بۇرىنعىداي ەمەس, بۇگىندە حالىقتىڭ قۇقىقتىق ساۋاتى ارتقان. سوندىقتان كەز كەلگەن ەل تۇرعىنى ءوزىن تولعاندىرعان ماسەلەلەر بويىنشا ويىن ورتاعا سالىپ, ودان تۇشىمدى جاۋاپ الا الادى. تۇرعىنداردىڭ ارىز-شاعىمدارى مەن وتىنىشتەرىنە دەر كەزىندە قۇلاق اسىپ, وعان ءتيىستى دارەجەدە كوڭىل ءبولۋ, ماسەلەنى ءتيىمدى شەشۋ – باستى نازاردا. مۇنى ناقتى دەرەكتەرمەن دالەلدەۋگە بولادى.
2020 جىلدىڭ قاڭتار-شىلدە ايىندا شىمكەنت قالاسى اكىمدىگىنە 8 711 ارىز-شاعىم كەلىپ تۇسكەن. وتىنىشتەردىڭ 950-ءنىڭ ماسەلەسى قاناعاتتاندىرىلىپ, 8491-نە جازباشا تۇسىندىرمە بەرىلدى. ارىز-شاعىمدار ءتۇرلى سالاعا قاتىستى. ونىڭ ىشىندە جەر قاتىناستارى بويىنشا – 3986, كارانتين كەزىندە قالادا ءجۇرىپ-تۇرۋعا رۇقسات الۋ – 839, ەنەرگەتيكا جانە كوممۋنالدى شارۋاشىلىق – 314, باسپانا ماسەلەسى – 302, الەۋمەتتىك جانە جۇمىسقا ورنالاستىرۋ – 300, جولاۋشىلار كولىگى جانە اۆتوموبيل جولدارى – 198, قۇرىلىس سالاسى – 161, ءبىلىم سالاسى – 142, دەنساۋلىق ساقتاۋ – 135, ەكىنشى دەڭگەيدەگى بانكتەردەن العان نەسيە سوماسىن وتەۋ تۋرالى – 78, باسقا ماسەلەلەر بويىنشا 2 134 ءوتىنىش بار. اكىمدىكتىڭ رەسمي سايتىنداعى «اشىق ديالوگ», «سۇراق-جاۋاپ» بلوگتارىنا 375 ارىز-شاعىم ءتۇسىپ, تولىق جاۋاپ بەرىلگەن.
سونىمەن قاتار بۇقاراعا بارىنشا جاقىن بولۋ ماقساتىندا قالا اكىمى مۇرات ايتەنوۆ كارانتين كەزەڭىنە دەيىن, ياعني قاڭتار-ناۋرىز ارالىعىندا حالىقپەن 7 رەت جۇزدەسىپ, 186 تۇرعىندى قابىلدادى. اكىمنىڭ قابىلداۋىنا كەلگەن 108 ازاماتتىڭ ماسەلەسىنە تۇسىندىرمە جاۋاپتار بەرىلسە, 75 ازاماتتىڭ ماسەلەسى شەشىمىن تاپتى. ال 2 ازاماتتىڭ ماسەلەسىن شەشۋ ۇزاق مەرزىمدىك باقىلاۋعا قويىلدى. جەكە قابىلداۋعا قاتىسقان 16 ازاماتقا اكىمدىك قالانىڭ جومارت ازاماتتارىنىڭ كومەگىمەن قولاربا, ورتوپەديالىق اياقكيىم, كوزىلدىرىك, ءدارى-دارمەك اپەرىپ, وتا جاساتۋعا اقشالاي كومەك بەردى. قۇجاتتارىن رەسىمدەي الماي جۇرگەن 15 ازاماتتىڭ ماسەلەسى شەشىلىپ, زاڭگەر قولۇشىن سوزدى.
شاھار باسشىسى كارانتينگە قاتىستى ازاماتتاردى ونلاين بايلانىس ارقىلى قابىلداپ, تىكەلەي ەفيرگە شىعۋدى قولعا الدى. اپتانىڭ ءار جۇماسىندا ءوتىپ جاتقان ونلاين قابىلداۋدا 26 ازاماتتىڭ ءوتىنىشىن تىڭداپ, جاۋاپتى سالا ماماندارىنا ناقتى تاپسىرمالار جۇكتەدى. بۇعان قوسا قالا اكىمىنىڭ ورىنباسارلارى جىل باسىنان بەرى 266 ازاماتتى قابىلداپ, وتىنىشتەر نەگىزىندە جۇمىس اتقاردى.
كەرى بايلانىستا كەدەرگى بولمايدى
اتى جامان ىندەتتىڭ سالقىنى تيگەن قانشاما تۇرعىن قالاداعى دەنساۋلىق ساقتاۋ مەكەمەلەرىنىڭ جۇمىسىنا, قىزمەت كورسەتۋ ساپاسىنا سىن ايتقانى جاسىرىن ەمەس. اسىرەسە, باسى اۋىرىپ, بالتىرى سىزداعان ناۋقاستار جەدەل جاردەم كولىگىنىڭ تىم كەش قيمىلدايتىنىن ايتىپ اشىنعان ەدى.
تۇرعىنداردىڭ تالاپ-تىلەگىن ەسكەرگەن جەرگىلىكتى بيلىك كەتكەن ولقىلىقتاردىڭ ورنىن تولتىردى. ەندى شاھار جۇرتى جاڭادان ىسكە قوسىلعان مەديتسينالىق جاردەم كورسەتۋ ستانساسىنىڭ «Call» ورتالىعىنا حابارلاسىپ, قاجەتتى كومەكتى ۋاقتىلى الاتىن بولدى. حالىقارالىق ستاندارتتارعا سايكەس كەلەتىن بۇل ورتالىق جاقىندا اشىلدى. 103-كە كەلىپ تۇسەتىن قوڭىراۋلاردىڭ بارلىعىن ديسپەتچەرلەر جاڭادان اشىلعان ورتالىقتا قابىلداپ, بىرىڭعاي اۆتوماتتاندىرىلعان جۇيە ارقىلى باقىلايدى. قوڭىراۋ قابىلداۋ ورىندارى ەكى ەسەگە ارتقان. ناتيجەسىندە ازاماتتار ەش كەدەرگىسىز جەدەل جاردەم نومىرىنە حابارلاسا الادى.
ورتالىقتاعى قوڭىراۋلاردى باسقارۋ ءۇشىن PRI ارناسىنىڭ ۇزدىكسىز بايلانىس جەلىسى مەن سپۋتنيكتىك باقىلاۋ جۇيەسى (GPS) جانە ءموبيلدى ينتەرنەت تەحنولوگياسى قولدانىلادى. بىرىكتىرىلگەن جۇيە ارقىلى وپەراتورلار 10 سەكۋند ىشىندە شاقىرتۋدى بريگاداعا باعىتتايدى. سونداي-اق اقپاراتتىق جۇيەنىڭ كومەگىمەن شىمكەنت قالاسىنىڭ كارتاسى بويىنشا مەكەنجايلاردى ىزدەۋ, كولىك باعىتتارىنىڭ كارتالارىن قاداعالاۋ, كۇتۋ ۋاقىتى, قوزعالىس جىلدامدىعى تۋرالى مالىمەتتەردى اۆتوماتتى تۇردە باقىلاۋعا بولادى. ال شاقىرتۋدا جۇرگەن مامانداردىڭ جۇمىسىن باقىلاۋ ءۇشىن 100 جەدەل جاردەم كولىگىندەگى قىزمەتكەردىڭ بارىنە تولىعىمەن جاڭا پلانشەت بەرىلدى.
شىمكەنت قالاسى اكىمدىگى مەن «مەيدەي قازاقستان» تۇرىك كومپانياسى اراسىندا جەدەل جاردەم قىزمەتىن جاڭعىرتۋ جوباسى اياسىندا ەكىجاقتى مەموراندۋمعا قول قويىلعان. كەلىسسوز ناتيجەسىندە ءبىرىنشى كەزەڭدە جەدەل جاردەم قىزمەتىنە 100 جاڭا كولىك بەرىلگەن. ەكىنشى كەزەڭدە وسى جوبا اياسىندا «Call» ورتالىعى الەمدىك ستاندارتتار بويىنشا جاڭعىرتىلدى.
بايلانىس قىزمەتىن جاقسارتۋعا كۇش سالىپ جاتىر
بۇل قانشاما جىلدان بەرى شەشىمىن تاپپاي كەلە جاتقان ماسەلە ەدى. پاندەميا كەزىندە ءۇي جاعدايىندا ونلاين رەجىمدە جۇمىس ىستەۋگە ءماجبۇر بولعان شىمكەنتتىكتەر ينتەرنەتتىڭ قيىندىعىن ابدەن كوردى. ءسويتىپ تۇرعىنداردىڭ ءوتىنىشى نەگىزىندە قالا اكىمدىگى كەشەندى زەرتتەۋ جۇمىستارىن قولعا الدى. ناتيجەسىندە قالا اكىمىنىڭ تاپسىرماسىنا سايكەس جەر قاتىناستارى باسقارماسى بايلانىس انتەننالارىن ورناتۋ ءۇشىن 11 جەر تەلىمىن ءبولىپ, ولاردى زاڭداستىرۋ تۋرالى قاۋلى شىعاردى. ەندى جوسپارلى جۇمىس جەدەل قولعا الىنسا, بايلانىس قىزمەتىنىڭ كەدەرگىلەرى جويىلماق.
بۇل تۋرالى شاھاردى تسيفرلاندىرۋ بويىنشا وتكەن جينالىستا قالا اكىمىنىڭ ورىنباسارى ايبەك ساتتىباەۆ باياندادى. ونىڭ ايتۋىنشا, بايلانىس انتەنناسىن ينۆەستور ءوز ەسەبىنەن ورناتادى. ودان ءارى ۇيالى بايلانىس وپەراتورلارى وزدەرىنىڭ بازالىق ستانسالارىن وسى قۇرىلعىعا جالعايدى.
«ەنەرگەتيكا جانە تۇرعىن ءۇي-كوممۋنالدى شارۋاشىلىق باسقارماسىنا تيەسىلى جارىقتاندىرۋ باعاندارىنا جالعانعان ءموبيلدى وپەراتورلاردىڭ بازالىق ستانسالارىن ينۆەستور ەسەبىنەن تۇراقتى باعاندارعا اۋىستىرۋدى ۇسىنامىز. ونىڭ جۇك كوتەرگىشتىگى 1,5-2 توننا بولادى. بىرەۋىنىڭ قۇنى شامامەن 2-2,7 ملن تەڭگەنى قۇرايدى. بۇل جوبانى جۇزەگە اسىرۋ ءۇشىن ارنايى جول كارتاسى ازىرلەندى», دەدى اكىمنىڭ ورىنباسارى.
سونداي-اق ءموبيلدى ينتەرنەت پەن بايلانىستىڭ ساپاسىن جاقسارتۋ شەڭبەرىندە تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ وكىلدەرى ءموبيلدى بايلانىسى ناشار شىمكەنتتىڭ ايماقتارىن انىقتاۋ بويىنشا جۇمىس جۇرگىزدى. جاڭا جابدىقتى ورناتۋ ءۇشىن 43 مەكەنجاي كورسەتىلگەن جول كارتاسى دايىندالدى. بۇل ۋچاسكەلەر قالا كوشەلەرىندەگى درايۆ-تەست ناتيجەلەرى بويىنشا انىقتالعان.
بۇعان قوسا زەرتتەۋ جۇرگىزۋ جانە بازالىق ستانسالاردى ورناتۋ ماقساتىندا ارنايى توپ قۇرىلدى. توپ جۇمىسىنا تسيفرلاندىرۋ باسقارماسىنىڭ, جەر قاتىناستارى باسقارماسىنىڭ وكىلدەرى, سونداي-اق 43 جەر ۋچاسكەسىنىڭ ارقايسىسىنا بايلانىس وپەراتورلارىنىڭ ماماندارى جۇمىلدىرىلدى. سالا ماماندارى كوپتەگەن پروبلەما تۇرعىن ءۇي كەشەندەرىنە جاقىن بازالىق ستانسالار بولماعان كەزدە تۋىندايتىنىن ايتادى.
الدا جاڭا وقۋ جىلى كەلە جاتىر. ەپيدەميالىق جاعدايعا بايلانىستى ءبىلىم بەرۋ مەكەمەلەرىندەگى جۇمىس تەك ونلاين فورماتتا جۇرگىزىلمەك. ال ول ءۇشىن ساپالى ينتەرنەت قاجەت. شىمكەنت قالالىق تسيفرلاندىرۋ باسقارماسى باسشىسىنىڭ مىندەتىن اتقارۋشىسى دوسان الىبەكوۆ قالاداعى ءبىلىم بەرۋ مەكەمەلەرىن جوعارى جىلدامدىقتى ينتەرنەتپەن قامتاماسىز ەتۋ ءۇشىن بىرقاتار جۇمىس اتقارىلىپ جاتقانىن ايتتى.
ونىڭ سوزىنە سۇيەنسەك, شىمكەنت قالاسى ساپالى ينتەرنەت جۇيەسىمەن 80 پايىز قامتىلعان. ال ورناتىلىپ جاتقان بازالىق ستانسالاردىڭ جۇمىسى اياقتالعان ساتتە بۇل كورسەتكىش 100 پايىزعا جەتەدى. ناتيجەسىندە قالا اۋماعىنا قوسىلعان ەلدى مەكەندەردەگى ينتەرنەت ماسەلەسى تولىق شەشىلەدى.
سونىمەن قاتار قالادا AR-shymkent, 2-گيس جانە ترۋ-كونف جوبالارى ىسكە اسىرىلىپ جاتىر.
جولدىڭ ساپاسى – ءجىتى قاداعالاۋدا
كارانتين كەزىندە دە شىمكەنتتە جول جوندەۋ جۇمىستارىنىڭ قارقىنى باسەڭدەگەن ەمەس. ساقتىق شارالارىن بۇزباي, اتقارىلعان جۇمىستىڭ ناتيجەسىندە قالا جولدارى تاقتايداي تۇزەلىپ, رەتكە كەلتىرىلدى. ەندىگى جۇمىس توسەلگەن اسفالت پەن سالىنعان جولدىڭ ساپاسىن تەكسەرۋ ەدى.
بۇل باعىتتا تىندىرىمدى تىرلىك كوپ. سىبايلاس جەمقورلىققا قارسى ءىس-قيمىل اگەنتتىگىنىڭ شىمكەنت قالاسى بويىنشا دەپارتامەنتى مەن جول اكتيۆتەرىنىڭ ۇلتتىق ساپا ورتالىعىنىڭ شىمكەنت قالالىق فيليالى ءۇشىنشى مەگاپوليستەگى جوندەۋدەن ءوتىپ جاتقان جولداردىڭ ساپاسىنا باقىلاۋ جۇرگىزىپ, رەيدتىك ءىس-شارا وتكىزىپ كەلەدى.
كەزەكتى رەيد ۇزىندىعى 1850 مەتردى قۇرايتىن تۇركىستان كوشەسىندە جۇرگىزىلدى. رەيد بارىسىندا «جول اكتيۆتەرىنىڭ ۇلتتىق ساپا» ورتالىعىنىڭ جىلجىمالى زەرتحاناسىنىڭ كومەگىمەن جاڭا اسفالتتىڭ ءبىرىنشى جابىنىنىڭ قالىڭدىعى جانە جيەكتاستاردىڭ بەرىكتىگى تەكسەرىلدى. تەكسەرۋ كەزىندە جول جابىنىنان كەمشىلىك تابىلماعانىمەن, بورديۋرلاردىڭ بەرىكتىگىنە كۇمان تۋدىرارلىق كورسەتكىشتەر بايقالدى. دەگەنمەن اۆتوموبيل جولدارى ءبولىمىنىڭ باسشىسى قايرات بايمەنديەۆ جيەكتاستاردىڭ جاڭادان قويىلعانىن, 28 كۇن ىشىندە تولىقتاي دايىن بولاتىنىن العا تارتىپ, مەرزىمى كەلگەندە تاعى ءبىر تەكسەرۋدى ۇسىندى. بۇعان قوسا ول قازىر قالادا بورديۋرلاردىڭ جەتىسپەۋشىلىگى بايقالىپ جاتقانىن ايتتى.
«وسىعان دەيىن 10 رەيدتىك ءىس-شارا ءوتىپ, 50-دەن اسا كەمشىلىك انىقتالدى. بۇگىن جيەكتاستاردىڭ بەرىكتىگى كۇمان كەلتىردى, بۇل بويىنشا الداعى ۋاقىتتا تاعى تەكسەرۋ جۇرگىزەمىز. ويتكەنى ءبىزدىڭ ماقسات – قاتەلىكتەردىڭ الدىن الۋ», دەدى سىبايلاس جەمقورلىققا قارسى ءىس-قيمىل اگەنتتىگىنىڭ شىمكەنت قالاسى بويىنشا دەپارتامەنتى جانىنان قۇرىلعان «ادالدىق الاڭى» جوبالىق كەڭسەسىنىڭ باسشىسى ءجاني قامبار.
بۇل ورتاشا جوندەۋ جۇمىستارى مامىر ايىندا باستالعان. جولعا 611 ملن تەڭگە بولىنگەن.
تۇرعىن ءۇي قۇرىلىسى بويىنشا كوش باستاپ تۇر
شىمكەنت تۇرعىن ءۇي سالۋ جاعىنان رەسپۋبليكادا كوش باستاپ كەلەدى. وعان دالەل – ءبىر جىلعا جەتەر-جەتپەس ۋاقىتتا شاھاردا كوپقاباتتى 262 تۇرعىن ءۇي سالىنىپ جاتقانى. بۇل تۋرالى اقپاراتتىق-كوممۋنيكاتسيالىق ورتالىقتا وتكەن بريفينگتە شىمكەنت قالالىق قۇرىلىس باسقارماسىنىڭ باسشىسى ەربول احمەتوۆ ايتتى.
«بيىل قۇرىلىس جۇمىستارىنىڭ كولەمىن 120 ملرد تەڭگەگە جەتكىزۋ جوسپارلانعان. بۇگىندە ونىڭ 7 اي ىشىندەگى كولەمى 52,2 ملرد تەڭگەگە جەتىپ, وتكەن جىلدىڭ سايكەس كەزەڭىمەن سالىستىرعاندا 1,6 ەسەگە ارتتى. وسى جىلى قۇرىلىس باسقارماسى ارقىلى 154 نىساننىڭ قۇرىلىسى جوسپارلانعان. ولار – 92 تۇرعىن ءۇي, 34 ينجەنەرلىك ينفراقۇرىلىم, 13 مەكتەپ, 1 دەنساۋلىق ساقتاۋ, 2 مادەنيەت, 3 سپورت, 3 اباتتاندىرۋ, 3 اۋىل شارۋاشىلىعى جانە 3 وزگە سالا نىساندارى», دەدى ە.احمەتوۆ.
باسقارما باسشىسىنىڭ ايتۋىنشا, قازىرگى تاڭدا قالادا «نۇرلى جەر» مەملەكەتتىك باعدارلاماسىمەن بارلىق قارجى كوزدەرى ەسەبىنەن اۋدانى 1 ملن شارشى مەتر 262 كوپقاباتتى تۇرعىن ءۇي سالىنۋدا. ونىڭ ىشىندە قۇرىلىس باسقارماسى ارقىلى بيۋدجەت ەسەبىنەن 92 باسپانا تۇرعىزىلىپ جاتىر. ولار كرەديتتىك جانە ارەندالىق باعىتتا ىسكە اسۋدا. اتاپ ايتساق اكىمشىلىك ىسكەرلىك ورتالىعىندا, شىمكەنت سيتي جانە تۇران شاعىن اۋداندارىندا 80 كرەديتتىك تۇرعىن ءۇيدىڭ قۇرىلىسى ءجۇرىپ جاتىر. ونىڭ 51-ءى بيىل تاپسىرىلىپ, ناتيجەسىندە 3 284 وتباسى قولجەتىمدى باعامەن باسپانا ساتىپ الادى. ال ارەندالىق تۇرعىن ۇيگە كەلسەك, 12 باسپانا بوي كوتەرۋدە. ونىڭ 8-ءى اكىمشىلىك ىسكەرلىك ورتالىعىندا, 4-ەۋى تۇراندا ورنالاسقان. بيىل 8 تۇرعىن ءۇيدىڭ قۇرىلىسى اياقتالىپ, 448 پاتەر پايدالانۋعا بەرىلەدى. سونىمەن قاتار نارىقتان 696 پاتەر ساتىپ الىنادى. ناتيجەسىندە 1 144 ارەندالىق پاتەر تۇرعىن ءۇي كەزەگىندە تۇرعان ازاماتتارعا بەرىلەدى. ونىڭ ىشىنە كىرەتىن وتباسىلار – 450 كوپبالالى وتباسى, 394 الەۋمەتتىك وسال توپتار جانە 300 جۇمىس ىستەيتىن جاستار.
ەرلان قۇلانباي ۇلىنىڭ سوزىنە سۇيەنسەك, قالادا بيىل 7 ايدا 20 كرەديتتىك تۇرعىن ءۇي, ياعني 1 416 پاتەر پايدالانۋعا تاپسىرىلعان. ولاردىڭ 8-ءى اكىمشىلىك ىسكەرلىك ورتالىعىندا, 12-ءسى شىمكەنت سيتي شاعىن اۋدانىندا ورنالاسقان. جالپى وسى جىلى 612 مىڭ شارشى مەتر تۇرعىن ءۇيدى پايدالانۋعا بەرۋ جوسپارلانسا, اتقارىلعان جۇمىستاردىڭ ناتيجەسىندە پايدالانۋعا بەرىلگەن تۇرعىن ۇيلەردىڭ جالپى اۋدانى 299,86 مىڭ شارشى مەترگە جەتكەن. وتكەن جىلدىڭ سايكەس كەزەڭىمەن سالىستىرعاندا بۇل ءوسىم 122,7 پايىزدى قۇراپ وتىر.
شىمكەنت – تۋريستەر ءۇشىن تارتىمدى قالا
مادەنيەت جانە سپورت مينيسترلىگى تۋريزم يندۋسترياسى كوميتەتىنىڭ توراعاسى داستان رىسپەكوۆ شىمكەنت قالاسىنا جاساعان ءىس-ساپارىندا ءدال وسىلاي باعا بەردى. ساپار بارىسىندا كوميتەت توراعاسى شاھاردىڭ بىرنەشە تۋريستىك نىساندارىن ارالاپ, سالا ماماندارىمەن كەزدەستى.
ەڭ الدىمەن قالانىڭ ورتالىعىنداعى قوشقار اتا وزەنىنە, كەيىن ورداباسى الاڭىنا جانە تسيتادەل قالاشىعى مەن تاۋەلسىزدىك ساياباعىنا اتباسىن بۇردى. وندا تۋريستىك نىسانداردى دامىتۋ بويىنشا بىرنەشە ۇسىنىسىن ايتىپ, تۋريزم باسقارماسىنىڭ جاڭا جوبالارىمەن تانىستى. سونداي-اق ەسكى قالاشىققا ارنايى توقتالىپ, ونداعى ارحەولوگ-تاريحشىلارمەن, جوبا ۇيلەستىرۋشىلەرىمەن كەزدەستى.
«شىمكەنت – تۋريستەر ءۇشىن وتە قىزىق ءارى اسەم قالا. مۇندا جايلىلىق پەن ەرەكشە جىلىلىق بار. تسيتادەل شىمكەنت قالاسىنداعى ەڭ تاريحي ءارى تۋريستىك نىسان بولادى. جوبانىڭ اياقتالعانداعى كەلبەتىن تاماشالاۋعا ءبارىمىز اسىقپىز. مۇندا قازاقستاندى تانۋعا قۇشتار تاريحشىلار مەن تۋريستەردى تارتامىز. سول سەبەپتى بۇل جۇمىستاردىڭ اۋقىمى مەن ماڭىزىن سەزىنىپ, ابىرويمەن اتقاراتىندارىڭىزعا سەنەمىن», دەدى د.رىسپەكوۆ.
بۇدان سوڭ ول شىمكەنت قالاسى اكىمىنىڭ ورىنباسارى م.يساحوۆپەن جانە تۋريستىك نىسان وكىلدەرىمەن بىرگە دوڭگەلەك ۇستەلگە قاتىستى. وندا كارانتيندەگى تۋريستىك ورتالىقتاردىڭ جۇمىس قارقىنى مەن جەڭىلدەتىلگەن كارانتيندىك رەجىمدەگى تالاپتار ءسوز بولىپ, الداعى جۇمىس الگوريتمى تالقىلاندى.
سونداي-اق داستان رىسپەكوۆ وتباسىلىق قولونەرشىلەر بەيسبەكوۆتەر شاڭىراعىندا بولىپ, قازاقتىڭ ءداستۇرلى بۇيىمدارى مەن تۋريستەرگە ۇسىنىلاتىن ءتۇرلى جابدىقتارمەن تانىستى.
