كەزدەسۋ بارىسىندا قوردىڭ باسقارما توراعاسى ەلىمىزدىڭ مۇناي سالاسى تاعى ءبىر داعدارىستى باستان وتكەرگەنىن اتاپ ءوتتى. سونىمەن بىرگە قور كومپانيالارى توبىندا قابىلدانعان وڭتايلاندىرۋ شارالارىنىڭ ناتيجەسىندە 422 ملرد تەڭگەگە رەزەرۆتەر قۇرىلعانىن حابارلادى. ا.ەسىموۆ مۇناي سالاسىنىڭ وپەراتسيالىق تيىمدىلىگىن ارتتىرۋ بويىنشا جۇمىستى ودان ءارى جالعاستىرۋ كەرەگىن, اتاپ ايتقاندا, ءتيىمسىز ۇڭعىمالار قورىنا قاتىستى شارالار قابىلداۋ قاجەتتىگىن ەسكەرتىپ ءوتتى.
ماڭعىستاۋ جانە اتىراۋ وبلىستارىنىڭ اكىمدەرى سەرىكباي ترۇموۆ پەن ماحامبەت دوسمۇحامبەتوۆ ءوز كەزەگىندە داعدارىسقا قارسى قابىلدانعان شارالار ءۇشىن قور باسشىلىعىنا العىس ءبىلدىردى. قابىلدانعان شارالاردىڭ تيىمدىلىگى داعدارىس كەزەڭى باستالعاننان بەرى بىردە-ءبىر قىزمەتكەر جۇمىستان بوساتىلماعانىنان, قىزمەتى ۋاقىتشا توقتاتىلعان سەرۆيستىك كومپانيالار دا جالاقىسىز قالماعانىنان بايقالدى.
ء«وندىرۋ كولەمىنىڭ تومەندەۋىنە بايلانىستى جۇرگىزىلگەن وڭتايلاندىرۋ شارالارىنا قاراماستان, وندىرىستەگى جۇمىس ورىندارىن ساقتاۋ جانە اعىمداعى جىلعا ارنالعان وندىرىستىك باعدارلامالاردى ورىنداۋ باسىمدىق بولىپ قالا بەرەدى. جوسپاردان ارتتا قالۋ بار. كومپانيا باسشىلىعى جوسپارلى كورسەتكىشتەرگە قول جەتكىزۋگە باعىتتالعان شارالاردى قابىلداۋى قاجەت», دەدى احمەتجان ەسىموۆ.
تاۋەلسىزدىك جىلدارىندا ەڭ ءىرى ونەركاسىپتىك كاسىپورىن – KPI مۇناي-حيميا كەشەنىنىڭ قۇرىلىسى 74%-عا دايىن. قۇرىلىس 2021 جىلى اياقتالادى دەپ جوسپارلانعان. جوبا جىلىنا 500 مىڭ تونناعا دەيىن پوليپروپيلەن وندىرۋگە مۇمكىندىك بەرەدى دەپ كۇتىلۋدە. ا.ەسىموۆ جوسپارلانعان كەستەنى ودان ءارى ساقتاۋعا نازار اۋداردى.
ساپار بارىسىندا قور باسشىسى كەيبىر ەنشىلەس ۇيىمداردىڭ باسشىلارىن سىنعا الدى. ناقتى ايتقاندا, «قاراباتان» پگتەس-تە وندىرىلەتىن ەلەكتر ەنەرگياسىنىڭ تومەن باعاسىنا قاراماستان, تۇسىنىكسىز سەبەپتەرمەن ونى باسقا كوزدەردەن ساتىپ الۋدى جالعاستىرۋدا.
اقتاۋ قالاسىندا قور باسشىسى قۇرىق جانە اقتاۋ پورتتارىنداعى قازىرگى جاعدايمەن تانىستى. بۇل ينفراقۇرىلىمدىق نىسانداردىڭ ەلىمىزدىڭ ترانزيتتىك الەۋەتى ءۇشىن ماڭىزى زور. ولاردىڭ قىزمەتىنە وڭتۇستىك-شىعىس ازياداعى پاندەميا جاعدايى, سونداي-اق كەيبىر سىرتقى فاكتورلار اسەرىن تيگىزدى. كەزدەسۋ سوڭىندا احمەتجان ەسىموۆ قتج مەن قۇرىق پورتىنىڭ باسشىلىعىنا پورتتىڭ جۇكتەمە دەڭگەيىن ارتتىرۋ ءۇشىن بىرلەسىپ كۇش جۇمساۋدى تاپسىردى.
