الماتى قالاسىنداعى قازاق ۇلتتىق اگرارلىق ۋنيۆەرسيتەتىنىڭ ءماجىلىس زالىندا ۇلىبريتانيانىڭ قازاقستانداعى ەلشىلىگى مەن ەقىۇ-نىڭ استاناداعى ورتالىعىنىڭ جانە حالىقارالىق كوشى-قون ۇيىمىنىڭ قازاقستانداعى وكىلدىگىنىڭ تەحنيكالىق جاردەمىمەن ءۇش تىلدە جارىق كورگەن ەلباسى جانىنداعى ادام قۇقىقتارى جونىندەگى كوميسسياسىنىڭ «2012 جىلى قازاقستان رەسپۋبليكاسىنداعى ادام قۇقىقتارىنىڭ احۋالى تۋرالى» جانە «قازاقستان رەسپۋبليكاسىنداعى ميگرانتتار قۇقىقتارىنىڭ احۋالى تۋرالى» باياندامالارىنىڭ الماتى قالاسىنىڭ جۇرتشىلىعىنا ارنالعان تۇساۋكەسەرى ءوتتى.
الماتى قالاسىنداعى قازاق ۇلتتىق اگرارلىق ۋنيۆەرسيتەتىنىڭ ءماجىلىس زالىندا ۇلىبريتانيانىڭ قازاقستانداعى ەلشىلىگى مەن ەقىۇ-نىڭ استاناداعى ورتالىعىنىڭ جانە حالىقارالىق كوشى-قون ۇيىمىنىڭ قازاقستانداعى وكىلدىگىنىڭ تەحنيكالىق جاردەمىمەن ءۇش تىلدە جارىق كورگەن ەلباسى جانىنداعى ادام قۇقىقتارى جونىندەگى كوميسسياسىنىڭ «2012 جىلى قازاقستان رەسپۋبليكاسىنداعى ادام قۇقىقتارىنىڭ احۋالى تۋرالى» جانە «قازاقستان رەسپۋبليكاسىنداعى ميگرانتتار قۇقىقتارىنىڭ احۋالى تۋرالى» باياندامالارىنىڭ الماتى قالاسىنىڭ جۇرتشىلىعىنا ارنالعان تۇساۋكەسەرى ءوتتى.
تۇساۋكەسەرگە ەلباسى جانىنداعى ادام قۇقىقتارى جونىندەگى كوميسسيانىڭ توراعاسى قۋانىش سۇلتانوۆ, قازاق ۇلتتىق اگرارلىق ۋنيۆەرسيتەتىنىڭ رەكتورى تىلەكتەس ەسپولوۆ, ەۋروپالىق وداقتىڭ قازاقستانداعى وكىلدىگىنىڭ باسشىسى اۋرەليا بۋشەز حانىم جانە وزگە دە حالىقارالىق ۇيىم وكىلدەرى قاتىستى.
باياندامانىڭ تانىستىرۋ شاراسىنا الماتى قالاسىنىڭ مەملەكەتتىك ورگاندارى مەن ۇكىمەتتىك ەمەس ۇيىمدارىنىڭ وكىلدەرى, قۇقىقتانۋشى-عالىمدار, حالىقارالىق ۇيىمدار مەن ديپلوماتيالىق وكىلدىكتەردىڭ باسشىلارى, ادۆوكاتۋرا, ءبىلىم جانە عىلىم, دەنساۋلىق ساقتاۋ, ءمادەنيەت, بيزنەس جانە باق وكىلدەرى, الماتى قالاسىنداعى جوعارى وقۋ ورىندارىنىڭ ستۋدەنتتەرى مەن وقىتۋشىلارى قاتىسىپ, اتالمىش قۇجاتتىڭ تولىق نۇسقاسىمەن تانىستىرعان ەلباسى جانىنداعى ادام قۇقىقتارى جونىندەگى كوميسسيانىڭ مۇشەلەرى تاستەمىر ابىشەۆ, ۆيتالي ۆورونوۆ, نۇريلا شاحانوۆا, ەركىن وڭعارباەۆ جانە گەرمان نۇرباەۆ سەكىلدى جاۋاپتى تۇلعالارمەن سۇحباتتاستى.
شارا بارىسىنداعى باياندامالاردا قازاقستان بەكىتكەن حالىقارالىق كەلىسىمدەردىڭ نورمالارىنا سايكەس ادام قۇقىقتارىن, سونداي-اق ەڭبەك ميگرانتتارىنىڭ قۇقىقتارىن قورعاۋ سالاسىنداعى زاڭناما مەن قۇقىق قولدانۋ ءتاجىريبەسىنىڭ سالىستىرمالى تالداۋى, كونستيتۋتسيا جانە حالىقارالىق ستاندارتتاردىڭ نورمالارىنا سايكەس حالىقتىڭ الەۋمەتتىك جاعىنان قورعالاتىن توپتارىنا جاتاتىن ازاماتتاردىڭ الەۋمەتتىك-ەكونوميكالىق, ەڭبەك جانە مادەني قۇقىقتارىن قورعاۋ تەتىكتەرىن ءارى قاراي جەتىلدىرۋ بويىنشا ناقتى قادامدار قامتىلعانى اتاپ ءوتىلدى.
تۇساۋكەسەر راسىمىندە ءسوز سويلەگەن ساراپشىلار ەلباسى جانىنداعى ادام قۇقىقتارى جونىندەگى كوميسسيانىڭ باياندامالارىنا جوعارى باعا بەرىپ, ولاردىڭ ۇسىنىمدارىن قازاقستان رەسپۋبليكاسىنىڭ ۇكىمەتى مەن پارلامەنتى ءىس جۇزىندە قولدانىسقا ەنگىزە باستاعانىن ايتىپ ءوتتى.
قانات ەسكەندىر,
«ەگەمەن قازاقستان».
الماتى.
