"قاشىقتان جۇمىسپەن قامتۋ – بۇل ءبىزدىڭ زور بولاشاعىمىز. بىرىنشىدەن, بۇل حالىق ءۇشىن بەلگىلى ءبىر ارتىقشىلىقتار جاسايدى, اتاپ ايتقاندا: ەركىن جۇمىس ىستەۋ رەجيمى, كيىم ىزدەۋدىڭ قاجەتسىزدىگى, وتباسىمەن قارىم-قاتىناس جاساۋعا ۋاقىتتىڭ مولدىعى جانە ت.س.س. ونىڭ ۇستىنە بولاشاقتا ادام جاسايتىن قيىن جۇمىستاردى ورىندايتىن تەحنولوگيالاردىڭ پايدا بولۋى دا ءسوزسىز, ال كەڭسەدەگى زياتكەرلىك جۇمىستاردى ورىندايتىن قىزمەتكەرلەر مىندەتتى تۇردە قاشىقتان جۇمىس جاساۋ رەجيمىنە اۋىسادى. الايدا تەحنولوگيالاردىڭ دامۋى, ءتورتىنشى ونەركاسىپتىك رەۆوليۋتسيا, تسيفرلاندىرۋعا كوشۋ بىلىكتى مامانداردىڭ ءرولىن جوعارىلاتۋدى قاجەت ەتەتىنىن ءتۇسىنۋ كەرەك", دەيدى گەورگي وستاپكوۆيچ, "ەكونوميكا جوعارى مەكتەبى" ۇلتتىق زەرتتەۋ ۋنيۆەرسيتەتىنىڭ ديرەكتورى.
بۇگىنگى تاڭدا مامانداردىڭ كوپشىلىگى جۇمىسىنان ايىرىلدى نەمەسە قاشىقتان جۇمىس ىستەۋگە كوشتى, ەرتەڭگى كۇنى جاعدايدىڭ قالاي وزگەرەتىنىن بولجاۋ قيىن. الايدا پاندەميا – ءسىزدىڭ ومىرگە دەگەن, تاڭداعان ماماندىعىڭىزعا دەگەن كوزقاراسىڭىزدى قايتا قاراستىرۋعا, بارلىق ۇيرەنگەن داعدىلارىڭىزدى ساراپتاپ شىعۋعا نەمەسە جاڭا تاجىريبە جيناقتاۋعا, ءسويتىپ كارانتيننىڭ سوڭىندا سۇرانىسقا يە ماماندىق بويىنشا قايتا دايارلانۋعا مۇمكىندىك بەرەتىن كەزەڭ.
ءوزىن-ءوزى وقشاۋلاۋ ۋاقىتىن قالاي ءتيىمدى پايدالانۋعا بولادى؟ مۇنىڭ ەڭ باستى شەشىمى – وزدىگىنەن ءبىلىم الۋ, ياعني جوعارى ءبىلىمى مەن ماماندىعى بار تۇلەكتەر ءۇشىن دە, كوللەدجدى بيىل بىتىرگەندەر ءۇشىن دە تاماشا شەشىم بولۋى مۇمكىن. قاشىقتىقتان جۇمىس ىستەيتىندەردىڭ كوپشىلىگىندە ءبىرشاما بوس ۋاقىت پايدا بولدى, ال جاڭا ءبىلىم بولاشاقتا كاسىبي جەتىستىككە جەتۋگە جانە مانساپتىق وسۋگە جاقسى كومەك بولاتىنى ءسوزسىز. ول ءۇشىن سىزگە بىرنەشە نۇسقالاردى قاراستىرۋ كەرەك: ينتەرنەتتەگى تالىمگەرلىك ونلاين-كۋرستارى, ۋنيۆەرسيتەتتە ونلاين رەجيمىندە وقۋ جانە قاشىقتىقتان وزدىگىنەن وقۋ.
پاندەمياعا بايلانىستى جۋىق ارادا ۋنيۆەرسيتەتتەردە كەز كەلگەن وقۋ قاشىقتىقتان باستالاتىنى بەلگىلى. ەگەر ءسىز كوللەدج بىتىرگەن بولساڭىز نەمەسە جوعارى ءبىلىمىڭىز بولا تۇرا, باسقا ماماندىق الۋدى ويلاپ جۇرسەڭىز, وندا باكالاۆر دارەجەسىنىڭ ورنىنا ەكىنشى جوعارى ءبىلىم الۋ وڭتايلى بولاتىنىن قاراستىرعانىڭىز ءجون, ەڭ باستىسى – بۇل قارجىلىق جاعىنان تيىمدىرەك.
ەكىنشى جوعارى ءبىلىم الۋ ارقىلى ءسىز, ءبىر جاعىنان, قاراجاتىڭىز بەن ۋاقىتىڭىزدى ۇنەمدەيسىز, ەكىنشى جاعىنان, قاشىقتىقتان ءبىلىم بەرۋدىڭ رەتتەلگەن جۇيەسى بويىنشا ساپالى ءبىلىم الاسىز. بىرنەشە جىلدان بەرى ەكىنشى جوعارى ءبىلىم الۋ نەگىزگى قىزمەتكە ەش كەدەرگى جاساماي, قاشىقتىقتان وقۋ فورماتىندا جۇرگىزىلىپ كەلە جاتقانىن ايتا كەتۋ كەرەك. سوندىقتان بۇل پروتسەسس وتە وڭتايلاندىرىلعان جانە دۇرىس جولعا قويىلعان, ياعني وقۋ باعدارلاماسىندا ەشقانداي كەمشىلىكتەر نەمەسە كاسىبي مۇعالىمدەر مەن باسقا رەسۋرستاردىڭ جەتىسپەۋشىلىگى بايقالمايدى. تريمەستر فورماتىندا 1,5 نەمەسە 2,5 جىلدىق وقۋ مەرزىمى ۋاقىتتى ەداۋىر ۇنەمدەۋگە مۇمكىندىك بەرەدى, ءسويتىپ وقۋ ۋاقىتىن قىسقارتۋعا جانە ونىڭ پروتسەسىن باسقارۋعا مۇمكىندىك بەرەدى.
"جۇمىس ىستەي وتىرىپ, ءبىلىم الۋ جانە العان ءبىلىمدى تاجىريبەدە قولدانۋ ارقىلى بىلىكتىلىكتى ارتتىرۋ وتە ىڭعايلى. قاشىقتىقتان وقۋ – وقيتىن پاندەرگە ارقاشان دا ەركىن تۇردە قول جەتكىزۋ, تاڭدالعان ماماندىق بويىنشا كارانتين كەزىندە بىلىكتىلىكتى ارتتىرۋ مۇمكىندىگى, ال ءتىپتى كەيبىرەۋلەر ءۇشىن – قارجىلىق مۇمكىندىكتەرىن جاقسارتۋ ماقساتىندا باسقا ماماندىقتى تاڭداۋ مۇمكىندىگى", دەپ ءتۇسىندىردى ەكىنشى جوعارى ءبىلىم الۋ بويىنشا ەكىنشى كۋرستا وقىپ جۇرگەن ستۋدەنت سەرىك وسپانوۆ.
