قازاقستان • 26 تامىز، 2020

تۇركىستاندا قايتىس بولعان ايەلدىڭ دەنەسى تاۋ جىراسىنان شىعارىلدى

تولەبي اۋدانىنىڭ تاۋىندا ىزدەستىرۋ-قۇتقارۋ وپەراتسياسى 3 كۇن دەگەندە اياقتالدى، دەپ حابارلايدى Egemen.kz

الدىڭعى اقپاراتتاردا حابارلاعانىمىزداي، دايىندىعى جوق تۋريستەر توبىنىڭ تاۋعا شىعۋى قايعىلى جاعدايعا اكەلدى. سايرام-وگەم ۇلتتىق تابيعي پاركىنىڭ اۋماعىندا قاسقاسۋ اۋىلىنان 30 شاقىرىم جەردە 5 ادامنان تۇراتىن توپ تەڭىز دەڭگەيىنەن 4236 مەتر بيىكتىكتە ورنالاسقان "سايرام" مۇزدىعىنا شىقتى. تاۋدا قار جاتقان، ودان دا جوعارى كوتەرىلۋ ءۇشىن تاعى 1 تاۋلىك قاجەت بولدى. ەشقانداي قۇرال-سايماندارمەن جابدىقتالماعان، تاجىريبەسىز جانە دايىن ەمەس توپتىڭ العا جىلجۋىنا مۇمكىن ەمەس ەدى. سوندىقتان ولار تومەن تۇسۋگە شەشىم قابىلدادى. ءتۇسۋ كۇردەلى ەمەستۇعىن، بىراق توپتىڭ دايىن ەمەس مۇشەلەرى ءبىر ساتتە قاتەلىك جىبەردى. اتاپ ايتقاندا، 1981 جىلى تۋعان ازاماتشانىڭ ابايسىزدا اياعى تايىپ، قۇلاپ كەتتى. وعان كومەكتەسۋ ارەكەتتەرى ءساتسىز اياقتالدى. ناتيجەسىندە، ايەل قاردىڭ ەرۋى سالدارىنان پايدا بولعان تاۋ شىڭىنداعى جارىقتاردىڭ بىرىنە قۇلاپ قايتىس بولدى.

اتالعان جايتقا قۇرامىندا 10 ادام بار شىمكەنت قالاسىنىڭ تجد جەدەل-قۇتقارۋ جاساعىنىڭ ەكى توبى قيىن جاعدايدا "سايرام" مۇزدىعىنىڭ باسىندا قايتىس بولعان 1981 جىلعى ازاماتشانىڭ دەنەسىن ىزدەستىرۋ جانە شىعارىپ الۋ جۇمىستارىن جۇرگىزدى. بۇل كۇردەلى وپەراتسياعا شىمكەنت قالاسىنىڭ الپينيزم، سپورتتىق تۋريزم جانە مۇزعا ورمەلەۋ فەدەراتسياسىنىڭ 6 ءالپينيسى تارتىلدى.

25 تامىز كۇنى ساعات 14.50-دە قۇتقارۋشىلار الپينيستەرمەن بىرگە قاردىڭ ەرۋ سالدارىنان پايدا بولعان مۇزدىقتىڭ جارىقتارىنا قۇلاپ، قايتىس بولعان ايەلدىڭ دەنەسىن تاۋىپ الدى. تابىلعان دەنەنى الۋ پروتسەسى وتە قيىنعا سوقتى. كەز كەلگەن ۋاقىتتا قار ەرىپ، جارىقشاقتى تولتىرۋى مۇمكىن ەدى. ونىڭ تەرەڭدىگى 10 مەتردەن اساتىنىن، ەنى 50 سم ەكەنىن اتاپ وتكەن ءجون. تار جارىقشاقتا 6 مەتر دەڭگەيدە تۇرىپ قالعان مارقۇمنىڭ دەنەسىن شىعارۋ ارنايى قۇرال-جابدىقتاردى قولدانا وتىرىپ جۇزەگە استى. قايتىس بولعان ازاماتشانىڭ دەنەسى تومەن ءتۇسىرىلىپ، پوليتسيا قىزمەتكەرلەرىنە تاپسىرىلدى. ال سول كۇنى زارداپ شەككەن 1978 جىلى تۋعان ەر ادامنىڭ جاعدايى بۇگىندە قاناعاتتانارلىق.

توتەنشە جاعداي دەپارتامەنتىنىڭ وكىلدەرى تاۋعا شىعار الدىندا، تاجىريبەلى جولسەرىكتى بىرگە الىپ جۇرۋلەرىن مىندەتتەيدى. توسىننان تۋىنداعان وقىس وقيعا كەزىندە ءبىلىم مەن ۇقىپتىلىق، جاۋاپكەرشىلىك ماڭىزدى ەكەنىن اتاپ وتەدى. ەڭ الدىمەن، جابدىققا، قۇرال-سايماندارعا، كيىم مەن اياق كيىمگە، بايلانىسقا نازار اۋدارىڭىز. تاۋعا جورىق جاساعان كەزدە ءوز باعدارىڭىزدى مىندەتتى تۇردە تىركەۋ، ناقتى كوورديناتتاردى ءبىلۋ قاجەت. ال قاۋىپسىزدىك ەرەجەلەرىنىڭ ساقتالۋى تاۋداعى جازاتايىم وقيعالاردى الدىن الادى.

قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ءۇشىن Telegram جەلىسىندە بىزگە جازىلىڭىز.