعان اندەرى تىڭدارمانىن تامساندىرماي قويمايتىنداي ەدى.
سپورتتاعى جەتىستىكتەرىمەن كوزگە تۇسكەن ورەندەر دە بۇل كونكۋرستان سىرت قالعان جوق. سايىستا بارىن سالعان ساڭلاقتار ىشىنەن عابيت ەسجانوۆ (جامبىل وبلىسى) «ۇزدىك سپورتشى» نوميناتسياسىنىڭ جەڭىمپازى اتاندى.
مۇمكىندىگى شەكتەۋلى ازاماتتارعا ارنالعان اتالمىش كونكۋرستا جەڭىمپاز اتانعانداردىڭ بارلىعى دا 350 مىڭ تەڭگە كولەمىندە اقشالاي سىيلىقتارمەن ماراپاتتالسا, قالعان ءجۇلدەگەرلەر دە سىيلىقسىز قالمادى.
«ءبارىمىز بىردەيمىز – كەمسىتۋدى بىلمەيمىز» اتتى العاشقى رەسپۋبليكالىق سايىسى قوعام نازارىن مۇگەدەك جانداردىڭ ماسەلەلەرىنە اۋدارۋعا, سونىمەن بىرگە, ولارعا دەگەن قارىم-قاتىناس پەن قوعامعا دەگەن تۇسىنىكتى وزگەرتۋگە, مۇگەدەكتەردى قوعامنىڭ وزگە دە توپتارى سەكىلدى بارلىق مۇمكىندىكتەرىن جان-جاقتى تانىپ, مويىنداۋعا باعىتتالعان», – دەيدى شارانى ۇيىمداستىرۋشىلار.
رەسپۋبليكانىڭ ونەرلى دەگەن ۇل-قىزىن جيناپ وتكىزىلگەن العاشقى كونكۋرس جوعارى دەڭگەيدە ءوتتى. ەندى وسى يگى باستاما ءوز جالعاسىن تابا بەرسە ەكەن دەيمىز...
ءابدىراحمان قىدىربەك,
«ەگەمەن قازاقستان».
