شارانى ۇيىمداستىرۋشىلاردىڭ پىكىرىنشە, اتالمىش كونتسەرتتىڭ ماقساتى – مۋزىكالىق ونەر ارقىلى ۇلتتىق بىرەگەيلىكتى ساقتاپ, سىرتتا جۇرگەن قازاق دياسپوراسىنا رۋحاني قولداۋ كورسەتۋ جانە شەت ەلدەگى قانداستارمەن بايلانىستى نىعايتۋ ەكەن.
«TURAN» ەتنو-فولكلورلىق ءانسامبلى – ەلىمىزدىڭ ۇلتتىق مۋزىكالىق مۇراسىن جاڭعىرتىپ, ۇمىت بولا باستاعان ءتول اسپاپتار سۇيەمەلدەۋىمەن كونە كۇي-جىرلاردى ناسيحاتتاپ جۇرگەن بىرەگەي توپ. ونەر ۇجىمى بۇعان دەيىن قازاق مۋزىكاسىن الەمگە ايگىلەپ, 70-تەن استام شەت مەملەكەتتە 600-دەن استام جەكە كونتسەرت بەرگەن ەكەن.
سونىڭ ىشىندە الەم ايگىلى «كارنەگي حولل», «كەننەدي ورتالىعى», «كونتسەرت حاۋس», «كرەمل سارايى», «ساللە كورتو» زالدارىندا ونەر كورسەتكەنىن ايتۋىمىز كەرەك. سونداي-اق ونەرپازداردىڭ قولىندا حالقىمىزدىڭ 30-دان استام ۇلتتىق مۋزىكالىق اسپابى بار. مۋزىكانتتاردىڭ ارقايسىسى سولاردىڭ بىرنەشەۋىندە ويناۋدى مەڭگەرگەن.
ونلاين كونتسەرت بارىسىندا انسامبل مۇشەلەرى تالانتتى مۋزىكانتتار: سەرىك نۇرمولداەۆ, ماقسات مەدەۋبەك, باۋىرجان بەكمۇحانبەتوۆ, ەرجىگىت اليەۆ, جانتۋ داداباەۆتار ۇلتتىق اسپاپتاردىڭ دىبىسىن قازىرگى زامانعا ساي لايىقتاپ, جاڭا فورماتتا ۇسىنۋمەن بىرگە, قازاق حالقىنىڭ ۇلتتىق مۋزىكالىق مۇراسىن جاڭعىرتىپ, ۇمىت بولا باستاعان ءتول اسپاپتاردىڭ سۇيەمەلدەۋىمەن وزدەرىنىڭ ۇزدىك تۋىندىلارىن ورىندادى.
ولار ورىنداعان «ورتەكە», «اقساق قۇلان», «كەرۋەن», «كوروعلى», «اققۋ», «بۇركىت» كۇيلەرى ساحنا تورىندە تۇرعان ۇلكەن ەكران ارقىلى تاماشا كورىنىستەرمەن ادىپتەلىپ, ارلەنىپ, جاڭا پىشىنمەن تۇرلەنىپ كورسەتىلدى.
سونىمەن بىرگە, ۇجىم ءتول تۋىندىلارى «قىران دالام – تۇران دالام», «قيلى زامان» شىعارمالارىن ورىندادى. بۇل دۇنيەلەرگە ەپوس, جىر, مونولوگ, كۇي, بي قاتارلى فولكلورلىق مۇرالار ءسىڭىرىلىپ, حالقىمىزدىڭ ەجەلگى ەتنوسالتى اڭشىلىق, ساياتشىلىق كورىنىس تاپسا, سازگەر اقتوتى رايىمقۇلوۆانىڭ «شابىت» جانە «اباي تولعاۋى» اتتى شىعارمالارى كورەرمەننىڭ كوڭىل پەرنەسىن ءدوپ باسقانداي اسەر قالدىردى. كونتسەرتتە بۇلاردان بولەك نۇر-سۇلتان قالاسى Astana Ballet تەاترى جانە قازاق ۇلتتىق حورەوگرافيا اكادەمياسىنىڭ ارتىستەرى دە ونەر كورسەتتى.
بۇل رەتكى ونلاين كونتسەرتتى شەت مەملەكەتتەردە جۇرگەن قانداستارىمىز جوعارى كوڭىل كۇيمەن تاماشالاپ, ونەرپازدارعا كوكەيدەگى سۇراقتارىن قويدى. قىسقاسى, اتالمىش كونتسەرت سۇراق-جاۋاپ فورماتىندا ءوتتى.
