جامان تۇماۋدان جاسقانىپ, جاماعاتتى جيىپ اشىلۋ سالتاناتىن وتكىزە الماسا دا, اس بەرىلمەسە دە, ساۋابى مول ساليقالى ءىستىڭ جاقسى حابارى ءدۇيىم جۇرتتى ەلەڭ ەتكىزگەن. اۋىل شەتىنە ات تابانىن ىلىكتىرگەندە-اق الىستان انداعايلاپ كوزگە تۇسەتىن ساۋلەتتى, مازمۇندى, ەڭسەلى ەسكەرتكىش ەكەن. ەل اعاسى, وسىنداعى «شوققاراعاي» شارۋا قوجالىعىنىڭ باسشىسى قايىركەن حاسەنوۆپەن تىلدەستىك. ەل جيىلىپ ەسكەرتكىش قويساق دەپ وسىدان ون جىل بۇرىن وقتالعان سىڭايلى. اۋەلى ەرلەردىڭ ءتىزىمى جاسالعان. مايداندا وپات بولعانى دا, ەل شەتىنە امان-ساۋ ىلىككەنى دە. ارادا كوپ ۋاقىت ءوتىپ كەتكەن سوڭ سورابىن تابۋ وڭايعا سوقپاسا كەرەك.
يماندى ءىستىڭ باسى-قاسىندا جۇرگەن وسى اۋىلدىڭ تۋماسى جانعالي حاسەنوۆتىڭ ايتۋىنا قاراعاندا, اكەسى ساعديدىڭ ەسىندە جەتپىسكە جۋىق ادام قالىپتى. مايدانگەرلەر تىزىمىنەن ەشكىمنىڭ ەسىمى جازاتايىم قالىپ قويماس ءۇشىن «بوزداقتار» جيناعىنىڭ بىرنەشە تومىن ءسۇزىپ شىعۋعا تۋرا كەلگەن. اۋىل اقساقالى جۇماش جىلقىباەۆ ءبىراز دەرەكتى ءتىرىلتىپتى. اۋداندىق اسكەري كوميسسارياتتىڭ قۇندى دەرەككە بوككەن قالىڭ كىتابى بۇل تاراپتاعى ىزدەنىستىڭ سوڭعى نۇكتەسىن قويدى. مۇلدەم حابارسىز كەتكەن اۋىلداستار تاعدىرى ايقىندالعان. بۇل ورايدا, زەرەندى اۋداندىق اسكەري كوميسسارياتىنىڭ قىزمەتكەرلەرى ءنىسانالى ناسىپقاليەۆ پەن اينۇر بايمەكەنوۆانىڭ كومەگى كوپ تيگەن. اسكەري كوميسسارياتتىڭ الىنعان دەرەكتە 150 ادامنىڭ ءتىزىمى جاسالعان. كەيبىرى, ءتىپتى بەيتانىس. سويتسە بۇرىنعى «لەنين» كولحوزىنا قاراعان قوشقارباي, كەڭوتكەل, ءوندىرىس, ەڭبەك-بىرلىك اۋىلدارى تۇتاس بىرىكتىرىلگەن ەكەن. ارا-جىگى اجىراتىپ الىندى. بوتەندىگى جوق, وسى ولكەنىڭ ورەندەرى.
ەندىگى ماسەلە – ەسكەرتكىش كومپوزيتسياسى. الىستان كوز تارتاتىن بيىك ستەللا اسقاق ارمان مەن ءور رۋحتى بەينەلەۋگە ءتيىس. اۋەل باستاعى ەسەرتكىش ورناتۋداعى ماقسات تا ەرلەردىڭ ەسىمدەرىن ەل ەسىندە ساقتاۋ عانا ەمەس, كەيىنگى ۇرپاقتىڭ بويىنا رۋح دارىتۋ, ونەگە ءوربىتۋ. وسى ويدى ساۋلەت تىلىمەن قالىپتاپ, كورگەن جۇرتتىڭ كوڭىلىنە وي تاستاۋ قاجەت. جەرلەس ساۋلەتشى تۇرلىبەك كوچيكوۆ ەسكيزىن ازىرلەگەن.
كوكتەم شىعىسىمەن بولاشاق ەسكەرتكىشتىڭ اۋماعىنا قادا قاعىلعان, ىلە قارجى جيناۋ باستالىپتى. اتا ارۋاعىن اسقاقتاتۋعا جۇرت جۇمىلا كىرىسكەن. قولدا بارىن اياماعان كورىنەدى. قۇرىلىس ماتەريالىنىڭ نەگىزگى دەتالى – ستەللانى قايرات كەنجەعارين تاۋىپ بەرسە, مەكەتاي ايدارحانوۆ پەن ساپار قۇدايبەرگەن اۋىلعا جەتكىزگەن. ايگۇل جىلقىباەۆا مەن المات بالتاعارين قۇجاتتاردى راسىمدەۋمەن اينالىسقان. ال ءىستىڭ جۋان ورتاسىندا جۇرگەن قايىركەن حاسەنوۆ تەحنيكاسىن ءبولىپ, جۇمىسشىلارىن جۇمىلدىرىپ, جەتپەي جاتقان قارجىنىڭ قوماقتى بولىگىن ءوزى كوتەرگەن. ايتپاقشى, وسى شارۋا قوجالىعىنىڭ ءوز اۋىلىنا مەكتەپ, مەشىت سالىپ بەرگەندىگىن ايتا كەتسەك تە ارتىق بولماس. قازىر 25 ادامدى جۇمىسپەن قامتىپ وتىر. قازاقتىڭ اقباس سيىرى مەن جىلقىسىن باعىپ, ەكى جارىم مىڭ گەكتار جەرگە ەگىن ەگىپ, ەل ىرگەسىن بەكەمدەۋگە ايرىقشا ۇلەس قوسىپ جۇرگەن ازامات.
قوشقارباي اۋىلىنان قان مايدانعا جۇزدەن استام ازامات الىنعان ەكەن. تەڭ جارتىسى مايدان دالاسىندا وپات بولىپتى. ءبىر شاڭىراقتان اتتانعان ءتورت-بەس ازاماتتىڭ ءبارى بىردەي وپات بولىپ, ۇرپاق وربىمەگەندەرى دە بار ەكەن. ۋاقىت وتە كەلە, سول بوزداقتاردىڭ اتتارى ۇمىتىلىپ, ەل ەسىنەن بىرتىندەپ وشە باستاعان. ەندى مىنە, ماڭگىلىك وشپەستەي قايتا جاڭعىرىپ وتىر. يماندى ءىستىڭ باسى-قاسىندا جۇرگەن بارشا ەل ازاماتتارىنىڭ ورتاق يگىلىكتى ءىسى – بۇل.
اقمولا وبلىسى,
زەرەندى اۋدانى
