دەنساۋلىق ساقتاۋ ءمينيسترىنىڭ ورىنباسارى الدىمەن ورداباسى اۋدانىنداعى ورتالىق اۋرۋحانادا بولدى. ەمدەۋ مەكەمەسى جەرگىلىكتى 120 مىڭ تۇرعىنعا قىزمەت كورسەتەدى. اۋداندا كوروناۆيرۋس ينفەكتسياسىن جۇقتىرعان 158 ناۋقاس تىركەلگەن. وكىنىشكە قاراي, 2 ادام قايتىس بولدى. قۋانىشتىسى, قازىرگى تاڭدا ورداباسى اۋدانىندا كوروناۆيرۋس ينفەكتسياسىمەن اۋىرىپ جاتقان ناۋقاس جوق. پروۆيزورلىق ورتالىقتاعى ورىندار سانى قىرىققا دەيىن ازايدى. اۋداندا وكپەنى جاساندى جەلدەتۋ اپپاراتىنان 9 جانە 70-تەن استام وتتەگى كونتسەنتراتى بار. ءدارى-دارمەك قورى جەتكىلىكتى, ەشقانداي تاپشىلىق جوق. اۋداندا قۇرىلعان 17 ءموبيلدى مەديتسينالىق توپ 1 مىڭنان استام ادامنىڭ ۇيىنە بارىپ قىزمەت كورسەتتى.
ىندەت ورشىگەن كۇردەلى كەزەڭدە اۆتوماتتى بايلانىس (CALL-ورتالىق) جۇيەسى ىسكە قوسىلدى. ءبىر مەزەتتە بىرنەشە قوڭىراۋ قابىلدانىپ, ازاماتتاردىڭ سۇراعىنا دەرەۋ جاۋاپ بەرىلدى.
اجار عينيات بۇدان سوڭ تۇركىستان وبلىستىق №3 پەريناتالدى ورتالىق پەن تۇركىستان قالالىق ەمحانا قىزمەتىمەن تانىستى. وبلىستىق پەرزەنتحانا تۇركىستان, كەنتاۋ قالالارى مەن سوزاق جانە وتىرار اۋداندارىنىڭ 450 مىڭ حالقىنا قىزمەت كورسەتەدى. ورتالىقتا جۇكتى ايەلدەرگە مامانداندىرىلعان دارىگەرلەرلىك كومەك پەن دياگنوستيكالىق قىزمەت تولىق قامتاماسىز ەتىلگەن.
تۇركىستان وبلىسىنداعى جالپى احۋالعا توقتالار بولساق, قازىرگى تاڭدا گوسپيتالدارداعى جانە پروۆيزورلىق توسەكتىك ورىندار سانى 2 ەسەگە دەيىن قىسقاردى.
«سانيتارلىق نۇسقاۋلاردى ءالى دە ۇمىتۋعا بولمايدى. بۇل ۆيرۋس ەشقايدا كەتكەن جوق. جۇقتىرۋدى بولدىرماس ءۇشىن بارلىق قاۋىپسىزدىك شارالارىن قاداعالاۋىمىز قاجەت. اۋرۋشاڭدىقپەن كۇرەس تەك مەديتسينا قىزمەتكەرلەرىنىڭ عانا ەمەس, ءار ازاماتتىڭ جاۋاپكەرشىلىگى. سول سەبەپتى حالىق اراسىندا تۇسىندىرمە جۇمىستارىن كوپ جۇرگىزۋ قاجەت. بۇل تۇستا وبلىستىق اكىمدىك قىزمەتكەرلەرى تاراپىنان دا قولداۋ كورسەتىلۋدە. جالپى, وڭىردەگى مەديتسينا ۇيىمدارىنىڭ ىندەتپەن كۇرەسكە جوعارى دايىندىعىن بايقاۋعا بولادى. ماسەلەن, ورداباسى اۋدانىندا قازىر كوروناۆيرۋس ينفەكتسياسىمەن اۋىرعان ناۋقاس جوق», دەپ اتاپ ءوتتى ا.عينيات.
2020 جىلدىڭ 30 ناۋرىزىنان باستاپ 14 تامىزى ارالىعىندا كوروناۆيرۋستىق ينفەكتسيا راستالعان 3105 ناۋقاس تىركەلدى. ساۋىعىپ شىققان ادامداردىڭ سانى 2711 نەمەسە جالپى سىرقاتتانعاندار سانىنىڭ 87,3 پايىزى. ونىڭ ىشىندە سيمپتومسىز جاعدايداعى 1838 ادام دا جازىلدى.
تۇركىستان وبلىسى
