ايماقتار • 25 تامىز، 2020

قازاقستان پرەزيدەنتى جازۋشى مارحابات بايعۇتتى قۇتتىقتادى

64 رەت كورسەتىلدى

مەملەكەت باسشىسى قاسىم-جومارت توقاەۆ حالىقارالىق الاش سىيلىعىنىڭ لاۋرەاتى مارحابات بايعۇتتى 75 جىلدىعىمەن قۇتتىقتادى. پرەزيدەنتتىڭ قۇتتىقتاۋىن تۇركىستان وبلىسى اكىمنىڭ ورىنباسارى ساكەن قالقامانوۆ تۇركىستاندا وتكەن «تۇركىلەر ءتورى تۇركىستان» ونلاين كونفەرەنتسياسىندا وقىپ بەردى، - دەپ حابارلايدى Egemen.kz.

«قۇرمەتتى مارحابات بايعۇت ۇلى!

ءسىز قازاق ادەبيەتىنىڭ دامۋى  مەن وركەندەۋى ءۇشىن ايانباي قىزمەت ەتىپ كەلە جاتقان قازاقتىڭ قابىرعالى جازۋشىلارىنىڭ ءبىرىسىز. ءسىزدىڭ قالامگەرلىك قارىمىڭىز بەن قايتالانباس شىعارمالارىڭىز قازاق حالقىنىڭ ۇلتتىق مىنەزى مەن بولمىسىن، الەۋمەتتىك جان تەبىرەنىسىن ءدال بەينەلەۋىمەن  ەرەكشە. «داۋىستىڭ ءتۇسى»، «سەرت پەن سەنىم» سياقتى پروزالىق جيناقتارىڭىزدى، الەم ادەبيەتىنەن جاساعان ءساتتى اۋدارمالارىڭىزدى كوپشىلىك جىلى قابىلداعانىن بىلەمىن.

75 جاسقا تولعان مەرەيلى مەرەكەڭىزبەن  ءسىزدى شىن جۇرەكتەن قۇتتىقتايمىن! ۇلتتىڭ رۋحانياتى ءۇشىن تالماي ەڭبەكتەنىپ، ءالى دە تالاي ولمەس تۋىندى جازارىڭىزعا سەنەمىن. وتباسىڭىزعا اماندىق، دەنىڭىزگە ساۋلىق تىلەيمىن» دەلىنگەن مەملەكەت باسشىسىنىڭ قۇتتىقتاۋىندا.

تۇركىستان وبلىستىق قوعامدىق دامۋ باسقارماسىنىڭ قولداۋىمەن، قازاقستان جۋرناليستەر وداعى جانە جازۋشىلار وداعىنىڭ تۇركىستان وبلىستىق فيليالدارىنىڭ بىرلەسە ۇيىمداستىرۋىمەن ءوتىپ جاتقان شاراعا ەلىمىزدىڭ تۇكپىر-تۇكپىرىنەن 300-دەن استام ادام ونلاين جۇيەسى ارقىلى قاتىستى.

تۇركىستان وڭىرىندەگى تاريحي ماڭىزى بار قاسيەتتى جەرلەردى ناسيحاتتاۋداعى ادەبي شىعارمالاردىڭ ءرولى، مۇمكىندىكتەرى مەن الەۋەتىن جان-جاقتى تالقىلاۋ، قاستەرلى قۇندىلىقتارىمىزدى كوپشىلىك اۋديتورياعا ادەبي، تاريحي جانە پۋبليتسيستيكالىق تۇرعىدا جەتكىزۋدىڭ تىڭ جولدارىن قاراستىرۋ تاقىرىبىندا ءوتىپ جاتقان كونفەرەنتسيا اياسىندا بيىل 75 جىلدىق مەرەيتويى اتالىپ ءوتىپ جاتقان جازۋشى، «الاش» سىيلىعىنىڭ يەگەرى مارحابات بايعۇتتىڭ «تۇركىلەر ءتورى تۇركىستان» كىتابىنىڭ تانىستىرىلىمى ءوتتى. ەلىمىزگە بەلگىلى عالىمدار، قالامگەرلەر، سەنات، ءماجىلىس، تۇركىستان وبلىستىق ءماسليحاتىنىڭ دەپۋتاتتارى، وبلىس اكىمىنىڭ ورىنباسارى ساكەن قالقامانوۆ، اۋدان، قالا اكىمدەرى، سونداي-اق، تۇركيا، ءازىربايجان، وزبەكستان ەلدەرىنىڭ جازۋشىلارى، ادەبيەتتانۋشىلارى قاتىسىپ، ءسوز سويلەگەن كونفەرەنتسيادا تۇركىستاننىڭ تاريحىنا، ونىڭ  ءمان-ماڭىزىنا قاتىستى قۇندى پىكىرلەر ايتىلدى.

قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ءۇشىن Telegram جەلىسىندە بىزگە جازىلىڭىز.

سوڭعى جاڭالىقتار

ۇقساس جاڭالىقتار