ساۋدا جانە ينتەگراتسيا ءمينيسترى باقىت سۇلتانوۆ ەكسپورتتىق اكسەلەراتسيا باعدارلاماسىنىڭ العاشقى وقىتۋ ۆەبينارىندا اتالعان كومپانيالاردىڭ اراسىندا ەكسپورت سالاسىنا جاڭادان كەلگەندەر دە بارلىعىن (2 كومپانيا ءوز ونىمدەرىن بۇرىن شەتەلگە ساتپاعان), سونداي-اق بۇرىن بىررەتتىك (ساناۋلى) جەتكىزۋدى جۇزەگە اسىرعان كومپانيالار دا بار ەكەنىن, ولار شەتەلدىك نارىقتاردا ۇزاق مەرزىمگە ورنالاسۋدى كوزدەيتىنىن جەتكىزدى.
بيىل اكسەلەراتسيا باعدارلاماسىنىڭ اياسىندا قىتايلىق ساتىپ الۋشىلارمەن ەكسپورتتىق كەلىسىمشارتتار جاساۋ ءۇشىن باستى نازاردى تاماق ونەركاسىبىنە اۋدارۋ تۋرالى شەشىم قابىلداندى.
«قىتاي سياقتى ءىرى نارىقتى يگەرۋ – ءبىزدىڭ باستى ماقساتتارىمىزدىڭ ءبىرى. قىتاي نارىعىنىڭ اۋقىمىنا قاراماستان, وعان قولجەتىمدىلىك دەڭگەيى شەكتەۋلى. بۇعان سەبەپ – ەكسپورتتىق پروتسەدۋرانىڭ ۇزاقتىعى (شامامەن 90 كۇن) جانە نارىقتىڭ ەرەكشەلىگى. شىعارىلعان ءونىم قانداي كەرەمەت جانە پايدالى بولسا دا, ءتيىستى جارناماسىز جانە وراماسىز ساتۋ قيىنعا تۇسەدى. اكسەلەراتوردىڭ مىندەتى – كاسىپورىنداردى باستاپقى كەزەڭدەردەن باستاپ ءوز ءوندىرىسىن سىرتقى نارىقتارعا باعىتتاۋعا ۇيرەتۋ. مىسالى, قىتايعا ەكسپورتتاۋعا نيەتتەنسەڭىز, الدىمەن قىتاي تەحنيكالىق رەگلامەنتتەرىنىڭ بارلىق تالاپتارى مەن ماركەتينگتىك ەرەكشەلىكتەرىنە سايكەس كەلەتىن ءونىمدى ءوندىرۋىڭىز كەرەك. اتالعان جانە باسقا دا ماسەلەلەردى ءبىز باعدارلامانى جۇزەگە اسىرۋ اياسىندا قاراستىراتىن بولامىز», دەدى ب.سۇلتانوۆ.
«QazTrade» ساۋدا ساياساتىن دامىتۋ ورتالىعىنىڭ باس ديرەكتورى ارمان ابەنوۆتىڭ ايتۋىنشا, وتاندىق ونىمدەر جوعارى ساپالى بولعاندىقتان سۇرانىسقا يە. دەگەنمەن بىرقاتار سەبەپتەرگە بايلانىستى قازاقستاندىق تاۋارلار قىتاي دۇكەندەرىنىڭ سورەلەرىنە جەتكىلىكتى تۇردە ۇسىنىلماعان. اكسەلەراتوردىڭ مىندەتى – وتاندىق ونىمدەردىڭ قىتاي نارىعىندا ۇزاق مەرزىمدى بولۋىن قامتاماسىز ەتۋ.
باعدارلامانىڭ ەكىنشى كەزەڭى اياسىندا (قىركۇيەك-قاراشا) QazTradە ساراپشىلارى Pricewaterhouse Coopers كومپانياسىنىڭ حالىقارالىق ساراپشىلارىمەن بىرلەسىپ ءاربىر قاتىسۋشى ءۇشىن ەگجەي-تەگجەيلى پروفيل جاسايدى. وندا ەكسپورتتاۋشى كومپانيانىڭ كۇشتى جانە ءالسىز جاقتارىنا تالداۋ جۇرگىزىلەدى, الەۋەت دەڭگەيى (ەكسپورتتىق نارىق ءۇشىن باسەكەلەستىك ەرەكشەلىكتەرى, ءونىم سيپاتتاماسى, قىتايعا ەكسپورتتىڭ دايىندىق دارەجەسى جانە ت.ب.) ايقىندالادى. سونداي-اق قاتىسۋشى كومپانيانىڭ ءپروفيلى شەت ەل نارىعىندا قازاقستاندىق ءونىم ءۇشىن تەحنيكالىق رەگلامەنت تالاپتارى سياقتى اقپاراتتى دا قامتيتىن بولادى. ماقساتتى نارىققا شىعۋدىڭ ودان ءارى قادامدارى بويىنشا ۇسىنىستار دا قاتىسۋشى كومپانيالاردىڭ پروفيلىندە كورسەتىلەتىن بولادى.
باعدارلامانىڭ سوڭعى كەزەڭدەرىنىڭ ءبىرى – ىرىكتەلگەن 35 كومپانيانىڭ شانحايداعى 3-ءشى دۇنيەجۇزىلىك CIIE-2020 يمپورتتىق كورمەسىنە قاتىسۋى. كورمە سوڭعى جىلدارى كاسىپورىندار اراسىندا مامىلەلەر جاساۋدىڭ نەگىزگى الەمدىك الاڭىنا اينالدى.
«QazTrade» ساۋدا ساياساتىن دامىتۋ ورتالىعىنىڭ باس ديرەكتورى ارمان ابەنوۆتىڭ ايتۋىنشا, باعدارلاماعا قاتىسۋعا ءوتىنىم بەرگەن, بىراق ىرىكتەۋدەن وتە الماعان كومپانيالار كەلەسى جىلدارى باعدارلاماعا قاتىسۋشىلاردىڭ رەزەرۆىن تولىقتىرادى. ياعني بىردە-ءبىر كاسىپورىن كومەكسىز قالمايدى – اعىمداعى جۇمىس شەڭبەرىندە بارلىق كومپانيالاردىڭ ەكسپورتتىق مۇمكىندىكتەرىن باعالاۋ جانە ولاردىڭ ونىمدەرىن شەتەلدىك نارىقتارعا جەتكىزۋگە ارنالعان كەلىسىمشارتتاردى ۇيىمداستىرۋ بويىنشا جۇمىس جۇرگىزىلەدى.
