گرانتتاردىڭ ءبولىنىسى نەگىزىنەن بىرنەشە باسىم باعىتتارعا قاراي تاعايىندالدى. اتاپ ايتقاندا, اقپاراتتىق تەحنولوگيالار, پەداگوگيكا سالاسى مەن قۇرىلىس سالاسىنىڭ ماماندارىنا باسىم گرانتتاردى الدى. قىزىلوردا وبلىسىنان گرانتقا ۇمىتكەر بولعان 3058 وقۋشىنىڭ باسىم بولىگى تەحنيكالىق ماماندىقتاردى تاڭداعان. تارقاتىپ ايتقاندا, 980 تالاپكەر پەداگوگيكالىق, 356 تۇلەك مەديتسينالىق باعىتتى تاڭداسا, 912 ۇمىتكەر تەحنيكالىق ماماندىقتارعا تاڭداۋ جاساعان. ال, 212 تۇلەك اۋىل شارۋاشىلىعى باعىتىنا بارۋدى كوزدەيدى. سونىمەن بىرگە 598 تۇلەك وزگە دە باعىتتاعى ماماندىق يەسى بولۋدى قالادى.
بيىل جىلدىڭ باستى ەرەكشەلىگى – گرانتتار ۋنيۆەرسيتەتتەرگە ەمەس, تالاپكەرلەرگە بەرىلەدى. ياعني تالاپكەردىڭ گرانتى نەگىزىندە ۋنيۆەرسيتەتتەر بالا قابىلدايدى. بۇل رەتتە گرانتتاردىڭ ءبولىنۋ باعىتى ەڭبەك نارىعىنداعى سۇرانىسقا ساي جۇرگىزىلگەن.
ايتا كەتەيىك, مەملەكەتتىك ءبىلىم بەرۋ گرانتىنان بولەك, قىزىلوردا وبلىسى اكىمىنىڭ ارنايى 150 گرانتى ءبولىندى. اكىم اتىنداعى گرانت ارنايى كاتەگورياداعى وتباسىنان شىققان, وقۋ ۇلگەرىمى جاقسى تالاپكەرلەرگە بەرىلەدى.
قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ءۇشىن Telegram جەلىسىندە بىزگە جازىلىڭىز.
