ايماقتار • 22 تامىز، 2020

وبلىس بيۋدجەتىنىڭ 30 پايىزدىق شىعىنى بىلىمگە جۇمسالۋدا

19 رەت كورسەتىلدى

پرەزيدەنت ق.توقاەۆ مەملەكەتتىك ورگانداردىڭ الدىنا "حالىق ۇنىنە قۇلاق اساتىن مەملەكەت" قاعيداتىن قالىپتاستىرۋ مىندەتىن قويعانى بەلگىلى. قازىر حالىقتىڭ سۇرانىمىنا "كەرى بايلانىس" مەحانيزمى  ورناتىلۋدا. وسىعان وراي سولتۇستىك قازاقستان وبلىسىنىڭ اكىمى قۇمار اقساقالوۆ دەپۋتاتتاردىڭ الدىندا ەسەپ بەردى. "كوروناۆيرۋس پاندەمياسى ءبارىمىز ءۇشىن ۇلكەن سىناق بولدى. كۇندەلىكتى ومىرگە ۇلكەن وزگەرىستەر اكەلدى. بارلىق سالالاردىڭ دامۋىنا اسەرىن تيگىزدى. اسىرەسە، قىزمەت كورسەتۋ بيزنەسى زارداپ شەكتى. مەملەكەت قيىن-قىستاۋ كەزەڭدە تۇرعىندار مەن بيزنەسكە بارىنشا قولداۋ كورسەتتى. ەكونوميكانى تۇراقتاندىرۋ، ادامداردى ەڭبەكپەن قامتۋ جانە تابىسىن وسىرۋگە ەرەكشە كوڭىل بولىنۋدە"، دەپ باستادى ءوزىنىڭ ءسوزىن اكىم.

الەۋمەتتىك-ەكونوميكالىق دامۋدىڭ جەتى ايلىق قورىتىندىسى بويىنشا سولتۇستىك قازاقستان قازىر رەسپۋبليكادا ونەركاسىپتىڭ دامۋى بويىنشا ءبىرىنشى، اۋىلشارۋاشىلىعى بويىنشا ءتورتىنشى ينۆەستيتسيا تارتۋ بويىنشا ءۇشىنشى جانە قۇرىلىس سالۋ بويىنشا ءتورتىنشى ورىنعا شىقتى. بۇگىنگى تاڭدا  وبلىس بيۋدجەتى جىلدىڭ باسىنداعىمەن سالىستىرعاندا 64 ملرد. تەڭگەگە ارتىپ، 324 ملرد. تەڭگەگە جەتكەن.  

بىلتىرعى قازاندا اشىلعان "قىزىلجار" ەەا اۋماعىندا تۇرىك كومپانياسى 510 ورىندىق زاماناۋي اۋرۋحانا سالۋدا. ونىڭ قۇرىلىسى 2022 جىلى اياقتالادى دەپ جوسپارلانعان. سونداي-اق Alageum Electric كومپانياسى ينۆەستورى بولىپ تابىلاتىن "پەتروپاۆل ەلەكترتەحنيكالىق زاۋىتى" ىسكە قوسىلماق.  ال نەمىستىڭ اۋىلشارۋاشىلى تەحنيكالارىن شىعاراتىن "CLAAS" كومپانياسىمەن كەلىسسوزدەر جۇرگىزىلۋدە. بۇل كەلىسسوزدەر ىسكە اسسا جەرگىلىكتى اگراريلەر نەمىس تەحنيكالارىن ارزانعا الاتىن بولار ەدى.  

ايماقتا كاسىپكەرلىك تە دامىپ كەلەدى. 2019 جىلدان بەرى "قاراپايىم زاتتار ەكونوميكاسى" باعدارلاماسى بويىنشا جەڭىلدەتىلگەن نەسيەلەر بەرۋ ىسكە اسۋدا. قازىردىڭ وزىندە 18،3 ملرد. تەڭگە سۇراعان 131 جوبا ماقۇلداندى. ولار ىسكە اسسا 650 جاڭا جۇمىس ورنى اشىلادى. سولتۇستىك قازىر تۇرعىن ءۇي قۇرىلىسىنىڭ بۋمىن باستان كەشۋدە. بيىل 303،4 مىڭ شارشى مەتر تۇرعىن ءۇي پايدالانۋعا بەرىلمەكشى.

ءوڭىر جول ماسەلەسىن اۋىزعا العاندا عانا ۇياتتى دەۋگە بولادى. بۇگىنگە دەيىن بارلىق جولداردىڭ 35 پايىزى قاناعاتتانعىسىز جاعدايدا. وسى ماسەلەنى شەشۋ ءۇشىن بيىل 39،1 ملرد. تەڭگە ءبولىنىپ، ول ءبىر مىڭ شاقىرىم جولدى جوندەۋگە جۇمسالاتىن بولادى.

حالىقتى تازا اۋىز سۋمەن تولىق قامتاماسىز ەتۋ ماسەلەسى دە كۇن تارتىبىنەن تۇسپەي كەلەدى. بيىل 288 شاقىرىم سۋ قۇبىرلارىن جوندەۋ كوزدەلگەن. ول 60 مىڭ تۇرعىنى بار 76 ەلدىمەكەندى قامتيدى. بۇل ىسكە 8،7 ملرد. تەڭگە قاراستىرىلعان.

حالىقتى جۇمىسپەن قامتۋ ماسەلەسى دە ۇنەمى نازاردا. سوڭعى ءۇش جىلدا جۇمىسپەن قامتۋ ورگاندارىنا 90 مىڭ تۇرعىن قايرىلعان، سونىڭ 10 مىڭعا  جۋىعىنا جاڭا كاسىپتەردى يگەرۋگە جاعداي جاسالعان. 77 مىڭى جۇمىسقا ورنالاستىرىلىپ، تاعى دا 3 مىڭدايىنا وزدەرىنىڭ كاسىبىن اشۋعا قول ءۇشى بەرىلگەن. وسى ماقساتتارعا بيۋدجەتتەن 32 ملرد. تەڭگە جۇمسالعان ەكەن. ول 34 مىڭعا جۋىق تۇراقتى جۇمىس ورىندارىن اشۋعا جۇمسالعان. بيىل 3 مىڭعا جۋىق ادام جۇمىسقا ورنالاستىرىلدى.

ءبىلىم بەرۋ سالاسىنا ءبولىنىپ جاتقان قاراجات جىل سايىن ارتىپ وتىرادى. ەگەر ول بىلتىر 18 پايىزعا كوبەيسە، بيىل ول 32 پايىزعا ارتتى. بۇل 87 ملرد. تەڭگە دەگەن ءسوز نەمەسە وبلىس بيۋدجەتىنىڭ 30 پايىزى. بيىل 107 ءبىلىم بەرۋ نىسانىنا ءتۇرلى جوندەۋلەر جاسالدى. بيىلعى وقۋ جىلىندا 2 جاڭا مەكتەپ اشىلادى. ونىڭ 900 ورىندىعى قىزىلجار قالاسىندا، 300 ورىندىق بىرەۋى بەسكول اۋىلىندا اشىلادى. ەكەۋى دە قازاق تىلىندە وقىتاتىن مەكتەپتەر.

ايماقتىق جوو-دا جاقسى جاڭالىقتار بار. بيىل ونداعى ستۋدەنتتەر سانى 7 مىڭ استى. بۇل 2016 جىلمەن سالىستىرعاندا 1،8 ەسە ارتىق. بىلتىردان بەرى مەديتسينالىق جانە اۋىلشارۋاشىلىعى ءپروفيلى بويىنشا 25 جاڭا ماماندىقتار دايىنداۋ قولعا الىنعان. جاڭا وقۋ جىلىندا گرانتپەن تۇسەتىندەر سانى 1200 ادام.

دەنساۋلىق ساقتاۋ سالاسىنا 2019 جىلدان بەرى مەديتسينالىق جاراقتار الۋ ءۇشىن 2،4 ملرد. تەڭگە ءبولىنىپ كەلەدى. اتى جامان ۆيرۋسپەن كۇرەسكە قارسى بيىل ساتىپ الىنعان ءوجت اپپاراتتارىنىڭ سانى  112-گە جەتتى جانە تاعى 111 تۇسپەكشى. بەس وتتەگى ستانسالارىنىڭ قۇرىلىسى باستالدى.

وبلىسقا مەديتسينالىق مامانداردىڭ كەلۋ تارتىمدىلىعىن ارتتىرۋ ءۇشىن الەۋمەتتىك پاكەت بۇرىنعىدان دا جاقسارتىلدى. اۋىلدىق جەرلەرگە باراتىن دارىگەرلەرگە ول 1،5 ملن تەگەگە جەتتى. اۋداندىق اكىمدىكتەر ولاردى تۇرعىن ۇيمەن تولىقتاي قامتاماسىز ەتەدى. 

سولتۇستىك قازاقستان وبلىسىنىڭ دەپۋتاتتارى قۇمار اقساقالوۆتىڭ اۋزىنان وسىنداي دەرەكتەردى ەستىپ، ءوڭىردىڭ تۇراقتى دامۋ جولىندا ەكەندەرىنە كوزدەرى جەتىپ جاقسى كوڭىل كۇيمەن تاراستى.

سولتۇستىك قازاقستان وبلىسى

سوڭعى جاڭالىقتار

اراق ساتىلمايتىن اۋدان

ايماقتار • كەشە

ەرلىككە تولى سۋرەتتەر

رۋحانيات • كەشە

ۇقساس جاڭالىقتار