قوعام • 22 تامىز، 2020

التى ادامنىڭ ءومىرىن اراشالاعان سپورتشى

366 رەت كورسەتىلدى

كەشە مادەنيەت جانە سپورت مينينسترلىگى سپورت دانە دەنەشىنىقتىرۋ ىستەرى كوميتەتىنىڭ ءباسپاسوز وكىلى حابارلاستى. ايتپاعى: جۋىقتا الماتى قالاسىندا ءورت بولىپ، توسىننان كەلگەن اپات سالدارىنان اۋىر جاعدايعا دۋشار بولعان التى ادامدى داۋرەن رىسقۇلوۆ دەگەن ازامات جانىن جالداپ ءجۇرىپ قۇتقارىپ قالىپتى. قىسقاسى، وسى وقيعانى وقىرماندارىڭىزعا جەتكىزسەڭىز دەيدى عوي...

باتىر جىگىت تانىمال سپورتشى ەكەن. ناقتىراق ايتقاندا، اۋىر اتلەتيكادان ەلىمىزدىڭ بىرنەشە دۇركىن چەمپيونى جانە حالىقارالىق تۋرنيرلەردىڭ جۇلدەگەرى، سونىمەن قاتار الەم ءھام قۇرلىقتىق بىرىنشىلىكتەرگە قاتىسقان. وتكەن جىلدارى ۆەنگريا استاناسى بۋداپەشت قالاسىندا اۋىر اتلەتيكادان وتكەن جاستار چەمپيوناتتىندا قولا مەدالعا قول جەتكىزگەن... تاعىسىن تاعى.

كوميتەت وكىلىنىڭ ءوتىنىشى بويىنشا، بۇگىنگىنىڭ باتىرى داۋرەن امانكەلدى ۇلىمەن حابارلاسقانىمىزدا: "كەشكى اس ۇستىندە وتىر ەدىم، سىرتتا ايقاي-شۋ كوتەرىلدى. بىرەۋلەردىڭ ء"ورت شىقتى" دەگەن اششى داۋىسى ەستىلدى. دالاعا جۇگىرىپ شىقسام، ءۇيدىڭ ءۇشىنشى قاباتى ورتەنىپ جاتىر ەكەن. اڭداسام اپكەمنىڭ قىزى ءورت ىشىندە قالىپ قويىپتى. جۇگىرىپ كىرسەم، پودەزدىڭ ءىشى كوك ءتۇتىن. ەشتەمە كورىنبەيدى. قايتا سىرتقا شىعىپ فۋتبولكامدى سۋلاپ الدىمدا جوعارى كوتەرىلدىم. ءۇشىنشى قاباتقا كەلسەم، لاۋلاعان ءورت. قىزىل جالىن بەت قاراتار ەمەس. ەپتەپ ەسىكتى جاۋىپ ۇلگەردىم. بۇرىن ءورت قاۋىپسىزدىگى بويىنشا وتكەن ساباقتار ەسىمە ءتۇسىپ، جەرگە جاتا قالىپ، ەڭبەكتەي باستادىم. قارىنداسىم بولمەسىندە جارىق جانىپ تۇرعانىن بايقادىم"، دەيدى سپورتشى باۋىرىمىز.

سودان ءورت جايلاعان بولمەگە كىرسە جيەن قارىنداسى جوق. كەيىن بەلگىلى بولعانداي، ول بالكونعا شىعىپ كەتكەن ەكەن. داۋرەن قىزىل جالىنمەن ارپالاسىپ ءجۇرىپ قىزدى قۇتقارىپ شىعادى. ەندى "ۋھ" دەي بەرگەندە دالاداعى ادامداردىڭ ء"تورتىنشى قاباتتا بالالار قالىپ قويدى"، دەپ زار يلەگەن داۋىسىن ەستيدى. باتىر ازامات قىزىل جالىندى ءتىلىپ ءوتىپ ءتورتىنشى قاباتقا جەتەدى. ەسىكتى تەۋىپ اشىپ اجال اۋزىندا ءۇرپيىپ تۇرعان ءتورت بالا مەن اناسىن قۇتقارادى. سول ساتتە باسقا ازاماتتاردا كومەككە كەلىپ ۇلگەرگەن كورىنەدى.

"اكەگە تارتىپ ۇل تۋادى" دەگەندەي داۋرەننىڭ اكەسى امانگەلدى رىمقۇلوۆ اۋىر اتلەتيكادان كسرو سپورت شەبەرى، قازاقستاننىڭ ەڭبەك سىڭىرگەن جاتتىقتىرۋشىسى ەكەن.

سپورتشى ازاماتتىڭ ەرلىگىنە ءتانتى بولعان مادەنيەت جانە سپورت ءمينيسترى اقتوتى رايىمقۇلوۆا وعان قوڭىراۋ شالىپ، قايسارلىعى مەن باتىرلىعى ءۇشىن العىس بىلدىرسە، بۇگىن مادەنيەت جانە سپورت ۆيتسە-ءمينيسترى ساكەن مۇسايبەكوۆ الماتى قالاسىنا باتىردى ادەيى قۇتتىقتاي بارىپ، ونىڭ اكەسىنە ءمينيستردىڭ العىس حاتىن تاپسىردى.

01

" ۇلىڭىز داۋرەننىڭ ورتتەن بىرنەشە ادامدى قۇتقارىپ قالعانىن ەستىپ، جەكە وزىڭىزگە العىسىمدى ءبىلدىرىپ وتىرمىن. اۋىر اتلەتيكادان قازاقستان چەمپيونى، حالىقارالىق تۋرنيرلەردىڭ بىرنەشە دۇركىن جەڭىمپازى داۋرەن باتىلدىقتىڭ شىنايى ۇلگىسىن كورسەتتى. ول ەش ويلانباستان، ءوز ءومىرىن قاتەرگە تىگىپ، باسقالاردىڭ ومىرىنە اراشا ءتۇستى. كەشە عانا سپورت كۇنى مەرەكەسىن اتاپ ءوتىپ، ءدال وسى جاڭالىقتى ءباسپاسوز بەتتەرىنەن كورگەندە قازاقتىڭ جىگىتتەرى ءۇشىن كوكىرەگىمە ماقتانىش سەزىمى ۇيالادى. قايسارلىق مىنەز تانىتىپ، سپورتشىنىڭ رۋحىن بارشاعا تانىتقان داۋرەننىڭ ارەكەتى وسكەلەڭ ۇرپاققا ۇلگى بولاتىنىنا سەنىمدىمىن. ءسىز وسىنداي باتىر ۇلىڭىزبەن ماقتانا الاسىز" دەلىنگەن ەكەن العىس حاتتا.

 

سوڭعى جاڭالىقتار

ۇقساس جاڭالىقتار