قازىر پوليتسيانىڭ قالالىق ءبولىنىسىندە 56 جاس قىزمەتكەر جۇمىس ىستەيدى. ولاردىڭ قىزمەتى كوروناۆيرۋستىق ينفەكتسيانىڭ تارالۋىنا قارسى ءىس-شارالارمەن سايكەس كەلدى. سوندىقتان تالىمگەرلەر مەن ارداگەرلەر ولاردىڭ پوليتسيا ۇجىمدارىندا بەيىمدەلۋ جونىندەگى تاجىريبەلەرىن ءداستۇرلى تۇردە ەستي الماعان ەدى. ويتكەنى, ءبىرىنشى كۇننەن قاۋىرت جۇمىستار شۇعىل باستالىپ كەتتى. ال قىزمەتتە باستاپقى جاعداي جاسالسا, جاستاردىڭ جۇمىس ورنىن ەكىنشى ۇيلەرى دەپ ەسەپتەۋلەرىنە سەپتىگىن تيگىزەدى. بۇل ماسەلەلەردى ءوزىنىڭ كىرىسپە سوزىندە پەتروپاۆل قالاسى پب باستىعىنىڭ ورىنباسارى, پوليتسيا پولكوۆنيگى ساعىندىق تەمىرەەۆ ايتىپ ءوتتى.
بارلىق سانيتارلىق نورمالار مەن الەۋمەتتىك قاشىقتىقتى ەسكەرە وتىرىپ, ۇيىمداستىرىلعان جينالىستا سىبايلاس جەمقورلىققا قارسى زاڭنامانى ساقتاۋ جايلى دا اڭگىمە قوزعالدى. ولجايلى بۇرىن قالالىق ءبولىنىستىڭ باسشىسى بولعان, قازىر ارداگەر اباي عاليەۆ باستادى. توقسانىنشى جىلداردىڭ قيىن كەزەڭىندە جەدەل ۋاكىلدەر مەن تەرگەۋشىلەر كەيدە جارىقسىز, قاجەتتى تەحنيكا مەن جىلۋسىز, قۇجاتتاردى باسپا ماشينالارىندا قولمەن باسىپ, جۇمىس ىستەدى. «قازىرگى پوليتسياعا بارلىق جاعداي جاسالعان. ەندى لەيتەنانتتار مەن كاپيتانداردىڭ مىندەتى – ۇنەمى وزدەرىن دامىتىپ, شىعارماشىلىققا جانە سپورتقا بەيىمدى ەكەندىكتەرىن كورسەتۋ, ارينە, بۇل جۇمىس بارىسىنا زيانىن تيگىزبەۋى قاجەت. ال, اعا ارىپتەستەرى, تاعايىندالعان تالىمگەرلەر مەن ارداگەرلەر جاستارعا كەڭەس بەرىپ, كومەكتەسۋلەرى كەرەك», - دەپ اباي عاليەۆ ارداگەرلەردىڭ پىكىرىن ءبىلدىردى.
پسيحولوگيالىق دايىندىق, قىزمەتتە ءتۇرلى ەلىكتىرگىشتەرگە قارسى تۇرا ءبىلۋ مۇمكىندىگى ماڭىزدى اسپەكت بولىپ تابىلادى. جۋىردا تاعى ءبىرجاعىمسىز وقيعا بولىپ, اۋداندىق ءبولىنىستىڭ جاس وفيتسەرى سىبايلاس جەمقورلىق قۇقىق بۇزۋشىلىق جاساعانى ءۇشىن جۇمىستان شىعارىلدى. كادر ساياساتى ءبولىمىنىڭ ينسپەكتور-پسيحولوگى, پوليتسيا كاپيتانى مءادينا مولدينوۆا كاسىبي شەبەرلىكتى قالاي ارتتىرۋ جايىن, وندايلارعا قالاي توتەپ بەرۋ جايىن اڭگىمەلەدى.
