تالاي وتانداستى ورتامىزدان الىپ كەتكەن ىندەتتى ەڭسەرۋ جولىنداعى قات-قابات جۇمىستار باستاۋىنا ەلىن سۇيگەن جۇرەكتەر مەن قۋاتىن حالىق يگىلىگىنە جۇمساعان قۇرىش بىلەكتەر توعىستى. دارىگەرلەر مەن كاسىپكەرلەر, ەرىكتىلەردىڭ ەڭبەگىن ەل جوعارى باعالاۋدا, ال تاعدىردىڭ جازۋىمەن تەمىر توردىڭ ارعى بەتىندە تىرلىك ەتىپ جاتقانداردىڭ دا بۇل الاساپىران شاقتا قالىس قالماي, ەل دەنساۋلىعىن ساقتاۋعا ءوز ۇلەستەرىن قوسا العانى جان جادىراتادى.
ادەتتە سوتتالعاندارعا تىكسىنە قاراپ, ولار تۋرالى وڭايلىقپەن جىلى قابىلداي الماي قالاتىنىمىز راس, الايدا ءارتۇرلى جاعدايدا بوستاندىعىنان ايىرىلعان ولاردىڭ دا ەل باسىنا كۇن تۋعان قيىن شاقتا جاي قاراپ قالا المايتىنىن ۇعىندىق.
ءىىم قىلمىستىق اتقارۋ جۇيەسى كوميتەتى ماڭعىستاۋ وبلىسى بويىنشا دەپارتامەنتىنە قاراستى گم 172/6 تۇزەۋ مەكەمەسىندە شاعىن تسەح قۇرىلعان. پاندەمياعا دەيىن ارنايى كيىمدەر تىگىپ, جيھاز جاساۋمەن اينالىسقان تسەح كارانتين ەنگىزىلگەن اۋىر شاقتا جاعدايعا تەز بەيىمدەلىپ, وزگە وندىرىستەردى جاۋىپ, تەك دارىگەرلەرگە, وزگە دە سۇرانىس بەرگەندەرگە ارنالعان قورعانىش كيىمدەرىن, بەتپەردەلەردى تىگۋگە جۇمىلدىرىلدى. قولدان پىشىلگەن ساپاسى سانيتارلىق تالاپتارعا ساي قورعانىش كيىمدەرىن تىگۋمەن «راميت-اكتاۋ» جشس مەن «ەڭبەك-اتىراۋ» مەكەمەسىندەگى 32 جازاسىن وتەۋشى اينالىسىپ, از ۋاقىت ىشىندە 50 مىڭ بىررەتتىك قولدانىسقا جارامدى قورعانىش كيىمدەرىن, 60 مىڭ بەتپەردە تىگىپ, سونداي-اق 4 دەزينفەكتسيالىق توننەل دايىنداپ شىعاردى.
– جالپى, ۆيرۋستىق ينفەكتسيادان قورعانۋ كوستيۋمدەرىن قاۋىپسىزدىگى بارىنشا جوعارى تۇزەۋ مەكەمەسىندە جازاسىن وتەۋشىلەر ماڭعىستاۋ وڭىرىندە كارانتين رەجىمى جاريالانعانعا دەيىن تىگە باستاعان بولاتىن. 32 سوتتالۋشى جۇمىس كەستەسىنە ساي تاۋلىگىنە بىرنەشە كوستيۋم ءپىشىپ شىعارۋدا. ولار زاڭ جۇزىندە تۇراقتى قىزمەتكە تارتىلعان. ەڭبەگى ءۇشىن ايىنا 42 500 تەڭگە كولەمىندە جالاقى الادى دەگەن بولاتىن اتالعان مەكەمەنىڭ قىزمەتكەرى رومان تەلەنكوۆ. ونىڭ ايتۋىنشا, اقتاۋدا ءپىشىلىپ شىعارىلعان قورعانىش كيىمدەرى ءبىرىنشى كەزەكتە جەرگىلىكتى دەنساۋلىق ساقتاۋ مەكەمەلەرىنىڭ قىزمەتكەرلەرى ءۇشىن جەكە قورعانىش قۇرالى ەسەبىندە ساتىلعان جانە دارىگەرلەردەن بولەك قىزمەتكەرلەرىنىڭ قاۋىپسىزدىگىن ويلاعان باسقا دا مەكەمەلەر سۇرانىس بەرگەن. بىررەتتىك قورعانىش كيىمدەرىنىڭ نارىقتاعى قۇنى 1 500 تەڭگەگە باعالانعان.
«جاقسىنىڭ جاقسىلىعىن ايت – نۇرى تاسىسىن» دەگەندەي, ماڭعىستاۋ وبلىسىنىڭ اكىمى س.ترۇموۆ كارانتين كەزىندە ەل قاۋىپسىزدىگىن قامتاماسىز ەتۋگە, سول ارقىلى ىندەتتىڭ ودان ءارى تارالماۋىنا ءوز ۇلەستەرىن قوسقان سوتتالۋشىلاردى العىس حاتپەن ماراپاتتادى.
ايماق باسشىسى سوتتالعاندارعا قۇتتىقتاۋ لەبىزىندە كوروناۆيرۋسپەن كۇرەستىڭ بارلىق ەل ءۇشىن ماڭىزدى سىناق بولعانىن, باس بوستاندىعىنان ايىرىلعانداردىڭ دا قيىن كەزدە كۇرەستىڭ الدىڭعى شەبىندە جۇرگەندەرى ءۇشىن ارنايى قورعانىش كيىمدەرىن دايىنداپ ۇلكەن ۇلەستەرىن قوسقاندارىن اتاپ ءوتتى.
– سوتتالعاندار دا – قوعامنىڭ مۇشەسى, ەلىمىزدىڭ ازاماتى. سوندىقتان ولاردىڭ ەل ومىرىنە, وتانداستارىمىز تاپ بولعان قيىن جاعدايعا بەيجاي قاراي المايتىنى انىق. مىڭداعان كيىمدەر تىگىپ, قولجەتىمدى باعامەن ۇسىنعان ولاردىڭ ەڭبەگى جوعارى باعالاۋعا لايىق. ماڭعىستاۋ وبلىسىنىڭ اكىمى سەرىكباي وتەلگەن ۇلىنىڭ العىس حاتى جازاسىن وتەۋشىلەر ءۇشىن بەيبىت, ازاماتتىق ومىرگە دەگەن كوزقاراستارىنىڭ تۇزەلۋىنە, وڭ تاربيە ساپاسىن بويىنا ءسىڭىرىپ, ءوزىن ءوزى تۇزەۋىنە ءوز اسەرىن بەرمەك. سونىمەن قاتار سوت ورىندارى ولاردى مەرزىمىنەن بۇرىن بوساتۋ كەزىندە اتالعان العىس حاتتى نازارىنا الاتىن بولادى, دەيدى ءىىم قاج كوميتەتى ماڭعىستاۋ وبلىسى بويىنشا دەپارتامەنتى باستىعى ورىنباسارىنىڭ مىندەتىن اتقارۋشى ادىلەت پودپولكوۆنيگى, زاڭ عىلىمدارىنىڭ ماگيسترى قانات جارىلعاپوۆ.
ەڭبەكتەرى ەلەنىپ, ايماق باسشىسىنىڭ العىسىنا بولەنگەن جازاسىن وتەۋشىلەر ەل ءۇشىن ەڭبەك ەتۋگە مۇمكىندىك بەرگەن مەكەمە اكىمشىلىگىنە ريزاشىلىقتارىن جەتكىزدى. كەشە جازا باسقانىمەن, بۇگىن جۇرتىنا جاقسىلىق ەتكەن ولاردىڭ قۋانىشتى ساتتەرىنە قاراپ ەركىندىككە شىققان سوڭ دا تالاي جاقسىلىقتاردىڭ جارشىسى بولسا عوي دەگەن تىلەكتە بولدىق.
ماڭعىستاۋ وبلىسى
