جول-كولىك وقيعاسى شامامەن ساعات تۇنگى ون ەكىدەن وتكەندە بەسكول اۋىلى ماڭىندا نۇر-سۇلتان – پەتروپاۆل اۆتوجولىنىڭ 466 شاقىرىمىندا ورىن العان. 40 جاسار جۇرگىزۋشىنىڭ ءومىرىن تەك قاۋىپسىزدىك جاستىعى ساقتاپ قالعان. ال جارىققا كوزى قارىعىپ, قاشا الماي قالعان ەلىك العان جاراقاتىنان سول جەردە ولگەن. جۇرگىزۋشى جول-كولىك وقيعاسىنان قاتتى شوشىنعانى ءسوزسىز. ول كوپ ۋاقىت تىلگە كەلمەي, وتىرىپ قالعان ەكەن. كولىگى دە بارىنشا زاقىمدانعان, ونىڭ سۋرەتى دە جاريالاندى.
وسى جول-كولىك وقيعاسى تۋرالى كوپتەگەن ادامدار وقىپتى. سولاردىڭ اراسىنان ءبىر ازاماتتار سقو پوليتسيا دەپارتامەنتىنىڭ ءباسپاسوز قىزمەتىنە حابارلاسىپ, زارداپ شەگۋشىنىڭ بايلانىس تەلەفونىنىڭ ءنومىرىن سۇرايدى. مۇنداي اقپارات قۇپيا بولىپ سانالاتىندىقتان ءباسپاسوز قىزمەتى بەرە قويمايدى, بىراق قوڭىراۋ شالۋشىنىڭ نيەتىن بىلگەننەن كەيىن كولىك جۇرگىزۋشىسىنىڭ تەلەفون ءنومىرى بەرىلەدى. قوڭىراۋ شالۋشى ازامات Skoda Club Astana كلۋبىنىڭ مۇشەسى, نۇر-سۇلتان قالاسىنىڭ تۇرعىنى دارحان قالىباي ەكەن. ول وزدەرىنىڭ كلۋب مۇشەلەرىمەن اقىلداسىپ, سولتۇستىك قازاقستاندا زارداپ شەككەن جۇرگىزۋشىگە ماتەريالدىق كومەك كورسەتۋ تۋرالى شەشىم قابىلداعاندارىن جەتكىزەدى.
مۇنداي ادامگەرشىلىك قادام ەستىگەن جاننىڭ ءبارىنىڭ جۇرەگىنە جىلۋ ۇيالاتتى. "جۇرگىزۋشىلەردىڭ بىرلەسىپ, مۇلدە تانىمايتىن ادامعا كومەك كورسەتۋگە نيەتتەنۋى ءجيى كەزدەسەتىن جاعداي ەمەس. سوڭعى كەزدە ورىن العان جاعدايلار قۇندىلىقتارعا جاڭاشا قاراپ, ەشقانداي ماقساتسىز كومەك كورسەتۋ مەن قولداۋدى العا شىعارۋعا اسەر ەتتى دەپ ويلايمىن. بۇل وتە تاماشا باستاما...", دەيدى سقو پد جەرگىلىكتى پوليتسيا قىزمەتى باسقارماسى باستىعىنىڭ ورىنباسارى, پوليتسيا پودپولكوۆنيگى گريگوري تىش.
اۆتوكلۋب مۇشەلەرى وزدەرىنىڭ جيناعان كومەك قاراجاتتارىن جۇرگىزۋشىنىڭ كارتاسىنا اۋدارعان ەكەن. ونىڭ ءوزى دە پەتروپاۆل قالاسىنا جۇمىستارىمەن كەلگەن نۇر-سۇلتان قالاسىنىڭ تۇرعىنى بولىپ شىقتى. بەيتانىس ادامداردىڭ قولداۋى ول ءۇشىن كۇتپەگەن قۋانىش بولدى. سوندىقتان ونىڭ ماشيناسىن ءبۇلدىرىپ العان, دەنە جاراقاتىن شەككەن قايعىسى ءسال دە بولسا ازايىپ قالدى.
استانالىق جىگىتتەر بۇل كومەكتەرىمەن عانا شەكتەلمەي, استاناداعى "ProVag" تەحنيكالىق قىزمەت كورسەتۋ ورتالىعىمەن كولىكتىڭ قوزعالاتىن جانە تەحنيكالىق بولىگىن جوندەۋ جاساعاندا اقىنى جەڭىلدەتىلگەن تاريفپەن الۋعا كەلىسىپتى. مۇنداي جاعداي زارداپ شەگۋشى ازاماتتىڭ قۋانىشىن ەسەلەي ءتۇستى. قوعامىمىزدا وسىنداي اق جۇرەكتى, ابزال جانداردىڭ بولعانى, بىزدىڭشە بارلىق قازاقستاندىقتاردى دا قۋانتۋعا ءتيىس.
