اۋەلدە بۇل بوكس كەشى شىلدە ايىندا ءوتۋى كەرەك ەدى, الايدا ەلدە كارانتين شەكتەۋلەرى ەنگىزىلگەن سوڭ ۇيىمداستىرۋشىلار جەكپە-جەك ۋاقىتىن 23 تامىزعا شەگەردى. «متك Global Kazakhstan» مەنەدجەرلىك كومپانياسىنىڭ سول شىلدە ايىندا شارشى الاڭعا ۇيىمنىڭ قازاقستاندىق بوكسشىلارى ءوز وتانداستارىمەن جەكپە-جەك وتكىزەتىنىن جاريالاعاندا, بوكس جانكۇيەرلەرى الەۋمەتتىك جەلىلەردە «قالايشا قازاق پەن قازاقتى رينگكە شىعارىپ وتىرسىڭدار؟», «جاقىن شەتەلدىڭ بوكسشىلارىن نەگە اكەلمەدىڭدەر, باسقا قارسىلاس قۇرىپ قالدى ما؟», دەپ ءبىراز سىن تەزىنە العان ەدى. بىراق ۇيىمداستىرۋشىلار تاراپىنان كەرى جاۋاپ بولمادى. دەسە دە, بۇعان الىستان جاۋاپ ىزدەۋدىڭ دە قاجەتى جوق. ويتكەنى قازىرگى پاندەميا جاعدايىندا شەتەلدەن بوكسشى شاقىرتۋ وتە قيىن. ەكىنشى جاعىنان, جول شىعىنى, جەكپە-جەك گونورارى بار. ودان دا شەتەلدىك بوكسشىعا كەتەتىن ازىن-اۋلاق قارجىنى قازاق بوكسشىلارىنا بەرەيىك دەگەن وي بولعان شىعار. سوندىقتان بوكس كەشىندە تەك قازاق بوكسشىلارى جۇدىرىقتاستى.
جالپى, بوكس ماماندارى بۇنداي جاعدايدان تراگەديا جاساۋدىڭ قاجەتى جوق دەپ ەسەپتەيدى. الەمدىك دودالار بىلاي تۇرسىن, ىشكى بىرىنشىلىكتەردە دە ءبىر ۇلتتىڭ وكىلدەرى ءبىر-بىرىمەن ايقاسىپ ءجۇر. ءتىپتى اقش-تا وتەتىن كاسىپقوي بوكس كەشىنىڭ باستى جەكپە-جەكتەرىندە دە امەريكالىق, مەكسيكالىق, كانادالىق جانە تاعى باسقا ەلدەردىڭ بوكسشىلارى ءبىر-بىرىمەن جۇدىرىقتاسىپ جۇرگەنى بارشاعا ءمالىم. قازاقتار دا بۇل جاعدايعا كوزقاراسىن وزگەرتىپ, قالىپتى جاعداي ەكەنىنە كوز ۇيرەتۋ كەرەك دەپ ەسەپتەيدى.
ال جۋىردا وسى بوكس كەشى تۋرالى قازىرگى تاڭدا اقش-تا ونەر كورسەتىپ جۇرگەن كاسىپقوي بوكسشى ماديار اشكەەۆ ءوز ويىن ورتاعا سالىپ, قازاق بوكسشىلارىنىڭ ءبىر رينگتە قارسىلاس بولىپ, جۇدىرىقتاسقانىنا قارسى ەكەنىن ايتتى. «پاندەميا جاعدايىندا قازاقستاندا كاسىپقوي بوكس كەشى وتەتىنىنە قۋانىشتىمىن, الايدا ۇيىمداستىرۋشىلار نەگە قازاق بوكسشىلارىن ءبىر-بىرىنە قارسى قويعانىن تۇسىنە المادىم. شارشى الاعا شىعاتىن جىگىتتەردىڭ بارلىعى دەرلىك كارەراسىندا جەڭىلمەگەن. بىراق وسى بوكس كەشىندە ولاردىڭ ءبىرى جەڭىلەتىنى انىق. ال كارەراڭدا جەڭىلىس بولسا, بەلدىككە شىعۋ مۇمكىندىگىڭ تومەندەيدى جانە تاباتىن تابىسىڭ دا ازايادى. بوكس كەشىن ۇيىمداستىرار الدىندا وسى جاعىن ەسكەرۋى كەرەك ەدى», دەيدى م.اشكەەۆ.
اۋىر سالماقتا الەمنىڭ ەكس-ءابسوليۋتتى چەمپيونى ۋكراينالىق الەكساندر ۋسيك شارشى الاڭعا شىققاندا بوكسشى قارسىلاسىنىڭ ۇلتىنا, دىنىنە ءمان بەرمەۋ كەرەك ەكەنىن ايتادى. «سەبەبى قۇداي بۇل سپورت ءتۇرىن جاراتقاندا قارسىلاسىڭدى ءولتىرۋ ءۇشىن جاراتقان جوق. تەك ءبىر-بىرىمەن قارسىلاسۋ ءۇشىن عانا جاراتتى. سوندىقتان مەن قارسىلاسىمنىڭ كىم ەكەنىنە ءمان بەرمەيمىن», دەگەن بولاتىن.
سونىمەن, الماتىداعى ايقاسقا توقتالساق. كاسىپقوي بوكس كەشىنىڭ شىمىلدىعىن جارتىلاي ورتا سالماقتاعى راي سەيىتجانوۆ پەن تالعات بەرتىلەۋوۆ اشىپ بەردى. التى راۋندقا سوزىلعان جەكپە-جەكتە سەيىتجانوۆ تورەشىلەردىڭ ءبىراۋىز شەشىمىمەن جەڭىسكە جەتتى. سونداي-اق وسى سالماقتا ونەر كورسەتكەن نۇردوس تولەباي دا قارسىلاسى نۇرجان ماقاشباەۆتان ۇپاي سانى بويىنشا باسىم ءتۇستى.
ءۇشىنشى بولىپ شارشى الاڭعا كوتەرىلگەن وتانداسىمىز ءالي بالوەۆ بەلارۋس بوكسشىسى يۋري بىحوۆتسەۆپەن سەگىز راۋند بويى جۇدىرىقتاسىپ, كاسىپقوي بوكستاعى 10-شى جەڭىسىن تويلادى. تورەشىلەردىڭ شەشىمى بويىنشا بالوەۆ 80-72 ەسەبىمەن جەڭىسكە جەتتى. ءبىر قىزىعى بىحوۆتسەۆ 2019 جىلى دا قازاقستانعا كەلىپ, رۋسلان مىرساتاەۆتان جەڭىلىپ قالعان ەدى.
جۋىردا عانا كاسىپقوي بوكسقا اۋىسقان 2018 جىلعى جاسوسپىرىمدەر اراسىنداعى جازعى وليمپيا ويىندارىنىڭ كۇمىس جۇلدەگەرى تالعات شايكەن دەبيۋتتىك جەكپە-جەگىن 2016 جىلدان بەرى كاسىبي شارشى الاڭدا ونەر كورسەتىپ جۇرگەن تاجىريبەلى بوكسشى بەرىكباي نۇرىمبەتوۆكە قارسى وتكىزدى. التى راۋندقا سوزىلعان ايقاستا شايكەن تورەشىلەردىڭ شەشىمى بويىنشا جەڭىسكە جەتىپ, نۇرىمبەتوۆ العاش رەت جەڭىلىسكە ۇشىرادى.
بوكس كەشىنىڭ بەسىنشى جۇبىندا جەڭىلىستىڭ كەرمەك ءدامىن تاتپاعان ەكى بوكسشىمىز – ساپارباي ايداروۆ پەن اباي تولەش جۇدىرىقتاستى. ەكەۋى دە 75 كيلو سالماقتا قازاقستان چەمپيونى اتانعان جانە كاسىپقوي بوكستا ءبىرشاما تاجىريبە جيناپ ۇلگەرگەن. تارتىستى وتكەن كەزدەسۋدە ايداروۆ ەكىنشى راۋندتا قارسىلاسىن ءبىر رەت نوكاۋتقا جىبەردى. تەز ارادا ەسىن جيىپ ۇلگەرگەن تولەش جەكپە-جەك سوڭىنا دەيىن جۇدىرىقتاسقانىمەن, ۇپاي سانى بويىنشا ساپاربايعا ەسە جىبەردى.
تاعى ءبىر دەبيۋتانت, 2019 جىلعى ازيا چەمپيونى جانە الەم چەمپيوناتىنىڭ قولا جۇلدەگەرى تۇرسىنباي قۇلاحمەت كاسىپقوي بوكستاعى تۇساۋكەسەر كەزدەسۋىن ءساتتى باستادى. ول بۇعان دەيىن ايگىلى Top Rank پروموۋتەرلىك كومپانياسىنىڭ بوكسشىسى بولعان وتانداسىمىز ساعادات راحمانقۇلمەن كەزدەسىپ, تەحنيكالىق نوكاۋتپەن جەڭىسكە جەتتى. ساعادات ءتورتىنشى راۋندتان كوزىنەن العان جاراقاتقا بايلانىستى جەكپە-جەكتى جالعاستىرا المادى. ايتپەسە س.راحمانقۇل تۇرسىنبايعا ءبىراز قارسىلىق كورسەتىپ ەدى. سونداي-اق جەڭىل سالماقتاعى جەرلەسىمىز ۆيكتور كوتوچيگوۆ بەلارۋس وكىلى اندرەي يساەۆپەن جۇدىرىقتاسىپ, ەش قيىندىقسىز ءۇشىنشى راۋندتا-اق تەحنيكالىق نوكاۋتپەن جەڭىس تويىن تويلادى. بۇل 27 جاستاعى كوتوچيگوۆتىڭ 11 جەكپە-جەكتەگى 11-ءشى جەڭىسى.
ال بوكس كەشىنىڭ باستى جەكپە-جەگى بوكستان ۇلتتىق قۇرامانىڭ كاپيتانى, اۋىر سالماقتاعى ساڭلاعىمىز قامشىبەك قوڭقاباەۆ پەن كاسىپقوي بوكستا 20-دان جوعارى دارەجەلى جەكپە-جەك وتكىزىپ ۇلگەرگەن يسا اقبەرباەۆ اراسىندا ءوربىدى. قوڭقاباەۆ دەبيۋتتىك جەكپە-جەگىن وتكىزىپ تۇرسا دا تاجىريبەلى قارسىلاسىنان ەش قايمىققان جوق. ءبىرىنشى نومىرمەن جۇدىرىقتاسقان ول ءسات سايىن قارسىلاسىن سوققىنىڭ استىنا الۋمەن بولدى. ءبىرىنشى راۋند قامشىبەكتىڭ پايداسىنا جازىلدى. ەكىنشى راۋندتى ەكى بوكسشى دا شيراق باستاپ, سوققىلارمەن الماسىپ جاتتى. راۋندتىڭ ورتا تۇسىنا كەلگەندە قوڭقاباەۆ سول قولىمەن اقبەرباەۆتىڭ بۇيىرىنەن سوعىپ, نوكداۋنعا جىبەردى. تورەشى سەگىزگە دەيىن ساناعانىمەن, يسانىڭ جەكپە-جەكتى جالعاستىرا المايتىنى بەلگىلى بولدى. وسىلايشا قامشىبەك كاسىپقويداعى دەبيۋتتى جەكپە-جەگىن ءساتتى باستادى. دەسە دە ول الداعى ۋاقىتتا ۇلتتىق قۇراما ساپىندا قالىپ, اۋەسقوي بوكستا دا ونەر كورسەتە بەرەدى. بالكىم, كەلەسى جىلعى توكيو وليمپياداسىنان كەيىن تولىققاندى كاسىپقوي بوكسقا اۋىسۋى دا عاجاپ ەمەس.
