ساماۋرىندار ساندىك بەزەندىرىلۋى مەن قولدانىلۋى تىكەلەي بايلانىستى ونەرتاپقىشتىق تۋىندى رەتىندە ۇزاق تا ماڭىزدى تاريحقا يە. ساماۋرىنعا ۇقساس قۇرىلعىلار انتيك زاماندا دا بەلگىلى بولعان. مۇنداي «ساماۋرىندار» ەجەلگى ريمدە, كەيىننەن ازيا مەن ەۋروپادا دا تارالعان. ال قازاق دالاسىنا ساماۋرىندار ەتنومادەني بايلانىستار ناتيجەسىندە, ياعني ساۋدا, ايىرباس, تارتۋ-تارالعىلار تۇرىندە كەلىپ, بىرتىندەپ تۇرمىسقا ەنگەن.
«ساماۋرىنىڭ قايناسىن...» اتتى ايرىقشا كورمەگە 50-گە جۋىق مۋزەيلىك قۇندىلىق قويىلعان. ولاردىڭ قاتارىندا ساماۋرىنداردىڭ كەز-كەلگەن فورماداعى – «ۆازا» مەن «شاردان» باستاپ, «رومكە» مەن «تسيليندرعا» دەيىنگى تۇرلەرىن كەزدەستىرۋگە بولادى. تاريحى تەرەڭ ورتا ازيالىق شاۋگىمدەر, قۇمعان-ساماۋرىندار, XIX ع. باسى – XX ع. تۋلالىق فابريكالار – اعايىندى باتاشوۆتار, شەماريندەر, ن.ا. ۆورونتسوۆ, ب.گ. تەيلە, يا.ۆ. ليالين, م.سليۋزبەرگ, ف.ەرميلوۆ جانە ت.ب. فابريكالاردا جاسالعان ساماۋرىندار ەرەكشە قىزىعۋشىلىق تۋدىرادى. شەماريندەر ساۋدا ءۇيىنىڭ فابريكالىق ماركاسى بار, سىيىمدىلىعى 30 ليتر ەڭ ۇلكەن ساماۋرىن مەن 1926 جىلى قارقارالى جارمەڭكەسىندە ساتىپ الىنعان ساماۋرىندى ەرەكشە ەكشەپ ايتۋعا بولادى.
ء«ار شاڭىراقتىڭ سارى ساماۋرىنى ساقىلداپ قايناپ تۇراتىن بولعان. بۇل ەڭ الدىمەن قازاقى ءۇيدىڭ كەلگەن قوناعىنا دەگەن قۇرمەتىن بىلدىرسە كەرەك. بۇل ءداستۇر ءۇزىلىپ قالسا دا, ءمان-ماڭىزىن جوعالتپايدى. كورمەدە ۇسىنىلعان ءار ساماۋرىننىڭ وزىنە ءتان تاريحى بار. ءتىپتى عاسىرمەن قۇرداس قۇندى ىدىستار مۇراجايىمىزدىڭ قورىندا ساقتالعان», دەيدى مەملەكەتتىك مۋزەيدىڭ قىزمەتكەرى سۇلۋشاش اعەلەۋوۆا.
كورمەگە ساماۋرىندار كوللەكتسياسىمەن بىرگە سەرۆيزدەر, اس ءۇي قۇرالدارى, قازاقستاننىڭ فارفور زاۋىتتارىنىڭ ءتۇرلى ونىمدەرى قويىلعان.
