جوسپارعا سايكەس روتاتسيالىق تارتىپپەن 60 بىتىمگەردەن تۇراتىن توپ "ليۆانداعى بۇۇ ۋاقىتشا كۇشتەرى" ميسسياسىنىڭ قۇرامىندا قىزمەت وتكەرۋ ءۇشىن جىبەرىلدى. بۇل روتاتسيانىڭ ەرەكشەلىگى – بىتىمگەرشىلىك ميسسياسىنىڭ تاريحىندا العاش رەت قۇرامعا دەسانتتىق-شابۋىلداۋشى اسكەرلەرىنىڭ عانا ەمەس, سونداي-اق وڭىرلىك قولباسشىلىقتاردىڭ دا اسكەري قىزمەتشىلەرى ەنگىزىلدى.
جالپى العاندا, ءتورتىنشى قازاقستاندىق بىتىمگەرشىلىك روتاسىنىڭ قۇرامىنا 120 اسكەري قىزمەتشى كىرەدى. ەپيدەميالىق جاعدايدى ەسكەرە وتىرىپ, جەكە قۇرامنىڭ دەنساۋلىعىن ساقتاۋ ءۇشىن اسكەري قىزمەتشىلەردى جىبەرۋ ەكى كەزەڭگە جوسپارلانىپ, تامىز ايىنىڭ باسىندا جانە ورتاسىندا وتكىزۋ تۋرالى شەشىم قابىلداندى.
ليۆانعا كەلگەننەن كەيىن قازاقستاندىق اسكەري قىزمەتشىلەر 2019 جىلعى قاراشادان باستاپ ميسسياداعى ءۇشىنشى بىتىمگەرشىلىك روتاسىنداعى ارىپتەستەرىن الماستىرادى. بىتىمگەرلەر جەرگىلىكتى جەردى پاترۋلدەۋ جونىندەگى مىندەتتەردى ورىنداپ, ازاماتتىق حالىققا كومەك كورسەتىپ, باقىلاۋ بەكەتتەرىن ۇيىمداستىرىپ,ميسسيا شتابىنىڭ باسقا دا ءىس-شارالارىنا قاتىساتىن بولادى. كۇن سايىن قازاقستاندىق جانە ءۇندى بىتىمگەرلەرى بىرلەسىپ 50-گە جۋىق مىندەتتەردى ورىندايدى.
بارلىق اسكەري قىزمەتشىلەر بىتىمگەرشىلىك قىزمەتكە قاتىستى بىرىككەن ۇلتتار ۇيىمىنىڭ نەگىزگى قۇجاتتارىنىڭ راسىمدەرى مەن نورمالارىنا سايكەس مۇقيات ىرىكتەلىپ, وقىتىلدى. تاپسىرمالاردى ورىنداۋ ءۇشىن جەكە قۇرامدى دايىنداۋ توعىز اي بويى الماتى وبلىسىنىڭ ن.تىلەنديەۆ وقۋ ورتالىعى بازاسىندا كارانتيندىك شارالاردى قاتاڭ ساقتاي وتىرىپ جۇرگىزىلدى.
ەستەرىڭىزگە سالا كەتەيىك, قازاقستاننىڭ "ليۆانداعى بۇۇ ۋاقىتشا كۇشتەرى" بىتىمگەرشىلىك ميسسياسىنا قاتىسۋى 2018 جىلدىڭ قازان ايىندا بۇۇ مانداتىنا سايكەس ليۆاندا قازاقستاندىق جانە ءۇندى بىتىمگەرلەرىن بىرلەسىپ ورىستەتۋ تۋرالى مەموراندۋمعا قول قويىلعاننان كەيىن باستالدى.
قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ءۇشىن Telegram جەلىسىندە بىزگە جازىلىڭىز.
