1980 جىلى اقش باستاعان كاپيتاليستىك باعىتتاعى بىرقاتار مەملەكەت ماسكەۋ وليمپياداسىنا قاتىسۋدان باس تارتقانى بەلگىلى. سوعان جاۋاپ رەتىندە سوتسياليستىك ەلدەردىڭ ءبىرازى لوس-اندجەلەستەگى ويىندارعا بويكوت جاريالادى. سودان وليمپيا دوداسى قىزىپ جاتقان تۇستا كسرو-نىڭ بيلىك باسىنداعى ازاماتتارى اسا ءىرى كەشەندى سپورتتىق سايىستاردى ۇيىمداستىرۋدى قۇپ كوردى. ارنايى قاۋلى قابىلدانىپ, وسى باعىتتا جۇمىستار جۇرگىزىلە باستاعاندا وعان «دوستىق-84» دەگەن اتاۋ بەرىلدى. جارىستىڭ اشىلۋ سالتاناتى ۆ.ي.لەنين اتىنداعى ورتالىق ستاديوندا (قازىرگى «لۋجنيكي») دۇركىرەپ تۇرىپ ءوتتى.
باسەكەلەر وليمپيادا باعدارلاماسىنا ەنگەن 30-عا جۋىق سپورت ءتۇرى بويىنشا ءوتتى. سونىمەن قاتار سامبو, تەننيس جانە ۇستەل تەننيسىنەن سايىستار ۇيىمداستىرىلدى. ايتۋلى جارىستىڭ دەڭگەيى جوعارى بولعانى سونشالىق, تەك اۋىر اتلەتيكانىڭ وزىندە عانا الەمدىك رەكورد 28 مارتە جاڭاردى. بۇرىن-سوڭدى بولماعان ناتيجەلەر ۆەلوسپورت (7), ءجۇزۋ (5), نىسانا كوزدەۋ (4) جانە جەڭىل اتلەتيكا (3) سايىستارىندا دا تىركەلدى. تاعى بىرنەشە مارتە رەكوردتىق كورسەتكىشتەر قايتالاندى.
جالپى, «دوستىق-84» دوداسىنىڭ الاۋى ماسكەۋدە تۇتانعانىمەن, جارىستار كسرو-دان بولەك, تاعى بىرنەشە مەملەكەتتە ءوتتى. ماسەلەن, سۋ دوبى, ۆولەيبول جانە بوكسشىلاردىڭ باسەكەسىن كۋبا قابىلداسا, ۇستەل تەننيسشىلەرى سولتۇستىك كورەيادا سايىسقا ءتۇستى. سامبو كۇرەسىنىڭ شەبەرلەرى موڭعوليادا بەلدەستى. ال قالعان جارىستار قارت قۇرلىقتا ۇيىمداستىرىلدى.
جالپى كوماندالىق ەسەپتە كسرو قۇراماسى جەكە-دارا كوش باستادى. ولار 282 (126 التىن+87 كۇمىس+69 قولا) جۇلدەگە يەلىك ەتتى. ەكىنشى جانە ءۇشىنشى ورىنداردى گدر (50+45+43), بولگاريا (21+25+29) يەلەندى. سونداي-اق كۋبا (15+11+12), ماجارستان (10+17+24), پولشا (7+17+34), سولتۇستىك كورەيا (5+5+10), چەحوسلوۆاكيا (2+18+28), قىتاي (2+1+4) جانە ەفيوپيا (1+2+2) ۇزدىك وندىقتىڭ قاتارىنا ەندى. بايراقتى باسەكەلەر بارىسىندا بارلىعى 13 مەملەكەتتىڭ ءانۇرانى شىرقالسا, 19 ەلدىڭ تۋى بيىكتە جەلبىرەدى.
«دوستىق-84» دوداسىنا قازاقستاننىڭ دا كوپتەگەن سپورتشىسى قاتىستى. ولاردىڭ دەنى جەڭىس تۇعىرىنا كوتەرىلدى. ەگەر سول جەرلەستەرىمىز لوس-اندجەلەسكە اتتانعاندا, وليمپيا ويىندارى تاريحىندا جەڭىپ العان جۇلدەلەرىمىزدىڭ سانى قازىرگىدەن الدەقايدا كوپ بولار ەدى. ماسەلەن, 1984 جىلى تاشكەنتتە وتكەن كسرو چەمپيوناتىندا قازاقتىڭ ءتورت بىردەي بوكسشىسى جەڭىمپاز اتاندى. ولاردىڭ بارلىعى دا «دوستىق-84» جارىسىندا ونەر كورسەتتى. كارىمجان ءابدىراحمانوۆ پەن سەرىك نۇرقازوۆ كۇمىس السا, سەرىك قوناقباەۆ قولا مەدالدى قاناعات تۇتتى. اسىلبەك قيلىموۆ شيرەك فينالدا ۇتىلدى. ءبىر ايتا كەتەرلىگى, بۇل جىگىتتەردىڭ ءبارىنىڭ دە جولىن كۋبانىڭ قابىلاندارى بوگەدى. بىراق قانداستارىمىزدىڭ بارلىعى بىردەي ۇتىلدى دەپ ايتۋعا اۋىز بارمايدى. ءبىزدىڭ جىگىتتەر جامان جۇدىرىقتاسقان جوق. بىراق كەيدە ساياساتتىڭ دا سپورتقا سالقىنى تيەدى ەمەس پە. بۇل جولى ءدال سولاي بولدى. جارىس گاۆانادا وتكەندىكتەن تورەشىلەر جەرگىلىكتى بوكسشىلاردىڭ ىعىنا جىعىلدى. ونىڭ ۇستىنە بۇل باسەكەلەردى بوستاندىق ارالىنىڭ باسشىسى فيدەل كاسترونىڭ ءوزى تاپجىلماي تاماشالادى. تريبۋنادا وسىنداي مارتەبەلى مىرزا وتىرعاندا, بىرىنشىدەن – كۋبالىقتار شارشى الاڭعا قاناتتانىپ شىقتى, ەكىنشىدەن – قازىلار دا ولارعا قاتتى كومەكتەستى. وسى ءسوزىمىز دالەلدى بولۋ ءۇشىن مىنا ءبىر دەرەكتى العا تارتايىق: گاۆانادا 12 سالماق دارەجەسى بويىنشا وتكەن بوكسشىلار باسەكەسىندە جارىس قوجايىندارى 11 مارتە جەڭىس تۇعىرىنىڭ ەڭ بيىك ساتىسىنا كوتەرىلدى. تەك ءبىر عانا باس جۇلدە وزگە ەلدىڭ ورەنىنە بۇيىردى. بۇل رەتتە 67 كيلو سالماقتا ونەر كورسەتكەن گدر-دىڭ وكىلى تروستەن ءشميتتستىڭ باعى جانعانىن ايتا كەتەيىك. فينالدا ول كۋبالىق حوسە ەرناندەستەن ايلاسىن اسىردى.
قازاقستاندىق سپورتشىلار اراسىندا جەڭىل اتلەت ۆلاديمير مۋراۆەۆ پەن زويا يۆانوۆا, باسكەتبولشى نادەجدا ولحوۆا مەن ۆالەري تيحونەنكو, ۆولەيبولشى ەلەنا چەبۋكينا مەن ولگا كريۆوشەەۆا, ۆاتەرپولشى سەرگەي كوتەنكو, كوگالداعى حوككەيشىلەر سوس ايرەپەتيان, ميننەۋلا ءازيزوۆ, الەكساندر گونچاروۆ, سەرىك قالىمباەۆ, الەكساندر مياسنيكوۆ, ميحايل نيچەپۋرەنكو جانە فاريت زيگانگيروۆ التىن تۇعىرعا كورسەتىلسە, تاعى كوپتەگەن جەرلەسىمىز جۇلدەلى ورىنداردى يەلەندى. مىنە, «دوستىق-84» ويىندارى وسىنداي وقيعالارىمەن ەستە قالدى.
