پرەمەر-مينيستر سەرىك احمەتوۆتىڭ الماتى وبلىسىنا ساپارى اگرارلى سالا جەتىستىكتەرىن كورۋدەن باستالدى.
جەتىسۋدا جۇزەگە اسىرىلىپ جاتقان سەرپىندى جوبالار ساناتىنا كىرەتىن «سارىبۇلاق كومپانياسى» جشس جوباسىنىڭ جالپى قۇنى 4 ملرد. 500 مىڭ تەڭگە. تۇتاستاي العاندا, رەسپۋبليكامىزدا وندىرىلەتىن قۇس ەتىنىڭ 30 پايىزى, ياعني 68 مىڭ تونناسى الماتى وبلىسىنىڭ ەنشىسىنە تيسە, سونىڭ ىشىندە 16 مىڭ تونناعا جۋىق قۇس ەتىن وسى ءوندىرىس ورنى كەلەسى جىلدان باستاپ ءوندىرۋدى كوزدەپ وتىر. بۇل ءوندىرىس ورنىنىڭ وزگە قۇس فابريكالارىنان ارتىقشىلىعى – بۇگىن ىسكە قوسىلعان ەت باعىتىنداعى زاۋىتتىڭ وسىدان ءۇش جىل بۇرىنعى جۇمىرتقا باعىتىن دا دامىتىپ, ءبىر جىلدا 220 ملن. دانا جۇمىرتقا وندىرەتىندىگى. بۇگىنگى كۇنگە دەيىن 167 ميلليون دانا جۇمىرتقا ءوندىرىپ, مەملەكەتتەن 504 ملن. تەڭگە سۋبسيديا الدى. ەت باعىتىنداعى جۇمىسىن جۇيەلى تۇردە جۇرگىزۋگە ۇمتىلعان وسىناۋ جاڭا ءوندىرىس ورنىنا يتاليا, نيدەرلاندى, گەرمانيادان ارنايى ساتىپ اكەلىنگەن قۇرال-جابدىقتار ورناتىلىپ, ىسكە قوسىلعانى كوڭىلگە قونىمدى.
پرەمەر-مينيستر سەرىك احمەتوۆتىڭ الماتى وبلىسىنا ساپارى اگرارلى سالا جەتىستىكتەرىن كورۋدەن باستالدى.
جەتىسۋدا جۇزەگە اسىرىلىپ جاتقان سەرپىندى جوبالار ساناتىنا كىرەتىن «سارىبۇلاق كومپانياسى» جشس جوباسىنىڭ جالپى قۇنى 4 ملرد. 500 مىڭ تەڭگە. تۇتاستاي العاندا, رەسپۋبليكامىزدا وندىرىلەتىن قۇس ەتىنىڭ 30 پايىزى, ياعني 68 مىڭ تونناسى الماتى وبلىسىنىڭ ەنشىسىنە تيسە, سونىڭ ىشىندە 16 مىڭ تونناعا جۋىق قۇس ەتىن وسى ءوندىرىس ورنى كەلەسى جىلدان باستاپ ءوندىرۋدى كوزدەپ وتىر. بۇل ءوندىرىس ورنىنىڭ وزگە قۇس فابريكالارىنان ارتىقشىلىعى – بۇگىن ىسكە قوسىلعان ەت باعىتىنداعى زاۋىتتىڭ وسىدان ءۇش جىل بۇرىنعى جۇمىرتقا باعىتىن دا دامىتىپ, ءبىر جىلدا 220 ملن. دانا جۇمىرتقا وندىرەتىندىگى. بۇگىنگى كۇنگە دەيىن 167 ميلليون دانا جۇمىرتقا ءوندىرىپ, مەملەكەتتەن 504 ملن. تەڭگە سۋبسيديا الدى. ەت باعىتىنداعى جۇمىسىن جۇيەلى تۇردە جۇرگىزۋگە ۇمتىلعان وسىناۋ جاڭا ءوندىرىس ورنىنا يتاليا, نيدەرلاندى, گەرمانيادان ارنايى ساتىپ اكەلىنگەن قۇرال-جابدىقتار ورناتىلىپ, ىسكە قوسىلعانى كوڭىلگە قونىمدى.
الداعى ۋاقىتتا وندىرگەن ونىمدەرىن تەك ەلىمىزدە عانا ەمەس, ىرگەلەس جاتقان شەتەلدەرگە دە شىعاراتىنى تاعى بار. ەكولوگيالىق تۇرعىدان تازا ونىمدەرىمەن رىنوك تورىنەن ورىن الۋعا تالپىنىسى العاشقى قادامىنان ايقىن بايقالادى.
ۇكىمەت باسشىسى كەلەسى كەزەكتە الماتى جەلدەتكىش زاۋىتىنا اتباسىن بۇرىپ, ءوندىرىس ورنىنىڭ تىنىس-تىرشىلىگىمەن تانىستى. بۇل جوبانىڭ جالپى قۇنى 525 ملن. تەڭگە بولسا, قۋاتتىلىعى جىل سايىن 123 مىڭ دانا ساپالى ءونىم شىعارۋعا جەتەدى. بەس جىلدان بەرى جۇمىس ىستەپ كەلە جاتقان كاسىپورىن نەگىزىنەن عىلىمي-وندىرىستىك جانە اۋا رايىن بولجاۋ تەحنيكالارىن شىعارۋدا. جالپى, وندىرىستىك جابدىق, ورتكە قارسى جەلدەتكىشتەر مەن جابدىقتار, قوزعالتقىش بازاسىنداعى جەلدەتكىش جابدىقتارىنىڭ بىرلەسكەن ءوندىرىسى, ارنايى جابدىقتار بولىپ ءتورت توپقا بولىنەتىن ونىمدەرى شەتەل رىنوكتارىنا دا شىعارىلۋدا. قازىر اتالعان زاۋىت قازاقستاننىڭ ازاماتتىق جانە ونەركاسىپ قۇرىلىسى تاپسىرىسىنىڭ 70 پايىزىن وتەپ وتىر.
پرەمەر-مينيستر سەرىك احمەتوۆ الماتى-قاپشاعاي اراسىندا سالىناتىن G4 City اتتى سپۋتنيكتىك 4 قالا جوباسىنىڭ جۇزەگە اسىرىلۋ بارىسىمەن ەگجەي-تەگجەيلى تانىسىپ, شەتەلدىك كومپانيا وكىلىنە قاتاڭ تالاپ قويدى. نەگىزى بۇل جوبا جونىندەگى تاپسىرمانى مەملەكەت باسشىسى 6 جىل بۇرىن الماتى وبلىسىنا كەلگەن جۇمىس ساپارىندا بەرگەن بولاتىن. سونىمەن قاتار, كورەيا رەسپۋبليكاسىنىڭ پرەزيدەنتى لي مەن باكتىڭ قازاقستان رەسپۋبليكاسىنا ساپارى بارىسىندا بەكىتىلگەنى تاعى بار. ەلباسىنىڭ ءداستۇرلى جولداۋىندا الماتى قالاسىنىڭ ماڭىنان سپۋتنيكتىك 4 قالا Green4 جوباسىن باستاۋ ۇسىنىلعان. بۇل جوبانىڭ نەگىزگى ماقساتى – قازاقستاندى دامىعان ۇستىنە دامىتا ءتۇسۋ ءۇشىن ورتالىق ازيا حالىقارالىق ساۋدا ۇيىمىنا ەنگىزۋ. ءسويتىپ, ەلدىڭ جالپى ەكونوميكالىق رىنوكتاعى بەلسەندىلىگىن ارتتىرىپ, ءتۋريزمدى دامىتىپ, ەكولوگيالىق تەپە-تەڭدىكتى ساقتاپ, الماتى قالاسىن ءوندىرىس ورىندارىنان بىرتىندەپ بوساتۋ ارقىلى ەڭبەك رىنوگى ماسەلەلەرى مەن تۇرعىن ءۇي پروبلەمالارىن شەشۋ بولىپ تابىلادى. جوبا باستاماشىسى – «كاسپيسكايا گرۋپپا» اق حولدينگى قۇرامىنا ەنەتىن «G4 City» جشس. جالپى اۋماعى 8 مىڭ گەكتار جەردى الىپ جاتىر. ونىڭ ىشىندە تۇرعىن ءۇي قالاشىعىنىڭ اۋماعى – 181,2 گەكتار. بۇل ارقىلى الماتى وبلىسى مەن قالاسىنداعى دەموگرافيالىق ماسەلە وڭدى شەشىمىن تاۋىپ, 304 مىڭ ادام تۇرعىن ۇيمەن قامتىلادى دەپ كۇتىلۋدە. جىكتەپ ايتساق, «Gate City» (الەۋەتتى تۇلعالار) – 130 مىڭ ادام, «Golden City» (مادەني-ءبىلىم, عىلىمي-مەديتسينا ورتالىعى) – 103 مىڭ ادام, «Growing City» (لوگيستيكالىق ءوندىرىس سالاسىندا) – 50 مىڭ ادام, «Green City» (تۋريزمدە) 21 مىڭ ادام تۇرۋعا لايىقتالعان. جالپى جوبانى ءىس جۇزىنە 2008 جىلى اسىرۋ جوسپارلانعان-تىن. تۇرعىن ءۇي قۇرىلىسى باعدارلاماسى اياسىندا رەسپۋبليكالىق بيۋدجەتتەن 14,8 ملرد. تەڭگە بولىنگەنى تاعى بار. سپۋتنيكتىك 4 قالانىڭ باس جوسپارى دا جاسالىپ, ينجەنەرلىك ينفراقۇرىلىم نىساندارىنىڭ قۇرىلىسى بەكىتىلگەن. قۇرىلىس جۇمىستارىن جۇرگىزۋ كەزەڭىندە پايدالانۋعا جالپى اۋماعى 10,3 شاقىرىم جەر ءبولىنىپ, وندا ءبىرىنشى كەزەڭدە ەلەكتر قۋاتىمەن, گازبەن, سۋمەن قامتاماسىز ەتۋ جۇمىسىن ۇكىمەت تاپسىرماسىنا سايكەس الماتى وبلىسى اكىمدىگى بەلگىلەنگەن كەستەگە وراي جۇيەلى تۇردە جۇرگىزۋدە.
2012 جىلى 24 قازاندا سەۋل قالاسىندا وسى جوبا بويىنشا تۇرعىن ءۇي قۇرىلىسىن جۇرگىزۋگە «CS Development LLP» جشس مەن «POSCO E&C» اتتى وڭتۇستىك كورەيالىق كومپانيا اراسىندا كەلىسىمگە قول قويىلعان ەدى. بۇگىنگى تاڭدا قۇرىلىس جۇمىستارىن جۇرگىزەتىن كومپانيالار تۇرعىن ءۇي قۇرىلىسى ءۇشىن ۇيىمداستىرۋ جانە دايىندىق جۇمىستارىن جۇرگىزۋ ءۇشىن قاجەتتى جوبالىق-سمەتالىق قۇجاتتاردى دايىنداۋدا. ءبىرىنشى كەزەكتە «قويانقۇستا» تۇرعىن ءۇي قۇرىلىسىن سالۋ 2014 جىلدىڭ ناۋرىز ايىندا باستالادى دەپ كۇتىلۋدە. مۇنىڭ سىرتىندا تۇرعىن ءۇي قۇرىلىسىن سالۋ جۇمىسى بويىنشا «سامۇرىق-قازىنا» جىلجىمايتىن م ۇلىك قورى» اق ارقىلى جۇمىس جۇرگىزىلۋدە. مىنە, باعامداپ كورسەك ماسەلەنىڭ ءمانىسى تەك «ويتۋدە», «جوسپارلانۋدا» دەگەندەي شىعارىپسالما سوزدەرمەن شەكتەلۋدە. سوندىقتان دا, سەرىك احمەتوۆ ءدۇيىم جۇرتتىڭ الدىندا شەتەلدىك كومپانيا وكىلى يۋري تسحايدان ناقتىلىقتى وتە قاتاڭ تالاپ ەتتى. «قۇرىلىس جۇمىسىن باستاي الماساڭىزدار, ەڭ باستىسى, كەلىسىمدەگىدەي وتە جوعارى دەڭگەيدەگى عيماراتتار تۇرعىزا الماساڭىزدار, وسى ماقساتقا وراي العان قاراجاتتارىڭىزدى قازىناعا قايتارىڭىزدار», دەدى ۇكىمەت باسشىسى.
ەلباسى ۇكىمەتتىڭ كەڭەيتىلگەن وتىرىسىندا اۆتوموبيل جولدارىنىڭ ساپاسىز سالىناتىندىعى تۋرالى ءادىل سىن ايتقان بولاتىن. بۇگىنگى تاڭدا ەلىمىزدە ماگيسترالداردىڭ بەرىكتىگىن نىعايتۋ جۇرگىزىلۋدە. استانا – وسكەمەن جانە پاۆلودار باعىتىنداعى استانا – قاراعاندى, سونداي-اق, ارقالىق جانە باتىس قازاقستان اۆتوموبيل جولدارى سالىنۋدا. «الەمدە جول قۇرىلىسىن ساپالى سالۋمەن قامتاماسىز ەتۋ تەحنولوگياسى بار. سوندىقتان, كولىك جانە كوممۋنيكاتسيالار مينيسترلىگى بۇل تەحنولوگيانى بەلسەنە جۇزەگە اسىرۋى كەرەك», دەدى سەرىك احمەتوۆ. سونداي-اق, ۇكىمەت باسشىسى وبلىستىق دەڭگەيدەگى اۆتوموبيل جولدارىن كەڭەيتىپ, نىعايتۋ قاجەتتىگىن دە ەسكەرتە كەتتى.
قورىتا ايتقاندا, ۇكىمەت باسشىسى اگرارلى وبلىستا اۋىل شارۋاشىلىعى سالاسى بويىنشا اتقارىلعان جۇمىستارعا وڭ باعاسىن بەرىپ, قولعا الىنعان جوبالاردى دەر كەزىندە ەل يگىلىگىنە بەرۋدى تاپسىردى. ال, قۇرىلىس سالۋدا سوزبۇيداعا سالىپ, ارتىن سيىرقۇيىمشاقتاندىرىپ وتىرعان شەتەلدىك كومپانيا وكىلىنە باسا ايتقان وتكىر سىنى شەنەۋنىكتەردىڭ عانا ەمەس, باق وكىلدەرىنىڭ دە ايىزىن قاندىردى.
نۇربول الدىباەۆ,
«ەگەمەن قازاقستان».
الماتى وبلىسى.
