اۋدان ورتالىعى پرەسنوۆكا سەلوسىنان «ۆاز-2107» كولىگىمەن شىققان 65 جاستاعى تۇرعىنعا اۋىل شەتىندە ەكى ادام الا كەت دەپ قول كوتەرەدى. «الا كەتسەم نەسى بار, ازەر بولسا بەنزينگە اقشا تابارمىن» دەپ ويلاعان جۇرگىزۋشى توقتاپ, ولاردى مىنگىزىپ الادى. كەيىن بەلگىلى بولعانىنداي جولاۋشىلاردىڭ ءبىرى 35, ەكىنشىسى 28 جاستا ەكەن جانە ەكەۋى دە بۇرىن سوتتالعان. ەكى جولاۋشى بۇعان دەيىن دە ءىشىپ العاندارىنا قاراماي, سالوننىڭ ىشىندە دە اراقتان اۋىزدارى بوسامايدى. شال ادامدى باسىنىپ, ماشيناسىن تارتىپ الۋ دا ماس باستارىنا كەلە قالادى. ءسويتىپ, وعان قوقان-لوقى كورسەتىپ, ماشيناسى مەن تەلەفونىن تارتىپ الىپ, بىرەۋى رولگە وتىرادى. بىراق اراقتىڭ ۋىتى باسىن العان ول رولگە يە بولا الماي, «نوۆورىبينكا» سەلوسىنىڭ تۇسىندا كيۋۆەتكە ءتۇسىپ, قامىس باسقان كولشىككە قويىپ كەتەدى. ايتەۋىر ەشكىمگە زاقىم كەلمەي, دالاعا شىعادى.
اشىق دالاعا شىققان سوڭ ماشينانى يەسىنە قالدىرىپ, ەكى ماس «كلادبينكا» سەلوسىنا بەت الىپ, ءوتىپ بارا جاتقان كولىككە قول كوتەرىپ, ءمىنىپ كەتەدى. ابىرويدان ابدەن ايرىلعان ەكى ماس بۇل اۋىلدا دۇكەنگە قاراقشىلىق شابۋىل جاسايدى. دۇكەنشىنى قورقىتىپ, 44 مىڭ تەڭگە اقشاسىن تارتىپ اكەتەدى.
اۋداندىق پوليتسيا بولىمىنە دابىل وسى جەردەن تۇسەدى. جەدەل كەلە جاتقان پوليتسيا قىزمەتكەرلەرى كيۋۆەتكە ءتۇسىپ كەتكەن ماشينا مەن ونىڭ يەسىن دە جولدا كورەدى.
جەدەل ىزدەستىرۋ بارىسىندا قىلمىسكەرلەر اۋىل شەتىنەن تابىلادى, ابدەن ماس بولىپ, سىلەيىپ قالعانداردى پوليتسيا وڭاي قۇرىقتاعان. اتالعان فاكتىلەر سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىنە قىلمىستىق كودەكستىڭ ء«اۆتوموبيلدى قۇقىققا سىيىمسىز يەلەنىپ الۋ» جانە «قاراقشىلىق» باپتارى بويىنشا ەنگىزىلدى. قازىر ۇستالعاندار كۇزەتپەن قاماۋدا وتىر.
