– 2017 جىلى سۋردليمپيادا ويىندارىندا ەلىمىزدىڭ قۇراما كومانداسىندا قوستانايلىق سپورتشىلار دانيار ەسكەندىروۆ, قانات قوڭقاباەۆ جانە گايپ دانياروۆ ۇستەل تەننيسى بويىنشا كوماندالىق جارىستاردا قولا مەدال جەڭىپ الدى. ولار 2016 جىلعى الەم چەمپيوناتىندا جۇلدەلى ەكىنشى ورىنعا يە بولعان ەدى. قازاقستان رەسپۋبليكاسىنىڭ 2014 جىلعى 3 شىلدەدەگى № 228-V قر زاڭىنا سايكەس وليمپيادا چەمپيوندارى مەن جۇلدەگەرلەرىنە جەرگىلىكتى اكىمدىك تاراپىنان پاتەر بەرىلەدى. تيىسىنشە, چەمپيونعا ءۇش بولمەلى پاتەر, كۇمىس مەدالعا ەكى بولمەلى, قولا جۇلدە العان سپورتشىعا ءبىر بولمەلى پاتەر ۇسىنىلادى, - دەدى باسقارما باسشىسى.
دانيار ەسكەندىروۆ, قانات قوڭقاباەۆ جانە گايپ دانياروۆتارعا "يۋبيلەينىي" شاعىن اۋدانىنان ءبىر بولمەلى پاتەردىڭ كىلتى تابىس ەتىلدى. ولاردىڭ باپكەرى سەرىك دانياروۆقا وبلىس اكىمىنىڭ العىس حاتى بەرىلدى. سەرىك دانياروۆ 20 جىلدان استام ۋاقىت ەستۋ قابىلەتى بۇزىلعان بالالارعا ارنالعان قوستاناي مەكتەپ-ينتەرناتىندا جۇمىس ىستەيدى. بالالاردى ۇستەل تەننيسىنە باۋلىپ, حالىقارالىق جارىستارعا دەيىن شىعارعان.
باسپانالى بولعان سپورتشىلاردى وبلىس اكىمى ارحيمەد مۇحامبەتوۆ الەۋمەتتىك جەلى ارقىلى قۇتتىقتادى.
"سپورتشىلارىمىزدى جاڭا باسپانامەن قۇتتىقتايمىن! جاڭا پاتەرلەردە جايلىلىق, جىلۋلىق جانە سپورتتىق جەتىستىكتەر تىلەيمىن!" - دەپ جازدى وبلىس باسشىسى ينستاگرامداعى پاراقشاسىندا.
XXIII Cۋردليمپيادا ويىندارى تۇركيانىڭ سامسۋن قالاسىندا وتكەن بولاتىن. تورتجىلدىقتىڭ باستى ويىنىنا ەستۋ قابىلەتى ناشار ءۇش مىڭعا جۋىق سپورتشى قاتىسقان. ال قازاقستاننان 9 سپورت ءتۇرى بويىنشا 50-گە جۋىق سپورتشى بارعان ەدى. ولار ەركىن جانە گرەك-ريم كۇرەسى, سامبو, جەڭىل اتلەتيكا, ءجۇزۋ, تاەكۆوندو, ۇستەل تەننيسى جانە سپورتتىق باعدارلاما بويىنشا سىنعا تۇسكەن بولاتىن.
قوستاناي وبلىسى
