الماتى وبلىسى الاكول اۋدانىنىڭ تۋماسى نۇرسۇلتان قاسىمحانوۆ كەزىندە قازاق كۇرەسىمەن شۇعىلدانعان. ۇلتتىق سپورت تۇرىنەن وتكەن جارىستاردا ءبىراز تابىسقا جەتكەننەن سوڭ ارالاس جەكپە-جەككە اۋىسادى. ەلىمىزدە جاۋىنگەرلىك ونەردى دامىتۋعا ەلەۋلى ۇلەس قوسىپ جۇرگەن دانيار قاسقاراۋوۆ جەتەكشىلىك ەتەتىن «الاش پرايد» كلۋبىندا شەبەرلىگىن شىنداعان ول ءوزىنىڭ تۇساۋكەسەر كەزدەسۋىن 2014 جىلدىڭ ءساۋىر ايىندا رۋسلان سەرىپقۇلوۆقا قارسى وتكىزىپ, باسىم تۇسەدى. سول كەزدەن بەرى بارلىعى 12 رەت ايقاس الاڭىنا شىققان قاسىمحانوۆ 10 باسەكەنى ءوز پايداسىنا شەشتى. اتاپ ايتساق, قانداسىمىز اۋعانستاندىق ءامىر يبوحۋم, ءوز جەرلەستەرى سالات بيشحانوۆ, قانات دوسماعامبەتوۆ, قانات راقىموۆ, رايىمبەك ورىنباي, قىرعىزستاندىق جامشىتبەك ازىرەت, رەسەيلىك دميتري ەرمولاەۆ پەن الەكساندر پەدۋسون جانە بەلارۋستىق يۆان جۆيربليانى جەڭەدى. سول جەكپە-جەكتەردىڭ تەڭ جارتىسىن مەرزىمىنەن بۇرىن اياقتادى.
تاعى ەكى كەزدەسۋدە نۇرسۇلتان جەڭىلىستىڭ كەرمەك ءدامىن تاتتى. ول 2014 جىلى قازاقستاندىق ۆيكتور كيچيگينگە جانە 2018 جىلى رۋمىنيالىق بوگدان باربۋگە ەسە جىبەردى. ەكەۋىندە دە باسەكە تاعدىرىن تورەشىلەر شەشىپ, جەڭىستى قارسىلاستارىنا بەردى.
ماسكەۋدە نۇرسۇلتان قاسىمحانوۆ ءاليحان سۇلەيمانوۆپەن جەكپە-جەككە شىعادى. چەشەنستاننىڭ تۋماسى وتە تاجىريبەلى سپورتشى. ول دا وسى سپورت ءتۇرىن 2014 جىلدان بەرى سەرىك ەتۋدە. سول ارالىقتا 13 مارتە وكتاگونعا شىعىپ, 11 رەت جەڭىس تويىن تويلادى. جەتى قارسىلاسىن ەسىنەن تاندىردى. بيىل ناۋرىز ايىندا الماتىدا وتكەن تۋرنيردە ءاليحان ءبىزدىڭ ەرمەك ءتلاۋوۆتى تىزە بۇكتىرگەن بولاتىن. بۇل جولى ءبىز نۇرسۇلتان ءوز كوماندالاس ارىپتەسىنىڭ جىبەرگەن ەسەسىن قايتارادى دەپ ۇمىتتەنەمىز.
– بۇل وتە تارتىستى جەكپە-جەك بولاتىنى ءسوزسىز. ءاليحان – تالاي دۇرمەكتە ءوزىنىڭ مىقتىلىعىن سان مارتە مويىنداتقان ساڭلاق. بىراق ءبىزدىڭ نۇرسۇلتان دا وسال ەمەس. ول – ەشكىمنەن قايمىقپايتىن, الدىندا قانداي دۇلەي كۇش يەسى تۇرسا دا ەش ايانباي ايقاساتىن ەرجۇرەك جىگىت. سوندىقتان وسى ايقاستى تاماشالاعان كورەرمەندەردىڭ ايىزى ابدەن قاناتىنىنا ەش كۇمانىم جوق, – دەيدى «الاش پرايد» كلۋبىنىڭ پرەزيدەنتى دانيار قاسقاراۋوۆ.
5 قىركۇيەك كۇنى رەسەي استاناسىندا جالاۋى جەلبىرەيتىن جارىستىڭ باستى جەكپە-جەگى جارتىلاي ورتا سالماق دارەجەسىندەگى (77,2 كيلو) كاباردينو-بالكاريانىڭ وكىلى ءالي باگوۆ پەن داعىستاندىق مۇرات ابدۋللاەۆ اراسىندا وتەدى. تاعى ءبىر نەگىزگى تارتىستا ەدۋارد ۆارتانيان (70,4 كيلو) مەن مۇحامەد كوكوۆ كۇش سىناسادى.
